紅魔挫阿積士贏歐霸盃，胡生有乜感想?

地溝男

   

紅魔奪標，悲喜交集！曼聯今晨喺瑞典舉行嘅歐霸盃決賽火併阿積士，憑住保羅普巴同米希達利恩喺上下半場各建一功，最後以2比0輕勝，勇奪冠軍，總算為兩日前遇上恐襲嘅英國曼徹斯特市，帶來一絲溫暖，兼送別22個不幸遇難死者。「紅魔鬼」今次奪標，除咗令佢哋成為今季英聯盃同歐霸盃雙料冠軍之外，仲有係佢哋可以憑歐霸盃冠軍身份，拎到下屆歐聯分組賽嘅入場券，對於首季執掌「紅魔鬼」嘅莫連奴嚟講，絕對係一個成功嘅球季！

雙方賽前為曼市恐襲事件嘅死難者默哀，氣氛凝重。阿積士今戰派出咗平均只得22歲282日嘅正選陣容，成為歷來歐洲賽決賽最年輕大軍，可惜就由於經驗不足，成為佢哋失落冠軍原因之一。曼聯今場開賽18分鐘，就憑保羅普巴喺禁區邊左腳勁射，省中阿積士中堅達雲臣山齊士改變方向入網領先。

之後阿積士主導形勢，傾力反撲，無奈係一眾小將稍為怯場，往往單打獨鬥，一直未能製造具威脅射門，半場落後0比1。換邊後僅只3分鐘，「紅魔鬼」憑一次角球攻勢，由基斯史摩寧頭槌二傳，米希達利恩喺對手力壓下，門前施展倒掛射入，將比數拉開到2比0。

再次失守後，阿積士球員都明顯洩氣，佢哋全場17射就僅得3次中框，亦係一直未能拉近比數主因。「紅魔鬼」末段再有連格單刀起腳太慢被閂走，錯過拉開紀錄機會。完場前兩分鐘，曼聯主帥莫連奴再將隊長朗尼換入，終於保住勝局完場，以2比0贏得冠軍。

集齊歐戰全套冠軍　
撇除社區盾這個季前錦標計算，「紅魔鬼」今季依然在兩項大賽包括聯賽盃與歐霸盃稱霸，成為雙冠王，成績驕人。此外，「紅魔鬼」更藉着今次奪冠，成為繼祖雲達斯、阿積士、拜仁同車路士後，史上第5支集齊歐聯、歐霸盃同已經停辦嘅歐洲盃賽冠軍，歐戰全套冠軍嘅球隊。至於「寸王」亦完成佢個人嘅「金滿貫」，繼03年贏得歐洲盃賽冠軍盃，仲有兩次歐聯冠軍之後，今次都攞埋歐霸盃錦標，認真威到盡呀！

sarmsan

比數ok

電騙男

比數ok
sarmsan 發表於 2017-5-26 09:12 AM

是旦