Rubyの創戰紀............呀, 唔係, 係戰創紀先啱........
前日晏晝, 兩公婆百無聊賴; 正當諗住趁機會偷偷入書房上網之際, 雄霸失驚無神話不如去d 未去過嘅地方.......
我當時就諗: 夜總會呀??? 唔知有無茶舞喎~
邊有咁理想吖......結果上網嘅係佢, 唔係我..........
10分鐘之後, 雄霸問我去過官塘嘅APM創紀之城未......
"哼! 您老公我腳毛遍天下, 香港仲要係我家鄉之一, 油尖旺三環四灣老蘭等等地方對我簡直如數家珍, 依家我地仲要住紅磡添! 區區APM......我就梗係未去過啦!  " "係!? 咁我地要去吓喇老公~ "
"哦.......不過我想睇睇地圖點行先......" "唔駛啦, 我地搭的士去物得咯~ " "唔洗會臭喎.....我又無話唔去, 又咬人!!! "
於是, 一個鐘頭後, 兩隻懵炳踏上征途, 往APM 進發.
印象中我應該去過APM 一兩次, 商務性質....純行街街又真係未去過喎. 去到APM 唔係太多人, 可能未到放工時間啩, 地方都幾大商舖亦好多, 雄霸就同我第一時間行去詢問處拎商場指南(體諒吓我地兩隻自由行啦.... ), 點知......搵嚟揾去都無嘅? 過咗一分鐘左右, 詢問處嘅姐姐終於見到兩個形跡可疑嘅人喺度望嚟望去.....道明來意之後, 佢喺櫃桶拎咗張商場指南比我......唔係咁珍貴吓話!? 可能佢都覺得太搞笑, 所以佢都忍唔住講: 平時都有好多放喺臺面咖, 不過好快就無晒, 仲要係老人家拎最多......都唔明d 人要嚟做乜?
呢個謎我就真係唔識解, 我淨係見到呀雄霸已經快放拋離我廿幾個身位, 講句唔該後就急追.......
我都唔記得行咗幾多間舖頭, 淨係知隻左手不斷由褲袋拎嘢比人, 人地就不斷將一袋二袋交到我右手.....
我決定交一篇論文去兢逐諾貝爾獎, 題目係: "不論高矮肥廋幾多歲有無大肚, 只要係行街買嘢, 女人就唔會累"
正當我奄奄一息之際, 雄霸終於要停低........她, 停下來了!
食‧雪‧糕!!!
原來佢見到"爸爸加佬"
"喂! 據聞您唔食得咁多生冷嘢喎......... "
"一杯吖....... "
"NO! 其他就可以"
"少少吖......"
"NO! 其他就可以"
"一啖吖........"
"邊有一啖雪糕賣咖.....NO! 其他就可以"
都算佢聽話, 無食雪糕, 不過就食咗5啖唔同味嘅蛋糕.......即係話我食咗5件蛋糕!
唞咗一陣, 繼續.
我話不如睇睇有無hourly locker, 放低d 嘢先.........搜尋完本指南後, 結果完來係無嘅!
咁就大鑊, 點拎喎?
呢個時侯, 雄霸好叻咁講: 不如我地買部手推車吖?
"吓!? 咁您教我去邊度買喇.......? "
於是我決定去搵呀詢問處姐姐幫手, 好彩佢都好好人, 叫我交低比佢, 仲話佢10點收工........不過我唔明點解要我話比佢聽我叫乜名電話幾多號呢? 佢都比咗張紀錄紙我啦, 唔通我會走咗去唔要d 嘢咩.....
當時已經係5點幾, 人流開始多lu,
但係, 我地嘅主角-----雄霸, 點會比區區人流嚇倒? 佢仍然不屈不撓咁去掃蕩佢認為要剷除嘅目標!
咁又一個鐘.....
"老公! 我想食牛扒! "
"ZZZZZZzzzzz......."
"老公! 我要食牛扒! "
"......唔? 呢度係邊度? 您係邊個? ET返咗火星未? "
"老公! 我要食好好味嘅牛扒! "
"係喇係喇, 返canteen (屋企隔離間酒店, 因為太熟又方便所以我不嬲叫佢做 canteen )食定其他地方呀大帝?"
"呢度唔知有無呢? 我懶行呀! "
"您懶又點止係行吖......打開份藏寶圖望吓先啦~ "
咦...........無嘅!!!?
成間APM 咁大, 竟然無扒房????
真係中西意日都齊, 係無扒房喎, food court 唔計呀吓.
望完又望, 結果終於有發現, lobby 上一層1號舖, 有間扒房, 好似outback 嗰種, 應該ok 嘅.
於是兩件懵炳就好開心咁跳入去喇.........災難, 亦終於開始喇.
一坐低, 個waiter 就好熱情咁講: "今日廚師推介---澳洲和牛肉眼".
啱喎, 開正雄霸嗰瓣.
"生蠔方面就紐西蘭, 澳洲同??? (唔記得lu....) "
雄霸一聽到生蠔, 已經雙眼發光.
"老公, 我要龍蝦湯! "
"酥唔酥皮呀大帝?" 佢最鍾意篤酥皮, 話好玩喎......至弊篤開就唔多點食塊酥皮, 結果餐餐都係我, 唉!
"酥呀酥呀! "
見佢頭先咁乖唔食雪糕, 所以叫咗兩隻紐西蘭蠔比佢, 肉質甜d 同厚d, 但就比較細隻, 始終都係生冷嘢嘛, 少食多滋味啦.
好! Ruby 姐嘅晚餐如下:
頭盤: 紐西蘭蠔兩大隻+海鮮酥皮盒(一半)+炸蝦籃(一半)
湯: 酥皮龍蝦湯
主菜: 澳洲和牛肉眼(8oz), 5成熟
甜品: 未叫
咦? 我呢? 未諗添......
好簡單啫, 邊駛諗喎~
頭盤: 海鮮酥皮盒(一半)+炸蝦籃(一半)
湯 : 周打海鮮湯 (另加Ruby 姐賞賜酥皮一大塊)
主菜: 澳洲和牛肉眼(8oz), 4成熟
甜品: 未叫
蠔我就唔係好狂熱, 所以無食, Ruby 試過就話都幾好夠新鮮, 買手應記一功.
海鮮酥皮盒, 炸蝦籃同兩個湯都不過不失, 無乜特別, 價錢唔係貴就無謂苛求喇.
點知, 一到件牛扒就出事.
我就不嬲都唔要任何醬料, 如果食嘅時侯有粗鹽比我落嚟吊吓味就最好; 但個waiter 話佢地無, 都唔緊要, 預咗. 件扒新鮮就得喇.
一切落去, 已經feel 到過晒火; 再望一望, 簡直係welldone.
肉眼喎........welldone 嘅話就已經同牛肉乾無分別.
唔出聲, 放入口先算......原來澳洲和牛同一般茶餐廳嘅早餐牛扒係可以無分別嘅, 唔知佢澳洲邊度鄉下呢?
抑或係個廚師控制火侯嘅程度, 已經可以將和牛嘅質量轉化到一般街市牛咁嘅境界?
我已經唔敢諗Ruby 姐會點, 只係好努力咁去切切切......希望只係我嗰份先咁離譜.
"老公........"
"如果唔啱食您比我食啦, 我地返canteen 再食過....... "
"呢d 係乜牛扒嚟咖!!!! 咁叫5成熟!!!?  "
我望望佢嗰份, 同我嘅係一模一樣, 都係牛肉乾.
大鑊!
"老公您嗰份都係咁呀!? 太過份喇! waiter! "
"??? "
"你同我睇吓, 呢d 叫乜? "
"澳洲和牛肉眼吖嘛..... "
"頭先我先生同你點講? "
"小姐你5成, 妳先生4成吖嘛....... "
"咁你話比我聽呢d 叫幾多成??? "
"呀........... "
"究竟係你地個廚師無睇清楚定係你無寫清楚呢? 我完全唔覺得呢d 叫牛扒! "
"哎.........我即刻叫廚師再整過吖...... "
"點整呀?! 生過頭嘅就話煮熟d 啫, 熟過頭嘅點煮返生呀!? 即係要重新煮過啦! 20分鐘後先食呀?! "
"係........係呀......... "
"呢兩份跟住你就丟, 我先生唔鍾意浪費食物咖! "
"so.....sorry........兩位唔好意思........ "
"你呢度有無意見書? 我要一份! "
"有有有.....請妳等等! "
我嘅右手邊有對小情侶, 除咗呆望之外, 都無乜表情可言......
我都無機會搭嘴, 因為呀Ruby 姐嗰股氣太強喇, 所以我只有默默耕云咁去清理份牛扒........
"老公您唔駛唔開心咖, 我唔會浪費食物咖 "
(佢一路切, 一路將d 牛扒叉向我個口.......)
"唔......唔.........老婆, 唔駛咁勞氣啦, 牛扒之嘛, 又唔係貴唔好咁苛求啦.......... "
"唔係價錢問題, 係個廚師問題! 連煎一件牛扒呢樣咁基本嘅條件佢都掌握到咁, 一個門外漢都仲可以整得好過佢! 佢根本就無尊重過客人! "
(佢一路講一路仍然將d 牛扒叉向我個口......)
"唔......唔........您講得好啱...... "
"而且百幾二百蚊一件8oz 牛扒佢亦唔見得係平, 收得咁嘅價錢點可以比d 咁嘅質素人食!? "
(繼續餵緊我食牛肉乾.........)
"唔......唔........您講得好啱....... "
與此同時, 個waiter 早已經企咗喺度聽住Ruby 姐訓話同睇緊佢點餵飼"野生動物"........
終於, 我食咗16oz 牛肉乾, 亦開始後悔點解會望到呢間餐廳.
當個waiter 恭恭敬敬放底張意見書嘅同時, 我嘅左手邊嚟咗對情侶, 女嘅有80% 似小澤瑪利亞! 但個男嘅就唔似家滕鷹或者朱古力波向井..........蝦, 哥哥仔真識食, 唔知佢同女朋友親熱嘅時侯覺唔覺得止自己好似AV 男優上身? 又唔知佢地平時兩個係唔係淨係睇小澤瑪利亞嘅呢.....?
我飽得滯胡思亂想嘅時侯, Ruby 姐就當然寫緊佢嘅驚世論文啦!
我亦趁呢個時侯埋單, 700蚊左右, 坦白講係原全唔值嘅.
"老婆您唔駛寫咁多吓話......d 英文用字唔好咁深呀~ "
"我寫中文喎老公.... "
"吓!? 中文!!! "
"係呀..........我好不滿呀! 問佢地醜唔醜呀! "
我望吓張意見書.........基本上如果個負責人真係會睇而又睇得明全部嘅話, 我已經當佢贏, 因為佢已經受到最大懲罰.
"嬲夠就去滿記食糖水好唔好? "
"好呀! 我要食布甸同pan cake! "
"okok, 行喇大帝~ "
當寫完晒, 兩公婆起身走嘅時侯, waiter 叫我地唔好走.
"食埋甜品先啦, 我地餐廳致歉送甜品比你兩位...... "
"無興趣喎! 你地送我都無興趣食, 我地去食滿記! "
"我地真係誠心致歉想..... "
"你地d 甜品我唔覺得會好食! 我老公同我去食滿記仲好味! " "好喇, 行喇大帝~" 同時, 我亦同個waiter 講咗句"唔好意思", 因為錯嘅實在唔係佢......
態度呢, 係就係囂得幾誇張, 不過我鍾意.
呢個小霸王真係有個老公就乜都話知佢咖喇, 難怪岳夫都忍唔住話服咗我, 收服到佢個大少姐, 我就話係互收先啱~
好似今次咁, 佢講嘅說話亦唔係無道理, 句句都入晒; 諗深一層, 其實不知不覺個老婆都成熟咗好多, 唔再係小朋友喇.
但係呢, 我都係堅持一樣嘢.........."不論高矮肥廋幾多歲有無大肚, 只要係行街買嘢, 女人就唔會累", 我拎嘢上的士都拎到仆街咁滯!!!!
|
發表於 2011-1-7 01:10 PM
| 
成碗泡, 內有大量抗生素
發表於 2011-1-7 05:36 PM
| 
