[股票經營] 小孩講股：24/05/07 大市在渾噩中整固

笨小孩

呢排有好多股壇中人出黎發up瘋，繼李+x、四叔之後，格老又話大陸有泡沫喎，搞到個市風雲色變，小孩又忍唔住要up番幾句。


耳聽三分假

李+x話內地有泡沬？咁97年樓市有冇泡沫？當年貪.com,長x生命科技有冇泡沬？有冇出黎叫人唔好買？又話炒股唔會發達，呢句絕對贊同，炒股點夠賣縮水樓，賣油魚賺得多呀？！想發達咁係要跟李+x學野啦，難怪連羊太都問我，點解李生要出黎講呢d野，羊太都知內地有泡沬啦，為乜呀？我話，無他既，月頭大戶造左淡倉，恆指上到高位，點都要“做野”架，唔係點發達呀？ 小孩自問唔會做d損人利己既事，都係炒下股仔，搵餐晏仔就算…另一位李生四叔講野都似番個人，不過佢氹人買龍尾股，個個散戶覺得好似上左賊船囉…要數股壇風雲人物，都係阿格老最利害，退而不休，一句說話已經令內地A仔有所收歛，今日上A跌左廿幾點，仲勁過阿爺發預警！話時話，格老成日黎料又出口術，唔通佢真係當阿伯無到？人地阿伯假假地都係現任FED主席，佢都未出聲，真係唔俾face喎…

講番個市就真係黐黐地，杜仔、A仔果邊日日鬥high，港男呢邊就好似食左“忽得”咁，日日渾渾噩噩，忽忽地，QDII消息只係炒左一日，然後就變左“Kill D師奶”，雖然回試裂口係意料中事，不過o係呢d位牛皮太耐就唔太樂觀，上次提到“山雨欲來風滿樓”，宏調是意料中事，而家風已經吹起左，睇黎好快就會落大雨，下星期期指即將結算，期指轉倉活動會令大市更趨波動。

講起宏調，阿爺玩射箭，三箭齊發誤中港“股”，而家又玩QFII，落重補藥引鱷魚入魚缸，呢招夠晒絕囉，先引鱷入缸，再黎一招缸中捉鱷，阿爺心思真係估佢唔到…玩到咁大，睇黎呢一兩個星期又會有新招出！

藥引 QDII
第一劑藥 三箭齊發
補藥 QFII
第二劑藥 成立外匯投資機構？
第三劑藥 ？？？
... ...


眼看未為真

美國杜仔今晚又喪升，眼前所見係美股日日新高，大陸果邊有泡沬反而唔驚，怕只怕杜仔好快會有技術性獲利盤，到時有四、五百波幅絕對唔出奇，美股對港股影響性絕對驚人。不過，暫時美股造好，當然對港股有絕對優勢，裂口守得住，就可以再次上試高位！


免責聲明：本文純為小孩無聊之作，若對閣下造成任何投資上的損失，實屬不幸！

笨小孩

Stocks gain after home sales advance

New home sales increased more than economists had expected last month, boosting optimism about economic growth and corporate profits.

美國新屋銷售意外大幅上升 美元上揚

But... 大魔又唱魔笛，歐股全面急挫，美股大升百點後倒插

JohnSin

講得好..念法差唔多

kuru

A股係咪泡沫,講真又未必,始終中國係發展中既國家
等如80年代香港起飛階段, 成個中國只係得上海比較成熟D,
其它地方都仲有大把發現空間,而且上海做到全民階股,唔係得
大戶玩晒的話,真係繼續創新高都唔難~

'nice'

話放話放,我D股仔還未放過,唉~

大家樂1234

美股對港股影響性絕對驚人
呢句我絕對此認同