名人博客 陸羽仁 (每日更新)
期權攻略（３） 2007/4/30 上午 09:41:49網誌分類: 經濟
講到期權，惹起各位有經驗有研究的網友回應，大頭仔自己有做開期權，我相信佢最Pro(其他無經驗的網友睇吓好了，未認識清楚唔好模倣)，就從大頭仔沽１９０００點的認沽期權，收取９３點期權金講起。
網友S2000講自己無貢獻，我認為千祈唔好咁講，你唔明敢去問已經係一種貢獻，讓我知道網友明白多少，S2000 有少少分唔開期指和期權；大頭仔話沽一張１９０００點的認沽期權，他講「期權」（option），不是期指，若沽期指，做價會好貼近恒指現價，恒指上週五收２０５２６點，下個月期指造２０３４７點，低水１７９點（部份由於藍籌股除息因素），期指下月只得一個價，就是２０３４７點，所以沽期指不會沽到１９０００點這些低價。
大頭仔是沽認沽的期權，期權每２００點一個位，每個位同時有「認購」和「認沽」的期權，例如有２０４００點的認購和認沽，有２０２００價位、２００００價位、１９８００價位，餘此類推吧，每個位都有人開價，你想像一下就如一隻股票的put 輪和call輪，不同窩輪有不同的行使價，情況亦都是一樣。
大頭仔沽的是１９０００點的認沽輪，以期指現價２０３４７點計，距離他沽的期權水平１９０００點，差距１３４７點，是極價外的期權。換句話說，恒指在下個月不跌到１９０００點樓下，接他貨的對手，買入這份價外認沽期權，並無行使價值；通俗點講，恒指若不是大跌，大頭仔都唔使驚，因為一般恒指一個月好少跌過１０００點（股災當然是例外）。
若到５月底期指和期權結算日，恒指收在１９０００點樓上任何一個水位，大頭仔沽出的期權都沒有行使價值，對手不會行使，大頭仔便吃掉了９３點的期權金，扣除一買一賣約３點的使費，大頭仔賺了９０點，以每點５０元計，他袋了４５００元。由於他是在期權「沽」的一方，風險無限但獲利有限，他獲利只是殺盡期權金，不會因為５月底期指收２００００點而收到１０００點的差價。就好似有人搭飛機買１００元旅行保險，大頭仔等如做保險公司，那個人落機無事，大頭仔殺盡保費，佢唔好彩撞機哲人其萎，大頭仔就要賠錢。
你聽落會覺得咁樣執４５００元都好易，不如我都走去沽吓期權，咁樣好過番工呀！不過大頭仔沽期權，等如坐落做莊一方，係好專業的行為，相信他亦做慣做熟，好識風險管理。你一條新仔行埋去做，不但要放低幾萬銀按金，而且期指一跌，經紀會一路催你補孖展加按金；若果好衰唔衰，你一做就遇到股災，一個月跌４０００點，大頭仔見大市跌５００點時可能己斬纜走咗，你遇到跌市就一路補倉守到月尾，假設５月結算價是跌４０００點到１６３４７點，你沽的１９０００點認沽期權，對方按１９０００點行使，計及１９０００點至１６３４７點的差價，你輸２６５３點，每點５０元，盛惠１３．３萬大元。這是一個以大博小的遊戲，沽出期權者能吃的只是少數目，但他贏的機會好大，只宜好熟悉市場的專業投資者或大戶來玩。
希望大頭仔不要介意我拿他來做例子，我相信他能吃掉９３點的機會有９７％以上，我只是危言聳聽，叫不懂期權運作的散戶不要盲目去跟。
這裏又要講一個再深一點的問題，對期權無興趣者可以不看。有人講起究竟沽出認購期權的風險大（負正得負，等如睇淡），還是沽出認沽期權的風險大（負負得正，等如睇好），我經常講所有沽期權者都要冒上「無限」風險，網友Pasu補充，話只是沽出認購期權有無限風險，沽出認沽期權風險有限，Pasu係咁講「陸SIR 已經講過SELL PUT既風險(SELL PUT風險並非無限, 因股價最多跌至0), 但係SELL CALL就真係風險無限, 必須對沖.(試想你如果20蚊SELL左港交所CALL, 結算時港交所升到80蚊, 60蚊差價乘槓桿...)
「以匯豐來說SELL PUT 理論終極風險係144行使價跌到0, 你SELL 十手, 可能係幾萬蚊既投資, 但輸到盡時要賠10手X400股X144=約60萬), 匯控穩陣其實唔駛咁驚. 但如果玩其他上落大既股票既期權, 近價SELL PUT 之餘 最好加個 價外 LONG PUT對沖, 成本會高左, 但係就算911, 匯控跌到70蚊都唔駛驚。」
Pasu提出的是學理上、或者是數學上的定義，數學上沽出認沽期權的風險的確不是無限，例如沽１９０００點的恒指認沽期權，理論上恒指最多跌到０點，每點５０元，即是沽１９０００點認沽期權，最多只是輸哂１９０００點，即是輸９５萬元，不是無限。但若沽認購期權，理論上恒指可以升到無限咁高，所以沽認購才是無限風險。
不過在現實生活裏，以恒指期權為例，一個月的升跌有限，而根據往績看，股市或股價短期內的下跌幅度，往往比上升幅度為高，若來一個股災，一個月跌５０００點不出奇，但即使是大牛市，一個升２０００點都好誇張，以８７年跌市計，幾日跌就跌三成，以現在的點數計，等如要跌６１００點，即是恒指要跌到近１４０００點。所以恒指期權的專業老手，現實操作時，若沽出認沽期權時，會比沽出認購期權審慎，會做多少少對沖。
若你睇完成篇文，仲係一頭霧水，亦唔知我為什麼講期權，我就勸你唔好炒輪啦，因為窩輪就等如期權，你唔明白期權的道理，又點去炒輪呢？
後記：明天五一假期，網誌暫停一天，歡迎網友留言。
陸羽仁
頁:
[1]