標題: [轉貼]黃子華棟篤笑３４篇 [打印本頁]

---

作者: 155220    時間: 2006-4-8 02:48 PM     標題: [轉貼]黃子華棟篤笑３４篇

黃子華棟篤笑３４篇

1.愛情
白雪公主，幾咁純潔無瑕。
但係諗真d，白雪公主，識得o個個王子，
灰姑娘識o個個又係王子，
仲有個有特殊嚐好、鐘意錫青蛙o個個女人錫左隻青蛙一啖，
隻青蛙變出o個個又係王子！
有冇人諗過根本個王子係同一個人呢?
根本呢個王子都不知幾花心，周圍溝女。
仲無良到扮青蛙去溝添！

======================================

2.情竇未開
o係我第一次戀愛之前，我認為自己就係楊過。
而我同書裡面既楊過唯一唔同既地方，就係佢有一隻大鵰。
而我o個陣，就鐘意諗呢個相思多Ｄ。
同楊過一樣，我從來都冇諗過要考第一既。
我只需要愛情，只要我搵到我既小龍女，我就可以拋棄學業，退隱山林，搬入新界住。
但係我一定要住出班西班牙別墅，我唔住得村屋，我怕蛇蟲鼠蟻。
然後每個月至多出一次市區，不過我唔會逗留得耐，問阿媽囉完零用錢我就會番番入去。
冇錯，基本上，我由中一至中五都係o係呢種咁超然既思想下度過。
當時學校最流行既辯論題目係：中學生應否談戀愛？
我認為，我地應該辯論既係「中學生應否讀書？」
而o係我第一次戀愛之前，我既小龍女只需要有一個條件，就係靚，我知道我咁諗係好幼稚，但當時我年紀小，唔知道原來身裁都好重要。

======================================

3.性
聖人話:『食色性也！』
食同色，好唔同！
一個人無論幾鐘意食，
會唔會比幾十蚊入戲院睇套『蒸氣騰騰小龍包』？
一個人無論幾鐘意食，
又會唔會為左望一舊冇野包住既牛肉望到俾車撞？

======================================

4.愛情
戀愛唔係PART-TIME，你唔可以話：『愛！做完咪走囉！』
戀愛係一盤生意，你要二十四小時諗住佢。
自己生意，冇所謂PART-TIME 正識。
人地放假或者過年過節，你更加要開OT添。
行花市啦行海旁啦睇戲食飯啦....
你有乜野競爭對手呢？
我冇競爭對手架！
你估你係專利巴士公司呀？
港巴都執左啦！
有冇考慮結婚？
咁就要向公眾交代，咁就即係上市啦！
所以，『中學生應否談戀愛』唔係問題、
問題係『人類應否有兩份全職工作？』
你再拍拖，需要知會你老闆：
『老細，我出面搵左份戀愛，我真係好需要呢份戀愛架，不過公司Ｄ野我會照做，我兼顧到架喇。』
然後你老闆會話：『咁你不如搵多份愛情，咪直情唔洗番呢分工囉！」

======================================

5.新鮮
依家d人溝女，對絛女最大既要求係乜呀?
唔係靚，最緊要，係夠新鮮!
乜野叫做夠新鮮呀?
就係話、溝左一年o個，就唔夠溝左半年o個個咁正。
因為半年o個個新相識，新鮮D。
同樣，溝左半年o個個，就唔夠三個月咁正。
溝左一個月就唔夠半個月o個個咁正。
溝左一日就唔夠半日o個個正，如此類推，終於...
溝左o個件，就唔夠未溝果件咁正！
咁即係點呢??
仲溝唔溝好呢??
一溝就唔正喇!!!

======================================
　
6.女人偉大
黃:係愛情之中,女人最偉大!男人o既犧牲,就為左追求美麗,而女人o既犧牲,就只係得倒一個麻甩佬!而最偉大既係佢地根本唔覺得係犧牲...如果你話俾一個女人聽,喂,你男朋友有口臭!
張:車...人梗有局部缺點o既!
黃:佢仲有臭狐同香港腳喎!
張:咁佢咪好平均咯!
黃:佢鼻鼾聲好勁喎!
張:我男朋友一定係夢見我,我開心.
黃:佢屙尿亂咁啡!
張:好壯呀!
黃:佢唔洗手喎!
張:邊有男人洗手架!
黃:我有!
張:型!
黃:佢重講粗口呀!
張:但係佢心地好!
黃:佢係電梯度食煙喎!
張:公眾場合都唔俾食咯,佢咪呢埋一邊食囉,你地重想點呀!

======================================

7.責任何在?
如果你話我聽,因為我唔靚仔,所以唔可以做戲,
你唔應該話我聽!
因為唔關我事,我唔應該負呢個責任,你應該同我父母講,
係佢地攪成我咁o既.
如果你要罰,應該罰佢地.
以後,邊個醜樣,就罰佢爸爸,媽媽唔準做戲!
或者剩係做茄哩啡!
我唔係一個唔負責任o既人,為我爸爸媽媽果短短一剎o既快感,
我已經負責負左廿幾年.
你估做我好易做呀?
我細個讀書唔好,或者唔合格,我冇要父母負責.
我自己簽晒D成績表o既,
每當我爸爸媽媽有爭執鬧交o既時候,
我有冇叫佢地為左我o既童年著想,忍下對方?
冇!
我叫佢地出街鬧!
我大個左,唔知應該信邊個宗教,唔知做人為嘜,唔知人生事業o既方向都冇要求又母照顧我...
反而係我調番轉頭,提醒佢地:「你地要搵錢呀,積穀防飢呀,唔係第日老來無依無靠呀!」
嘜野都係我!

======================================

8.男仔唔駛靚仔
靚仔係唔係真係咁重要呀?
有D人話男人唔駛靚仔o既,有才華o米得囉.
係,你有冇試過帶你o既才華去落disco識女仔呀?
人地D靚仔一行入去,唔洗二十分鐘,就已經同的女仔互相問問題:「你度定我度?」
我帶住我o既才華入到去,幾難先搵到個女仔肯比個機會我.
唔係比機會我交換問題,而係比機會我天才表演.
唱歌跳舞做話劇講大話功夫表演,成套歡樂今宵一個人做一次......

======================================

9.演戲天份
我從小就知道,我係一個偉大既演員.
人地細個成班細路群埋,鐘意玩扮結婚,扮爸爸媽媽.
我細個,就鐘意扮姦夫淫婦.
但係唔知係o米我個樣比較老實,我係從來都無機會扮奸夫.
每次我都係扮淫婦......既老公.
雖然係咁,雖然,我亦都係全班人之中最細個個.
但係我已經可以將一個妒忌o既男人心態表現得淋漓盡至.
當然,我的朋友個個都讚我,話我天生出黎,就係戴綠帽既.

======================================

10.死亡
細個o個陣,我係唔怕死o既.
我覺得,係以前D人先會死o既.
係歷史書裡面o既人至會死.
好多人唔明歷史有嘜用,歷史o米話你聽邊D人死左囉.
我從來未睇過一本歷史書有提到黃子華呢個名,我點會死呀.
最緊要係,就算死都唔係嘜o野一回事.
細個o個陣隔離陳師奶成日叫佢老公:「咁多人去死你仲唔去死?」
然後去完番o黎,阿陳師奶又會話:「死番o黎勒,唔死多陣添?」
所以我一路都認為,去死,即係去街,同埋一定唔會去好遠.
因為阿陳生每次都好快就返黎o既.

======================================

11.用家炒家
好多人結婚,最初就以為自己係婚姻o既用家....
後來先發覺自己係感情o既炒家,於是想離婚....
但係離婚又要攪幾年,睇住周街都係新盤靚盤,
自己個盤又放唔出,幾難受!

======================================

12.泳池
黃:去公眾泳o個D唔係叫做游水,o個D叫做浸水...因為係公眾泳池游水,只可以用一種泳式,就係彈式,同一個位,彈下彈下....
張:如果係高手可以用式,但係要潛落水底o個度用..
黃:點解D泳池有咁多人?
張:唔好問呀,趁人多你好快浸下...等陣所有人上晒水個陣,你就會發覺,個池的水原來到膝頭哥架o乍!
黃:其實我地香港人都習慣左人多,去浸 o下水都好...但係可惜o既係,呢D水,唔係一般水,呢D係暖水.
張下,o係度屙尿,咁冇公德心!由細到大我爸爸媽媽都教我,急尿,去隔離池丫嘛!
黃:所以我係度,趁呢個機會,同你D靚仔講呀!!游游o下小童走o黎大人池,擒係個池邊,唔好話我聽係學游水呀!
張:特別係擒正係噴水口個D呀!想毀屍滅跡呀!?

======================================

13.改名
改名,只係D父母係將自己o既主觀意願套係D仔女身上...
所以大部份女仔唔係叫美嘜就係麗嘜...
男仔唔係叫阿堅,就係阿強,一唔係就叫阿祥...
咁我地係咪好美麗,好堅好強好長呢?

======================================

14.黑白不明
我非常欣賞鄧小平o既「黑貓白貓,捉到老鼠就是好貓...」
我老友阿雄個老婆生仔,生左個黑人出o黎,我都係咁對佢講:「黑仔,白仔,快高長大就係你個仔啦!」　

======================================

15.鬧人
以前我地笑人,會話:「你有得發達?太陽由西邊出o黎呀!」
依家我地就會話:「你有得發達?建築面積等如實用面積呀!」
又或者話人醜,現在我地都會技巧好多:「你唔醜,你點算醜呀,你係塊面唔多實用咁解o麻...你o既鼻台太大,D眼耳口鼻o米唔見洗o羅!」

======================================

16.失戀
失戀係會令人成長o既...
我失戀之前,一向都覺得世界上所有問題都有答案...
點解我地每日都要8點鐘起身返工呀?
因為夠鐘囉!
點解我地有夠鐘呢樣o野呀?.
因為我地唔用浮動上班時間囉....
點解呢個世界有戰爭?
因為我地有武器囉.
咁點解我地要有武?*r?
因為佢地有武器囉.
一切都有答案,直到我失戀.
阿珍,點解你唔愛我?
阿珍比左一個經典既答覆我,佢話:「愛情係有點解架,係唔可以解釋架,唔好問啦」(記緊這句啦)
如果番學阿sir問我o野都可以咁答就好喇!
黃子華,物体燃燒點解需要氧氣呀?
阿sir,係冇點解架,係唔可以解釋架,唔好問我啦!

======================================

17.隆胸
葉子微簡直為演藝界創下新標準...
以後的女仔想做明星,又唔洗睇樣,又唔洗睇演技,去磅啦!!!(加強語氣)
得入去磅一磅就得喇.....
開黎六斤半,片酬係六千五蚊一日,小姐做唔做???
開黎八斤有疤痕,八千減一千疤痕費,即係7千蚊一日...........
你話幾客觀呢!?

======================================

18.愛滋論
為何無人提及大陸收番香港呢?
其實即是有愛滋一樣,
你係唔係走去驗先,
我驗左你係唔係可以醫番好我先,
唔係架o麻,我咪唔去驗囉,
咪當自己無囉,如果有就等發出來咪死o羅,係咪先?(高半聲!)
同樣大陸要收番香港這問題都係架嘛,
係唔係講下佢會唔收先,
係唔係我帶安全套佢唔收,
我見客又帶,連食飯都帶3個,
唔係啦!!(低半語)
大家來做個大架粒住香港!!
唔係架o麻,你講唔講,
佢要收就收架啦!!

======================================

19.一家和一國兩制
世界上有嘜羞恥得過親娘接返個親生仔o番o黎,然後同個仔講:「阿仔你放心,我地一家兩制架,果個係你大佬!!」
「仆*,人地叫你呀!」 (同大佬講及打大佬o既頭)
「sorry...sorry...有冇嚇親你呀,唔會發生係你身上,我地一家兩制家麻,五十年不變!!!」
你知唔知道一國兩制最偉大既地方係嘜呀??
一國兩制最偉大o既地方就係..佢地都肯認佢地自己個制,真是嚇親人呀!!

======================================

20.放假
黃:一般人都會好珍惜每年一度o既年假!
張:今年我要去夏威夷游下水...
黃:如果你決定去夏威夷,你就要預忖出沉重代價!...前四後六!
張:我講緊係年假,唔係產假呀,子華!(真係呀....)
黃:前四後六既意思係,係你放假之前個四個禮拜,同你放假之後六個禮拜,都要做到仆*!(死未)...因為無論你放幾耐假,你o既o野始終係你做番...
張:係你既始終係你o既!
黃:唔單止,放完假,唔係你既都會變成係你o既!

======================================

21.金勞
點解要帶金勞??
唔帶勞,有乜資格同人講,時間係寶貴?
我既時間點值錢呀?(你話係唔係先)
o拿,支時針圍住行一個圈,12個鐘,十幾皮o野,即係為皮幾o野一個鐘...你一個鐘值幾錢丫?
幾舊水?
我點同你一齊食飯呀,大家時間觀念咁唔同!
唔單止咁,你帶勞,表示你個人有幽默感.
勞力士,有邊個靠勞力搵食o既人帶得起勞力士丫?
越帶勞力士o既人就越表示佢唔洗用勞力!
呢D,就叫做幽默感喇.

======================================

22.女愛情觀
吳:女仔對愛同鐘意有很大既分別,如果個女仔知道個男仔鐘意佢呢,
她都會同佢去o下街,睇o下戲,食o下飯,但想做進一步既野就唔得喇.
而女仔知道個男仔愛她時係絕對可以付出更多.
在女仔心目中,鐘意等於"幫襯",鋪鋪清唔好找我更多好處,
但愛在女仔心中等於"收購",
收購包括"注資",以後"合併"......(係呀...係呀!)
所以女仔要男仔把佢o既愛注資落o黎,把護口注資落o黎,最重要o既係把錢資落o黎.
然後去買 Joyce啦,Panda 啦,Gueeo啦,買到一身都o係,
等佢認為可拱固佢自己既價值,但佢地是絕對無得倒男方o既同意架!!
o拿!!我宜家同你地講呀,你地o既黑箱作業,
很容易破壞男方o既經濟架!!!(你們都很有共鳴o拿)

======================================

23.男愛情觀
吳:男仔對愛就很隨便,愛同鐘意都無分別,
只要佢知道妳鐘意佢,立即可帶妳番屋企,或去妳屋企,
係唔係男仔心中無愛呢?我覺得又唔係o可.
係佢地比其他人更清楚愛o既定義,
愛係乜呢?
根據耶蘇既講法係:「愛係恆久忍耐又有恩賜...愛係不張狂,不大喚,不作害羞的事
忘記別人的錯...」
你話喇作為小小男人o既我地怎可隨隨便便同你講聲愛呀!!
所以以後有人同你講愛,
一就是他講大話(加強語氣),二就是有個耶蘇係你面前呀.
但耶穌主張愛人如己,博愛架!!

======================================
　
24.自重
當乜o野人都唔搵我做o野,
我就知道,我係一個偉大o既藝術家,
在生o既時候係唔會獲得應得o既尊重...
唔止咁,我仲偉大過偉大o既藝術家,因為我知道,
我死後都不會受到尊重.

======================================

25.紅館
依家做歌星,好犀利,因為有紅磡体育館....
因為呢樣o野,做歌星,可以o係一晚...
就賺晒你o地朝九晚五一世人都搵唔到o既錢啦!!
D人話,我真係唔明張國榮點解要退休,(點解?)
佢一晚已經搵左你一世搵o既野,
佢一晚已經做天你一世人要做既野,
仲有乜野可以做呀??
唔退休做乜?
做五場,已經輪迴五次!
做三十場,輪迴三十次......
如來佛祖都話:洗唔洗???
d人話,「唔係既,佢唔捨得退休既!佢最後個場演唱會,佢自己都喊架...」
佢係o咸,不過唔係為自己o咸,o係為左你o地喊呀:「我就退休勒,我聽日就唔洗D喇..........你地聽日仲要番九點,唔好遲到呀!!」

======================================

26.迷惘
o係公司,老闆會同我講:「你番o黎唔係訓就o係去廁所,你當呢度係屋企呀,呢度係公司呀...」
我番到屋企,阿媽又會話:「你仲當呢到係你屋企咩,你番o黎唔係霸住個廁所就剩係識訓!」
咁...咁我番屋企又唔訓覺又唔去廁所,番公司又唔去廁所唔訓,咁我呢Do野去邊到做呀?」
不過後o黎我諗過自己又係過份的o既,於是我就痛改前非....
以後番屋企我就剩係訓覺,番公司就剩係去廁所.

======================================
　
27.居安思危
董建華講左多o野知唔知最o岩係邊句?大家知唔知呀.
最o岩就係:「我地要居安思危,居安地思想危難既時刻。」
呢句野好得意架o可,居安就思危,咁你居危時思乜呢?
你更係更加思危架啦,咁樣居安果時要思危,居危時又思危,
安黎做乜鬼o野呀!!?(係o米先)
我地居安就係唔想思危架o麻,我地宜家居安都要思危,
董建華就話左比你地各位聽:「你地安極有限啦老友!!」

======================================

28.老豆
我一向以為老豆,係option黎o既,附加架咋.
無錯,大部份人係有老豆既,
就正等如大部份既車係有收音機一樣.
但係個樣係option黎之o麻,唔係架架車都有.
所以我細個o個陣好憎Do靚仔成日係我面前話:「我老豆點點點.......」
我覺得o個D人好o西命,就好似你有部車,
不停咁同人講:「我部車開蓬架,大包圍架!」
你不如話:「你老豆開蓬架,用無鉛汽油架.....」

======================================

29.十八歲
點解十八歲先至係合法年齡呢?
因為到左十八歲,係法律上我地就要對自己負責任
多餘,唔通十八歲之前,我地就唔洗對自己負責o羊?
唔通十八歲之前,我就可以隨時撲出馬路:「我唔信呀,我17歲半o乍,你敢撞死我?」
唔通十八歲之前,我o係油麻地踩完個紋身佬一腳,個紋身佬會話:「死o靚仔,你未夠十八歲,我忍你!」
唉,十八歲既最大好處,就係你到左一個合法既做愛年齡...
我想請問,有邊個做愛係因為合法先做架.
我以為大部份人做愛係為左快感同高潮?
抑或你想話我聽,十八歲之前做愛係冇高潮o既.
十八歲之前做愛係白做既!
咁樣十八歲就具有特別意義喇!

======================================

30.中國古仔
每個番去大陸一定有起碼十個故事講番出o黎,
歌仔都有得唱,一首歌總括番大陸既經驗:「十個古仔,九個係曳,淋漓盡致,嚇壞腸胃,公安綁架,霸肚生仔,番到大陸,實會心悸,啊亂個鬼,賤個鬼,死俾你睇,法律隨時倒轉夾硬o黎,人人自動自覺甘心做蟻,因為馬克思你無曬問題,因為馬克思你無曬問題!」

======================================

31.拜年
呢幾年,拜年既賀詞之中,最流行係邊句?
祝你------不勞而獲.(唔係掛?)
恭喜人地發財當然好,但係發財,都要有方法.
有邊一個方法,好得過不勞而獲?(係o米)
不勞而獲o既方法就係唔洗方法,唔洗方法就係最好o既方法.
我地想發財,已經想到左一個禪o既景界!
不勞而獲既然可以成為新年賀詞,我期待係未來幾年,
我地話人蛇鼠一窩,即係讚佢合群,話人非奸即盜,即係話佢勇敢!
黃華,真羨慕你呢個家庭,真係蛇鼠一窩非奸盜.
張:梗係,唔係我地點會陷家富貴!

======================================

32.真人對話
黃 : o個陣仲未有173呢D熱線電話,我就已經用我o既天才,構思左一種主動731熱線!
張 : 講乜呀?
黃 : 你依家隻手擺係邊?你又知唔知我隻手擺係邊?只要你話俾我知你隻手擺係邊,
我就可以估倒你o既年齡,生日同埋血型.
張 : 反應好唔好呀?
黃 : 深受一般家庭婦女歡迎!
張 : 咁o米賺好多?
黃 : 過得去啦,晚晚做到天光....不過我到依家都唔知點收錢 .

======================================

33.兒童教育
我一向都認為,我地成日呃D細佬仔,懶係nice 咁對佢地,
講到呢個世界乜o野都好好咁,咁係唔o岩o既,(何解?)
細個我同媽媽搭飛機,睇見廁所既水係藍色,我未見過,
咪走去問媽媽o個D係乜?
媽媽話:「係天空。」
所以我就成為世界上第一個食迥天空o既人.
細個的大人成日講童話講白雪公主.(你都聽過啦.!)
佢地講既就係白雪公主又靚又好人,好值得去追求.
但係冇講到我地唔係白馬王子!
邊個人至係白馬王子呀?
起碼有隻白馬啦.
咁就即係馬主啦,你係唔係呀?
講D唔講D好危險架.
即係等如你同個細路仔講:「小明呀,飛出窗口好過引o既,成個香港望o西架,浮下浮下.....」
但係唔同佢講:「不過你落到下個陣,會快過搭電梯好多!」

======================================

34.賭馬
喂,賭馬係需要付出好多架......
朝早要睇晨操夜晚要睇董鏢,又要同朋友交換讀書報告.
你估我地睇得書少?市面幾多馬經呀?
仲唔係話你睇得多就得架喎!
香港D馬經,一埸十隻馬,十隻馬都有人貼,你自己思想唔夠獨立,
咁你就死梗喇:唔該,呢場每隻幫我落100蚊丫!希望中喇!
夏天o黎喇,抖暑喇,你估係比D馬休息咩?係比我地休息呀!

---

作者: zz1988    時間: 2006-4-8 03:34 PM

very funny

---

歡迎光臨 娛樂滿紛 26FUN (http://26fun.com/bbs/)

Powered by Discuz! 7.0.0