焗爐做燒肉 為公爵夫人創沙拉骨

ellen520

容記小菜王老闆易偉容接受訪問，劈頭第一句便說：「我做埋出年就唔撈啦，好鬼死辛苦，全港有咁多錢你賺唔晒，我怕自己冇命享，得閒放狗，同班老友吹水好過。」這天，他穿了一件白色短袖衫，一坐下來便展開手臂，向我展示自己的「戰績」，「做廚經常被滾油彈到、被刀切傷，身為師傅呢啲經歷少不免，整傷咗貼塊膠布又去開工，張張金牛都有血有淚。現在年紀大，職業病周身骨痛，唔食藥頂唔住。」曾為米芝蓮美食推介的餐廳之一，兼在2003年及2006年獲亞洲《華爾街日報》選為亞洲最佳食肆之一的容記，現進入倒數階段，年半後將結業。

易偉容，人人稱他容哥，也愛稱呼他牙擦容，他人如其名，說話總是七情上面，「衰在我寸得起呀，全香港有邊個好似我咁，用焗爐做燒肉，做到層皮卜卜脆，容記燒肉有幾靚，係人都知啦。」之後又說：「沙拉骨都係我原創，現在賣到通街都係，但好多人做到個醬嚡烚烚，味道酸到呢..... 你試過我做嘅沙拉骨，就知有幾把炮。」一碟菜式的味道，與廚師個性和閱歷有密不可分的關係，身為元朗圍村人的容哥原是點心師傅出身，1978年跟隨師傅去菲律賓當總統御廚，一做便近十年，容記招牌菜的燒肉、沙拉骨便是那時所創。「有日，英國約克公爵夫人莎拉到訪，馬可斯總統喺屋企請客，唔通煎條鹹魚畀佢食咩，咪試吓做啱西方人口味嘅菜式囉，試吓將沙律醬淋喺豬扒上面，效果唔錯噃，後來索性用埋沙拉夫人個名，改名叫做『沙拉骨』囉。」這菜最大賣點是醬汁，用非現成沙律醬，醬汁經容哥自家調製，沙律醬加入了煉奶、芒果汁，再放入攪拌機打勻，入口更滑。

http://hk.apple.nextmedia.com/realtime/supplement/20140514/52472950