單身過聖誕自救手冊

地溝男

  


寂寞不是病，寂寞起來要人命。尤其大時大節，一出街就見到一對一對又攬又錫，何必要折磨自己呢？ 但匿埋響屋企只係逃避現實，問題無解決㗎喎！過一個 lonely christmas 唔緊要，但萬一你放棄咗自己，以後都係 lonely christmas 先係最大問題。嚟啦BB，同我一齊裝備自己，積極面對，出年聖誕響街又攬又錫嗰個可能係你！
宅男 / 女
宅，只係一個選擇。就算你鍾意嘅係動漫、cosplay、BL、男女僕……唔等於你就要窩響屋企。既然今年無人欣賞你嘅嗜好，一於響聖誕上網識多啲同你一樣自己過聖誕、單身嘅宅男宅女。千祈唔好為咗有拖拍而掩飾自己嘅喜好，世界咁大，你總會搵到有共同興趣嘅另一半。
女強人
你話個世界幾唔公平呢？男人只要高薪厚職薪高糧準，就算幾醜樣都總有狂蜂浪蝶響身邊彳亍咁轉。但女人呢？ 只要高過 senior management 級數，就會被人覺得你事業心重！古肅！倔強！ 甚至響背後笑你老姑婆…唔好嬲住，我企響你嗰邊㗎。既然同 grade 嘅男人都覺得襯你唔起，去盡啲，target 嫩口嘅靚仔吧啦！姊弟戀好正常之嘛，趁聖誕假起晒公司 junior 「o靚」仔嘅底，響社交平台add晒佢地。後生仔血氣方剛，對大姐姐多數都抱有你估佢唔到嘅幻想。而且「o靚」仔潛力無限你又一副旺夫相，今日做 junior 幾年後可能係CEO呢！你睇王菲…
第X者
莫講話第三者，今時今日啲男男女女關係咁複雜，隨時臨近聖誕先發現自己係第四、五、六者。聖誕大餐輪唔到你，平安夜更加唔駛諗，想二人世界可能要排期排到農曆新年。但人，始終要食飯，既然無燭光晚餐，趁聖誕假自己煮囉！唔識就學，仲要影埋相，post上網，寫埋blog，總有一日，你會吸引到一個專一嘅住家男欣賞你嘅廚藝，兼幫你洗碗。