阿BOB入行15年忽然感觸落淚，yahoo33 有乜感受?
 
近年無論睇電視、聽電台、睇廣告、甚至去婚禮同公司周年晚宴，都成日見到BOB林盛斌嘅身影，真正做到「這裡有你那裡有你……」真係緊有一個BOB喺左近。好多人佩服佢轉數夠快、襟撈、做到面面俱圓，但唔少網友對佢有無限批評甚至人身攻擊時，BOB一樣坦然面對，有時間嘅仲逐個留言回覆。呢日佢忽然寫下長文：「不經不覺，今日，係我入行15年。」
BOB近年嘅工作量可以用相當嚇人嚟形容，齋睇佢Facebook分享，真係一日有72小時都唔夠用。喺觀眾面前永遠以開心果形象示人嘅BOB呢日忽然感觸起嚟，原來03年4月1日，正正係佢入行嘅日子，剛好來到第15個年頭：「回想自己過去咁多年，無論係電台、電視台、電影到出面撈嘢，做主持、做司儀為咗有效果、為搞氣氛，通常會去玩吓人、笑吓人、寸吓人，搗吓蛋，拍劇拍戲做d角色唔係仆街，就係冚X剷，又成日扮鬼扮馬、核核突突、肉肉酸酸咁，自己又冇樣冇款冇才華，淨係聲大大冇貨賣，講真，真係未必個個都會接受同鍾意。」
就咁上網搜尋「BOB林盛斌」，大家不難發現唔少批評聲音，夾雜粗口之餘仲鬧晒佢全家，呢啲留言其實BOB都一一睇到，有時仲會逐個回覆：「有時都會心諗：嘩，咩事咁大仇口呀？好彩嘅係亦有好多人喺唔同嘅平台留言支持，好多喺街度見到會同我友善打招呼合照……寫到呢度突然有少少眼濕濕..... 其實，真係好幸運，好感恩有你哋，衷心，感謝曾經為我打過氣嘅每一位，亦感謝曾經打擊過我嘅，因為你哋，亦令我好好反思自己，繼續推動自己。我知道冇可能取悦所有人，我只好盡力去做好自己。」 |
發表於 2018-4-1 05:25 PM
| 
