[股票經營] 小孩講股：11/05/07 秋官效應 vs QDII效應

笨小孩

小孩算盡天機，不過點都算唔到秋官會再現三色台，套野都未做已經搞成咁，都唔知個節目會做幾耐假，點算呀？真係唔好唔信邪，秋官效應真係好邪，遠既唔講，三月份無記重播秋官套劇，個市就即時狂插，直到劇終(定腰斬？)，秋官一去，股市歸來，如今秋官再現，好友想唔投降都唔得…

都係入番正題，母親節就到，全球股市即時有新戲上映，名叫《跌到你呀媽都唔認得》，夠晒應景！小孩上次都講過美股大升浪都有時盡，杜仔同阿爺果邊若突然間跌落黎，香港呢邊實難逃一劫，但係港股明顯落後於美股及A股，有乜可能外圍升果時港股唔升反而跌，到外圍跌果時港股跌得仲甘，咩天理呀？可惜事實就係咁，都唔可以怨天由人…

今日個市跌得好急，唯波幅好細，形成十字星待變，無啦啦整左個突破性裂口，穿晒10天20天線及短期上升軌，雖然技術走勢明顯轉弱，不過而家仲係橫行調整區，呢個裂口多數係普通裂口，估計好快就會回補，下面島形底支持強勁，之前所講逢低吸納策略不變。滙豐今日一開得144.5，相對變得抵買，股價明顯有支持，中石油今日低開回試裂口，股價亦有支持，前者有中東巨資撐腰，後者有新油田及巴菲特唔沽貨消息支持，長遠都對估價有利。股市呢樣野日日形勢都唔同，3/5小孩已話滙豐短期見頂(當時147左右)，連日調整股價已脫離超買區，形勢唔同左，買賣策略就有所改變。


阿爺終於出招救市

【ＱＤＩＩ】券商：擴大範圍對港股影響正面，料內地銀行股可受惠                  
5月 11日 星期五 18:54 更新
《經濟通記者謝潔虹報道》中銀監今日（１１日）宣布擴大內地商業銀行代客境外理財業務投資範圍，包括允許投資於股票及認可股票基金產品。
時富資產管理聯席董事姚浩然對《經濟通》表示，內地擴大ＱＤＩＩ投資範圍，將有利市場氣氛，相信對港股可起正面作用，預料內地銀行股將可受惠。


阿爺呢招真係高明，完全估佢唔到，既有助舒解內地資金犯濫，又有助縮窄AH股差價，更有助舒解港男怨氣，一石幾鳥，正！睇黎呢招一出，下星期五行三保應該會有反映，五行三保都調整左咁耐，尤其工行形成橫行收集區，股價亦相對落後，雖然呢排五行三保走勢強差人意，不過投資組合裡點都會有幾手，之前大跌時唔入就笨，如果爆上隨時痛失良機！

美國杜仔琴晚大跌後，今晚回穩偏好，QDII消息已出，多隻港股ADR都升得好誇張，滙豐升到148，中移升兩蚊，中石化升10%，中人壽升8%…勁！如果今日有低吸優質股，相信下星期會有唔錯回報。


免責聲明：本文純為小孩無聊之作，若對閣下造成任何投資上的損失，實屬不幸！

littlepig

我亦係因為早前有報道中國開放QDII,所以半月前以78.5再入受惠者港交所,今日再買番思捷,等下周恆指再度升上二萬一千點我便放。

另外,我四月$116蚊買左A50(2823),家陣升到仲高過匯豐,呢兩日回番少少,我個人覺得差唔多到頂,心郁郁都想放埋佢,俾你提一提,keep埋下個禮拜先走

kuru

希望如你所願喇, 呢排買咩跌咩, 都失晒信心~