偉大的字幕組 冇錢都照做

岸鳩男

無名英雄




依家網上好多日劇、韓劇、美劇、動漫都有加上中文字幕，好方便。其實都要多得字幕組嘅功勞，大家又有冇了解過點解啲字幕咁快譯好？佢哋又係咩人嚟？

字幕組係指一班幫外語電視節目或者電影加上中文字幕嘅人，而家喺內地非常流行。最有趣嘅地方係字幕組大部份成員係義工，唔收錢， 又或者只係收好少好少。有趣嘅係，好多字幕組成員，本身唔係做翻譯，有人係心理醫生，有人係警察，更多嘅係學生！

不過咁唔代表佢哋質素參差，有位字幕組長係大學新聞系學生，語文能力有返咁上下，都話要考3次試先加入到。考試分咗2份卷，首先要佢喺指定時間譯好份劇情簡介，再要佢即場譯一集美劇《老友記》，難過見工！佢哋製作字幕係出於對作品嘅喜愛，目的唔係錢，而係傳播作品比更多人認識，分享俾所有人。亦有人係想出國讀書，想喺字幕組練好英文 - 的確有人因為參加字幕組，喺高考考得非常高分。

字幕組成員主要都係網上聯絡，佢地嘅分工可以分為 -
片源(搵節目來源)
翻譯
校譯(校對，修改)
計時(處理翻譯字幕同對白時間嘅問題，例如對白講5秒，字幕要30個字，就要將字幕縮短，或者分成2句)
特效(處理字幕效果)
後期(包括將檔案壓縮、發佈給網友下載，同埋監督成個流程)。
有時一個成員可以擔任多個職位，而整個過程大概需要5至7個小時。

早排《來自星星的你》大熱，各個字幕組就好似武林大會咁，鬥快完成，務求要3小時內完成！但係埋單收到幾多錢？每人唔夠20蚊人仔！

睇字幕組嘅出品，都會見到「本作品僅供個人交流學習，請於下載後２４小時內刪除」呢句嘢，點解？因為根據內地法例，如果係個人製作、非牟利同以學習為目的而翻譯節目字幕，係唔觸犯法律嘅，所以佢哋都要戴吓「頭盔」。但係發佈作品本身已經係侵犯版權嘅行為，所以真係好多灰色地帶。

Philipli

Thanks!

weimin

True HERO

Tenny仔

真係佩服佢地