4大聯賽中邊個聯賽o既領隊最有地位?

cwc_tkd

因為4地聯賽加埋成80隊波,
所以不如以強隊為集中討論同比較吧!

英超 : 買賣人話事權主要係比領隊, 而排陣出人方面亦唔會受到太大干涉, (但車仔係有d唔同, 因為阿布成日比意見), 而被炒機會相對較低, 因為球會對領隊好多時都會好有耐性, 好似費sir一教教左20年, 雲帥都成10年, 賓佬都算坐得穩陣.

西甲 : 董事局或主席操控晒買賣權咁滯, 睇皇馬就知, 買咩人領隊根本唔洗知; 巴塞都仲好d, 但成日見d新球員係同主席影相, 英超就係同領隊影, 呢方面就應該反映到文化上差異. 而西甲普遍換領隊都唔算密, 但就會成日傳落台, 特別係皇馬, 所以壓力都唔細.

意甲 : 領隊同主席/會長買人權感覺上似一半,國米就另類少少.. 炒領隊風呢幾年都盛, 集中係中游球隊多, 羅馬, 拉素呢幾年都換左好幾個, 而國米係文仙尼上任前都換得幾密.

德甲 : 睇過一本雜誌所講, 當一隊德甲球隊成績唔好, 第一時間係炒領隊同教練團, 而今季炒領隊數字更係傲視於4大聯賽, 更有1,2 隊波今季換左3個領隊..

所以我諗英超領隊最有地位, 之後係西甲, 意甲, 最慘係德甲領隊..

johnlaisin

講領隊有地位一定係英超
布魯士教到伯明翰降班教無比人炒
白賴仁笠臣咁渣都可以教一隊波咁耐就知
德甲就最差,我記得多蒙特好似一季換3個領隊

iknow

咁查爾頓上季都算係異類...用左3個領隊...

mazingerz

請各位留意一樣野-----領隊manager呢個稱呼只限英格蘭聯賽獨有。
其他聯賽及國家隊都只稱呼為主教練(Head Coach)。

從名稱上可以看到職能的基本分別-----manager可以擁有一切買人，甚至管理球隊及續約權力。
相反其他聯賽會由體育總監甚至球會高層去負責轉回事宜。(正如皇家馬德里係由米查杜域負責買人，蘇斯達及卡比路係唔可以有任何意見。)

至於車路士，艾巴莫域治正正不滿這種制度的存在，當他和摩連奴關係惡化時，曾打算設立類似
體育總監的位置來架空摩連奴的權力(只能教波)，希望全面控制球隊運作。

rfky

所以如果講領隊既話一定係英超
因為得佢係叫領隊