阿布炒起個市

Jeans

阿布炒起個市
「三奴」身價15億誰與爭鋒？
23/06/2005


每逢暑假期間，都係球會掃貨增強實力時候，要爭，一定要爭最好球員，而且仲要有把握。其實於今年一月轉會市場重開期間，已經不斷傳出球員轉會新聞，不少傳聞令人信以為真，但像霧像雨又像花，都幾難捉摸。不過，當中梗有幾個搶手貨，不少球隊要增強前線能力，爭「鋒」情況最熾熱，尤其「三奴」羅賓奴、阿祖安奴及基拿甸奴更轉會市場最搶手，估計三人身價總數接近十五億港元，球員身價咁誇張，真係要多得阿布拉莫域呢類超級大老闆。  

車仔皇馬入市積極
  

一個「新比利」綽號，羅賓奴被奉若神明，山度士一向係出產高質素球員保證，球會生存之道就係訓練球員變賣，車路士及皇家馬德里最出得起錢，羅賓奴爭奪戰早於今年一月已展開，邊隊係贏家仲未知。

阿祖安奴同基拿甸奴一直都係皇馬羅致對象，事實上，皇馬確擁有比其他球隊優勝之處，因現任皇馬技術總監沙基做過帕爾馬總監，曾與兩名前鋒共事，兩名球星亦曾開口向他送秋波，成事機會最大，不過始終要面對車仔老細阿布銀彈攻勢。阿祖安奴及基拿甸奴兩位年輕射手亦係阿布目標，總之用幾多錢都冇所謂。雖然國米極力唔想出售阿祖安奴，但呢個「金錢鬥爭」未到最後都未知鹿死誰手。  

謝拉特好難撬走
  

除以上三件搶手貨外，貝迪斯祖亞昆傳出離隊傳足一季，今夏應有定奪，而新進英格蘭國腳胡禮菲臘斯亦係多支球會爭奪目標，但只限於英超球會，其身形其他聯賽始終太輸蝕。另一名搶手貨肯定係「紅軍」隊長謝拉特，所有頂級球會都對佢虎視眈眈，不過，佢已經發表效忠宣言，而且利物浦講明唔會放佢走，要打佢主意，真係要用多誠意（金錢）先得。  

數胡力強阿祖安奴
  

估計身價：8.4億
位置：前鋒
年齡：23
現力球會：國際米蘭
搶購球會：車路士、皇家馬德里
賣點：入球能力超卓

多次傳出與國際米蘭練文仙尼不咬弦的阿祖安奴，其實初時由帕爾馬轉投國米時，阿祖安奴仍未坐穩正選位置，直至去年美洲國家杯以一己之力帶領巴西奪得冠軍，並取得賽事神射手，返回國際米蘭才慢慢成為必然正選。今季為國米射入十六球，成為球隊神射手的阿祖安奴，卻因為脾氣問題及自視過高，與練文仙尼有爭執。不過，其過人的射球觸覺及過關斬將能力，令阿布拉莫域肯出六千萬鎊天價作出收購，但值唔值呢個咁得人驚價錢，就見仁見智囉！  

「新比利」羅賓奴
  

估計身價：3億
位置：前鋒
年齡：21
現力球會：山度士
搶購球會：車路士、阿仙奴、皇家馬德里
賣點：「新比利」、朗拿甸奴指定接班人

力巴西甲組聯賽球會山度士的羅賓奴，被譽為繼朗拿度、卡卡及朗拿甸奴之後，巴西新一代超級新星，更被冠以神聖的封號「新比利」。

「新比利」同「新馬納當拿」不同，後者已經用到相當濫，反而被尊稱為「新比利」的球員，在巴西球壇中能有幾人？事實上山度士上屆能夠稱王巴西甲組聯賽，羅賓奴作用不可取代。有不少球評家更坦言，沒有了羅賓奴的山度士，再冇爭霸本錢，羅賓奴單天保至尊的位置可見一斑。

羅賓奴天才橫溢，自然引來歐洲各大球會垂青，其中以阿仙奴最感興趣。由於伯金年事已高，雷恩斯又未能適應英超生活，羅賓奴自然成為他們的首選目標，估計叫價更高達近三億港元呢！  

天生射手基拿甸奴
  

估計身價：3.5億
位置：前鋒
年齡：22
現力球會：帕爾馬
搶購球會：祖雲達斯、皇家馬德里、車路士、曼聯
賣點：天生射手，在任何一個位置都可以取得入球

帕爾馬出產過蘇拿及基斯普等巨星，目前陣中亦擁有一粒天王巨星，就是射手基拿甸奴。該意大利新進國腳協助帕爾馬在意甲護級附加賽擊敗博洛尼亞，一般估計算是功成身退，轉會事在必行，引起各大富豪球會瘋狂搶奪。

基拿甸奴今屆射入二十三個聯賽入球，響射手榜排次席，又是意大利國腳，自然不甘心屈就在帕爾馬。基拿甸奴較早時已明言，希望有朝一日可以加盟皇家馬德里，同相識多年的皇馬技術總監沙基再度合作，其離隊意圖相當明顯呢！

雖然皇家馬德里暫未作出表態，不過曼聯對於這位射手似乎極感興趣，有報道指，費格遜有派球探觀察基拿甸奴的表現，看來相當認真！除了曼聯外，應屆意甲冠軍祖雲達斯亦有意羅致基拿甸奴，用作取代可能離隊的查斯古特。

zz1988

十五億港元...

kakeidevil

以本傷人.....正x街@#$%^&

Ahchi

佢真真正正擾亂市場,或者呢種手段令佢有今時今日既身家,但往往只去做損人利己的事!

abcde1918

嘩!十五億港元

cwc_tkd

咁樣球壇會繼續健康發展ma?