名廚系列(1)：CIA訓練出嚟嘅美國名廚
大家唔好誤會，標題講嘅CIA係指美國烹飪學院 (Culinary Institute of America)。呢位名廚叫做Anthony Bourdain。
佢原本係世家子弟，可惜後生時期無心向學，仲要離家出走。
之後就靠做廚房打雜維持生計。
喺廚房混咗幾個月，俾佢學識咗幾招三腳貓功夫。
有次佢充大頭鬼應徵做廚師，但係第一日返工就原形畢露，迫住要落荒而逃。
於是佢就“的”起心肝，考咗入去CIA學廚藝。
畢業之後佢喺飲食界打滾咗十幾年，但係依然一事無成。
後來佢恃住自己肚裡面有幾滴墨水，走去學人寫書，
大爆飲食界嘅黑幕、踢爆同行點樣將啲過期食材泡製成為美食。
又估唔到俾佢打出一條血路，
唔單只本書賣得，仲有電視台搵佢主持烹飪節目。
但係名成利就嘅同時，佢老兄亦都成為其他同行嘅眼中釘。
頁:
[1]