「海景大Canteen」

tlkwan

一則都市傳聞：位於尖東某酒店的中菜廳「海景大Canteen」在較早前獲得米芝蓮一星，上下員工高興都得哭出來……哭？唔係卦？跑去向公關美女Cecilia和總廚梁輝雄查詢，他們都幾驚訝：「吓？點會有咁嘅講法？」哭崩長城的方法演技還是留給分豬肉分到大大嚿的樂壇歌手去演譯，拿取一粒明正言順、國際認可的星星，只須笑到四萬咁口便可以了。

香港的米芝蓮得主，有些大鑼大鼓，有些默默無言，「海景大Canteen」則在中間落墨，做一些宣傳，並舉行「與星共聚」晚宴答謝報章雜誌飲食版記者一直支持。

驟聽起來，這次「與星共聚」晚宴像電視台常報導的慶功宴（如果得咗）或慰勞宴（如果衰咗），都是圍威餵大食一餐，不過今次真是好認真兼好有Heart，招牌菜式如蜜汁燒鳳肝、明爐臘腸卷、鴛鴦東星班、陳皮沙薑煎雞和正到暈的家鄉煎茶粿全部出齊，還像結婚擺酒般播放DVD，介紹梁師傅工作生涯、夫婦生活及手足情深，梁師傅本人更逐檯敬酒、道謝和拍照，全場氣氛好高漲。

最匪夷所思的，是竟然共有53位飲食記者出席晚宴，羡慕死全港酒店公關。街外人有所不知，要請飲食記者吃飯是並非想像中容易，因為大家都好忙，而且經常都吃免費飯，食少幾餐根本唔稀罕，甩底、遲大到司空見慣。今次檯檯爆滿，證明大家是專程跑來、真心戥廚師高興，所以當晚梁師傅真的感動了，但沒哭。