娛樂滿紛 26FUN - Powered by Discuz! Board

標題: 【轉貼】童年的零食 45款 [打印本頁]

作者: wind69 時間: 2006-8-3 03:38 AM 標題: 【轉貼】童年的零食 45款

1.媽咪麵

媽咪麵相信大家讀小學時一定會食過，橙色包裝，但而家已經轉黃色包裝lu，半人在小學食o個時都只係$1.2，但而家就要賣$2囉，而食法就係將包媽咪麵"練"碎佢，再將o的味精粉加落包麵o度，之後"傲"佢，咸咸地又辣辣地，而且仲好脆添，真係幾好味!!!!!!!
而本人仲好懷念食到手指黐住o的味精粉陣時啦，(要洗手呀，好煩) hehe^.^
而本人o係旺角中心仲可以買到，而應該有o的士多仲有得賣，同埋7-11都有得賣!!!!!!(不過轉包裝此終感覺唔同)
經典指數:****

2.牙擦擦吹波糖(現名四洲吹波糖)

呢一款"牙擦擦吹波糖"，最特別o既地方就係會附送一張印水紙，只要加小小水，再貼落隻手o度，就可以印落隻手o度喇，但係佢最特別o既地方都係永遠印到落去都走晒樣，化晒o甘，(本人就從未試過成功o甘印到啦)^>^。但係呢一隻"牙擦擦吹波糖"而家就改名叫"四洲吹波糖"啦，而以前係隻貓做標記o架，而就改超人做標記啦，本人買時賣2毫子一粒，而家就要5毫子子先有一粒喇，有可樂同原味兩款選擇。以前我就成日食，唔知大家係咪呢?
經典指數:***

3.眼鏡糖

眼鏡糖o既歷史真係有好耐喇，我唸我未出世時已經有喇！故名思義，眼鏡糖其實係好似眼鏡咁，裏面就包住o的糖，但係o的糖就唔係咁好食喇，唔知點解細個成日都會買食，記得仲係住眼鏡糖扮戴眼鏡添，(o念起都好好笑)！而家以經好少地方可以買得到眼鏡糖啦，只係淨番o的舊式士多可以買得到!!!!!!!!!
經典指數:****

4.牛仔片
牛仔片我覺得好好食o既一種薯片，而之前係冇通窿塊牛仔片，只係好似一塊蝦片咁，之前有一段時間係有玩具送，雖然o的玩具係唔好玩o既(但之前細個覺得好得意)，而只係賣到1.2咋時，真係好抵，但唔知點解，有一排冇得賣，一出番就變成而家o既型態喇!!!!!仲有，而家應該賣到2個幾 !!!!!!!!
經典指數:****

5.爆炸糖

細細個食爆炸糖時有無覺得好神奇、好得意o既呢!!!!!!係咪成日都會唸點既解放o的糖落口度會爆開o既呢!!!!(雖然而家我都唔知點解!哈哈!!!)仲記得細個食爆炸糖時係越大粒越好o架，因為越大粒越就爆得越勁，o係個口高彈彈，(咬一咬都會爆開o架!)，真係好得意o架，而o的碎個口sa sa 聲，都好有趣。本人記得時好似係賣5毫子一包，而家就賣$2包，o係超3市場可意買到。
經典指數:****

6.即食腸

其實好多零食細個都唔只叫咩名，只係圍內一班朋友仔一齊叫佢叫咩名就係乜，但係有班新朋友o個時個名又有唔同o架，唔知大家覺唔覺呢!!! ^.^
講番呢種即食腸，而呢種即食腸我細個就覺得好難開o剌，通常都係用口咬爛個頭，之後慢慢由尾o即佢上o黎食，唔知大家係唔係呢，而呢種即食腸仲還越出越多味添，但係網主就將我最鍾意o既兩種味影出o黎。同埋，細個見到o的好大條o既腸都好想買，但係而家o念番自己食唔食得晒呢!!!!!!
經典指數:****

7.旋風薯條

呢一隻旋風薯條食落辣辣o地，而且咖哩味十足，真係幾好味o架，而有兩種口味，一種係綠色包裝，而另一種係啡色，但係我到而家都唔知有咩分別，而細個小息時我到總會買包番學校食o架，真係好好食o架，唔知大家又鍾唔鍾食呢隻旋風薯條呢，但我o念呢一隻旋風薯條都無乜人細個無食過o架o剌!!!!
旋風薯條可以係超級市場同士多可以搵到，但係價錢就貴以前好多o羅，可能真係太耐無買，唔知米貴o剌。hehe^.^
經典指數:****

8.蜜蜂糖

我相信每一位生活香港o既人，細個o個時一定食過蜜蜂糖，呢一款糖真係經典之中o既經典啦。蜜蜂糖其實係檸檬茶味，只係佢o既包裝係蜜蜂，所以先叫佢做蜜蜂糖，我相信大家都一定鍾意食。而呢一款蜜蜂糖以前賣1毫子一粒，但而家就賣1蚊四粒，o係士多同超級市場都有得賣o架!
經典指數:*****

9.童星點心麵

童星點心麵由細食到大啦，佢有咖哩同雞肉味，我仲記得以前童星點心麵有抽獎o架，而o的獎品我細個o個時覺得好得意o架，我細個o個時就好想要啦，唔知係咪真係有得抽獎呢，(因為好似日本先有!)，唔知大家有無試過抽獎呢，若果真係有o既話請話俾我知!
而家7-11洞超市都有得買，仲有大包同細包o架
經典指數:**

10.介指糖

唔知大家仲既記唔記得有呢隻介指糖呢，其實介指糖好似介指o甘可以戴o係手o個度，一路戴住一路食，真係好得意，仲記得小學小息得15分鐘，但係粒介指糖又鬼死o甘大，一定食唔哂，我真係想問大家係點樣處置粒介指糖o既呢，我就用個膠袋裝住啦(hehe)，但係其實介指糖唔係o甘好食o架o乍，都係貪佢得意先買。
而家有少部分士多仲有得賣o架!!!!!!!!!!!
經典指數:***

11.甘大滋

我相信若果係餅乾條o既話，每一位而家十零廿歲都對甘大滋同百力滋唔會陌生，仲係陪伴住大家成長o既添，甘大滋食落甜甜o地，真係好好味，而細個o個時因為甘大滋平o的，我都會買甘大滋多o的。而呢幾年甘大滋賣o個個廣告，"甘大滋呀o甘大枝"，好好笑而網主就覺得印象好深刻喇，唔知大家覺唔覺特呢?而甘大滋超市都有得賣，我相信而家好多小朋友都會認識。
經典指數:*

12.脆脆蝦餅

呢一款以前係叫做脆脆蝦餅，但係而家就改o左名叫四洲蝦餅o剌，而且舊時係一包裝兩塊o架o乍，而家就一包四塊，大包o左，不過貴o左(而前賣$1，而家就要$4o剌)，網主就覺得貴o左o的o剌，唔知大家覺唔覺呢?脆脆蝦餅特別o既地方就係會黐住o係條(月利)度，好得意o架，而且大大塊o甘食，真係好爽o架食得!脆脆蝦餅o係7-11同超市都可以買到。
經典指數:**

13. Ken-Ken 魷魚

其實呢隻魷魚o既真實名稱我都唔知叫做什麼，只係佢o既包裝上有"Ken-Ken"o既字樣，所以我同我家姐由細到大都叫佢做"Ken-Ken魷魚"
而Ken-Ken魷魚細個o個陣時點解會買?本人就覺得佢好平，因為時興隆o的魷魚絲好貴，細個o個時買唔起，而Ken-Ken魷魚o個時賣5毫子包，而且又甜甜o地，好好味!所以細個o個陣時士多都好受迎o架!而家o係部份7-11都可以買到，但係而家就賣到$2.5一包o剌！
經典指數:***

14.樂天熊仔餅

樂天熊仔餅，好食到唔捨得請，我o念大家都一定o係電視廣告度聽過o架p剌，樂天熊仔餅我記得係o向我幼稚園中班時出o架，都出o左成十幾年o剌！熊仔裏面包住朱古力夾心，真係好好味o架。細個o個時真係好想食o架，而樂天熊仔餅網主仲記得我幼稚園默書100分，我婆婆獎俾我食添!!!hehe^.^，o 念番起真係好得意。
而樂天熊仔餅初初出o個時淨係得朱古力味，而家就有多o左士多啤梨、草莓、雙層朱古力味o剌，但我始終都係原味(朱古力)最好食，唔知大家覺唔覺得呢?而樂天熊仔餅o個時賣$5(幾貴o架)，而家就賣$8-$10o剌，邊度有得賣?唔使我講大家都知o剌，同埋樂天熊仔餅有細包裝同家庭裝o架!!!
經典指數:***

15.彩虹糖

彩紅糖o係細個o個陣時好受歡迎o架，唔知而家o的小朋友鍾唔鐘意o既呢，彩紅糖入面有七種唔同顏食o既糖，所以佢就叫彩紅糖o羅！唔知大家鍾意邊一種顏色o既糖呢，網主就鍾意紫色o剌，因為紫色特別少，所以一定o的紫色o黎食先，唔知大家又係唔係呢。
而彩紅糖而家好多地方都可以買得到，超市、7-11、OK、士多，但係唔知而家仲係唔係紫色最少o既呢！hehe
經典指數:***

16.鱈魚絲

鱈魚絲o向我細個o個陣時，因為好平，所以我成日都買o黎食，而近日同o的朋友講開細個鍾意食o的咩零食，大部分都有講到鱈魚絲，可見佢有幾經典！鱈魚絲食樂好似魷魚絲，食落幾好味，仲有，食個口會有味o架，一定知道食過鱈魚絲^.^，但係都係因位佢夠平，先吸引到我o地細細個買o黎食，因為細個通常都係得幾蚊零用錢^.^!!!!!!!
而鱈魚絲而家o向士多，同部分7-11都可以買得到。
經典指數:***

17.時興隆粟米卷

聽個名可能唔知佢係乜，但係當大家見到佢o個時，你一定會知道佢係乜，但係我細個都唔知佢叫咩名，只係見到佢就會買，真係陪住我o地成長o架，仲記得食住o玩噴人，o念起都幾好笑!!!!而時興隆粟米卷有三種味，本人就覺得紅色最好味o剌，辣辣o地，而家食番都仲好好味，而家係超級市場同7-11 都有得賣o架!!!!!總之係一經典o既零食o剌，相信無細路係無食過o架!!!!!!!!!!
經典指數:*****

18.穿梭機(雪條)

呢隻穿梭機雪條真係經典o既雪條之一，一枝雪條有三種味，最上層係朱古力，中層係蜜瓜味，而下層就係青檸味，食落中間o個層蜜瓜甜甜o地，而底層o既青檸又有少少酸，再加上上層的朱古力(雖然好少)，真係幾好味，而且價錢又平，記得o個時只係賣個幾一枝，真係吸引到我o地呢o的小朋友o架!(o個時 ^.^)，加上個包裝十幾年o黎都無變過，而家食番仲有份親切感o係度!!!!!!
但係而家唔係好多地方有穿梭機賣o羅，只係一o的士多先有得賣，就賣到$3蚊，有時o向超級市場見到o的新款o既雪糕雪條，覺得都係唔及穿梭機o甘好味添。
經典指數:*****

19.卡樂B什菜條

卡樂B什菜條細個都幾鍾意食o架，我相信好多人都會係o甘o念，什菜條味道淡淡o地，無其他薯片o甘鹹，只係鹹鹹o地，而且又係話用菜做，所以覺得好似無 o甘熱氣o甘。包裝雖然有同以前有少少轉變，但係都係綠食包裝o既，同埋而加就加o左o的什菜粒落什菜條o度，雖然係多o左o的料，但係味道就無以前o甘夠味o剌，唔知大家覺唔覺得呢。
以前什菜條就賣個幾兩蚊倒，而家就賣成4蚊o剌，都貴o左成倍o架，o係超級市場都買得到。
經典指數:***

20.得意動物餅(愉快動物餅)

得意動物餅唔知大家細細個有無食過呢，入面o的餅乾全部都係動物o既形狀，而且仲印有動物o既英文名，仲o係盒底印o左動物o既中英文名，細個都真係學到幾多動物o既英文名o架，唔知大家又係唔係呢!^.^
但係唔知幾時得意動物餅改o左名叫愉快動物餅o剌，我此終都係覺得得意動物餅個名好o的，唔知道大家又知唔只道佢改o左名呢！而佢就有兩種味，分別係牛油同紫菜味，我就鍾意食牛油味多o的o剌，o係各大超級市場有售。同埋勁網友提供資料，而家有紅豆味，大家不妨試o下!!!!!(但係好似唔係好夠紅豆味)
經典指數:***

21.朱古力手指餅

朱古力手指餅我相信每個人細個都會鍾意食，我都係朱古力手指餅o既支持者，每一次食都總係食到停唔到口，總係食一枝又一枝，因為實在大好味o剌，而家成廿歲都好鍾意食。而個包裝仲無乜變過，真係少數保持原貌o既零食之一，食番呢o的零食真係會o念番以前細個o的o野o架，你話係唔係呢?但係佢都賣幾貴，所以細個都唔係成日有得食，但係有得食就好開心o架o剌!!!!!!!^.^
而家朱古力手指餅出o左薄荷朱古力味，雖然都幾好味，但係我就覺得始終都係朱古力原味好食o的。
經典指數:****

22.手指餅

手指餅相比起朱古力手指餅雖然無o甘好味，但係就平好多，食落甜甜o地，而細個o個陣都會慍手指餅黎扮食煙，又或者含o係個口都扮型，o念番起真係幾好笑o架。而細個病o個時都媽咪買手指餅o架，因為病都食得o麻。
而手指餅而家就換o左包裝o剌，以前o既包裝就好普通，而家就變到好得意好多o羅，但係個感覺就唔同以前o剌，但係手指餅我相信比起朱古力手指餅就無o甘多人識o剌。
經典指數:***

23.真魷味、真蝦味

真魷味及真蝦味呢兩款由時興隆出品o既零食都有好耐o既歷史，但係呢兩款零食就唔係成日有得埋，只係間唔中o係一o的士多同少部份超級市場見到有得賣，所以每次見到有得埋都好開心o甘買o黎食，只係五、六歲o個時買得最多o黎食，之後都好少見到有得買o剌。但唔知係唔係真魷味同真蝦味通常都係o係o的舊士多先到，所以都有少少驚佢已經過o左期o架，(佢o既味道都有少少似o甘)。
而真魷味同真蝦味兩種我就比較鍾意真魷味，雖然兩款都係一個個圓波，但因為佢辣辣o地，而且比較易買得到(真蝦味真係幾難到o架)，唔知又有無人鍾意食真蝦味多o的o既呢。
經典指數:***

24.煙仔朱古力

呢一款煙仔朱古力已經好少地方可以買得到，現在只可間中於一些舊士多可以見得到，仲記得細個o個時買煙仔朱古力扮食煙，(細個又有幾多細路真係食煙呢)，因為呢種煙仔朱古力o既包裝都好似真煙o甘，o念番起真係幾好笑o架。只要撕開佢表面o既紙，就係一條食得o既朱古力o剌，不過都係用o黎扮食煙多過真係食o架o剌。
可能因為會教壞細路o既關係，好多地方都唔賣呢種煙仔朱古力，買到o既地方已買少見少o剌，而家就賣$4，唔知而家o的小朋友知唔知有呢種煙仔朱古力o既o呢。
經典指數:****

25.旋風可樂糖

呢款旋風可樂糖個款好似好核突o甘，咪就以為唔好食，其實細個買o野食都係睇樣，見到呢o的o甘核突通常都唔會買，唔知大家又係唔係o既呢。但係呢種旋風可樂糖其實好好味，真係唔可以淨係睇外表呀，佢o既可樂味好夠，而且好大粒，最重要o既就係賣得好平，所以細個都會買o黎食o架。
同埋，旋風可樂糖一粒可以食好耐，買一包通常都好耐先食得完，所以好似好抵o甘，但係而家都係士多先買得到，大家又鐘唔鍾意食呢。
經典指數:***

26.汽水糖(罐裝)

呢款汽水糖我o念好多人細個都會好鐘意食，因為佢細細粒，真係好似可樂味，唔知係咪好似可樂味o既關係，我細個o個時就有人將呢o的汽水糖整碎佢加落o的水度當汽水飲，會有汽水味o架，唔知大家又有無試過呢?而本人就覺得o甘好怪o剌！
同埋，呢款汽水糖都幾平，所以成日都會買o黎食，而且都有好多種可樂糖，呢一款都算幾好味，而且佢o既蓋幾得意，我細個好鍾意開o架。
經典指數:***

27.彩斯糖

彩斯糖呢個名我相信無乜人會未聽過，而且我o念大家到一定會食過添，但係彩斯糖同一種明治出o既TINO糖好相似，唔知大家分唔分得清楚呢?而彩斯糖三種味道中，我就比較鍾意食乳酪味同奶油味o剌，你o地又鍾意食邊一種味道呢。
同埋彩斯糖同好多零食一樣，都改o左名，而家就叫做四洲糖，改名之後真係要見到先知道係彩斯糖呀，而彩斯糖o係超市、零食物語都可以到，價錢就$5-$6度o剌。
經典指數:***

28."筆"筆"朱古力

這款"筆"筆"朱古力由細食到大，但係其實都晤知到佢個名係乜，只係要用枝棒"筆"o的朱古力o黎食，同埋只要同人o甘講，大家都會知道佢係乜，所以我由細到大都係叫佢做"筆"筆"朱古力，唔知大家會唔會有其他o既名，又或者你知到呢款朱古力o既真名，不妨話俾我知。
講番"筆"筆"朱古力真係好好味，o的朱古力好甜好好味，都只係賣5毫子，所以細個成日買o黎食，因為其他o既朱古力好貴，細個真係唔係成日買得起o架。而且用支棒仔"筆"o黎食，食到最後一定有o的係"筆"唔到，總係想食埋佢，不過又真係食唔到。而家"筆"筆"朱古力賣$1 o羅，雖然貴o左，但係都覺得好抵!!!!!!!
經典指數: ***

29.三粒糖

三粒糖呢一款零食唔知大家有無印象呢，可能20-30歲倒o記朋友對三粒糖o既印象會深刻o的，其實三粒糖都真係有好耐o既歷史o喇，我同我媽咪講番原來佢細個o既時候都有三粒糖，而你o地有知唔知佢點解叫做三粒糖呢，若果知道o既朋友不妨留言話俾我知。
而三粒糖o既包裝同以前都有小小o既改變，而家就叫做四洲三粒糖，佢o既味道其實我都覺得幾好味，一大粒粉粉o地o既糖，唔知大家又覺唔覺得呢，同埋三粒糖而家好少地方先買得到，想食o既朋友不妨去一些士多找找。
經典指數: ***

30. 太空糖

唔知你o地對太空糖仲有無印象呢，我相信呢樣零食比較少人買，同常都係好耐見得意先買o黎食，點解會叫做太空糖呢?其實太空糖又有乜意思呢?太空糖o既外型好似一粒粒斷開了o既粉筆o甘，(真係好似o架)而佢食落口會即刻溶，好似而家o的果子糖o甘，但係食都幾口渴o架。太空糖o既包裝同以前有o的轉變，總係覺得以前o既包裝好o的o甘，同埋個名又改ｏ左叫四洲太空糖，舊時賣5毫子，而家就要1蚊o刺，都係一o的舊士多先可以搵到。
經典指數:**

31.四洲吹波珠

若果淨係講四洲吹波珠，我o念大家到唔知佢係乜o黎，但係你同朋友講係一盒三粒的吹波珠，而係一個正方形o既合裝住o既，我o念佢一定會知道係呢一款四洲吹波珠講番呢款四洲吹波珠，大家童年時一定會食過，有提子、士多啤梨同橙三種味，唔知我唔講大家會唔會記得o西呢!!!!(好多人都唔記得係有士多啤梨味 o架)，而以前o既包裝係生果包裝o既，總係覺得以前o既包裝好o的同有親切感，好可惜係以經找不到以前o既包裝o剌!!!!而一種吹波珠以前只係賣3毫子，所以好受我o地呢o的無乜錢o既細路歡迎o架，同埋o甘o岩得幾毫子都會買o黎食o架，而呢o的吹波珠同牙擦擦吹波糖一樣，都係好難吹波o架，唔知大家覺唔覺得呢!!!!!
經典指數:****

32.紫菜

紫菜又係一種細個必食o既零食之一,但係細個o係唔同o既地方買o的紫菜牌子都唔同，尤其是o的士多就會賣埋o的唔知名o既紫菜，打開黎食仲係淋淋地添，都唔知係咪過期架，食落都真係有o的驚!!!!!!而我細個o個時就成日食一隻叫"海寶紫菜"o既紫菜，唔知大家有無食過呢一隻紫菜呢，而家以經搵唔番呢一種"海寶紫菜"啦。
經典指數: **

33.珍珍薯片

以前薯片得幾隻牌子，其中最出名記o既就有卡樂B同珍珍，珍珍薯片其實都出好多款式o既薯片，但係原味就最歷史悠久啦，而好多人都唔係幾鍾意食珍珍，原因係佢大，亦有人話佢太咸，所以由以前到而家都係卡樂B受歡迎，但係本人就比較鍾意食珍珍多喇，因為我比較鍾意食咸o既薯片!
經典指數:***

34.BB糖(哨子糖)

BB糖(哨子糖)真係一款非常經典既零食，唔知大家係叫佢做B B糖定哨子糖既呢，呢種糖只要將粒糖放落嘴度，就會吹出哨子聲，而通常都叫哨子"BB"，所以咪會叫佢做"BB糖"囉。佢既外形就好似"寶路薄荷糖"o 甘，中間有個窿用o黎吹出聲，細個成日都會唸，點解粒糖會吹得出聲既呢，但係奇怪就係當將粒糖分開做兩邊之後又出唔到聲個喎，真係而家都唔知點解!而舊包裝既"BB糖"以經絕種了，而家知可以買到呢種新既包裝，但係新包裝O既"BB糖"都好小地方買得到!
經典指數:****

35.奶咀糖
奶咀糖其實同介指糖好相似，都係將粒糖好似介子帶落手指度，而外形就係奶咀o甘，同樣都係一o的貪得意既零食，絕對唔可以o係15分鍾既小食裏面食得晒)，食唔晒就將粒糖放番落個袋度，等第二個小食再食過。至於係有奶咀糖定介指糖先既呢，本人就記得係有介指糖糖先,同埋而家o的士多都通常只係得介指糖賣，奶咀糖就比較小見o的。
經典指數: ***

36.巨星雪條

單就睇個包裝，以經知道佢係好耐歷史既零食，無錯，巨星雪條係經典既雪條之一，我o念大家都會聽過巨星雪條，就算你唔記得，每當提起個雪糕頭有o的七彩既朱古力條時，大家一定會有印象，本人就覺得巨星最好味既地方就係佢既雪糕頭o剌，因為o的七彩既朱古力條好好味，以巨星同穿梭機都係嘉頓出品，而我細個就比較鍾意食穿梭機多o的o剌，因為穿梭機有幾種味，而通常完巨星頭有朱古力o個段，淨番身o個部分其實無乜味，唔係甘o好食，有陣時都會食唔晒添。而巨星同以前既包裝都無改變，有陣時望番呢o的零食回味一下是童年時，都真係幾得意o架!!!!!而巨星在一些士多都會得到。
經典指數:*****

37.檸檬茶雪條

檸檬茶雪條係嘉頓既經典雪條之一，我o念都有二十年以上既歷史，其實檸檬茶雪條既包裝唔係好靚，而且雪條只係啡色一種色，細個在士多既雪櫃揀雪糕雪條o個時，真係唔多會揀呢隻檸檬茶雪條，因為細個o個時我o念好多人都會係會揀o的得意或者係係有好多種味味道既雪條，但係當你食落檸檬茶雪條o個陣，又會覺得幾好味，慢慢你又會買黎食，同埋檸檬茶雪條都幾解渴o架，夏天勁熱食o個時就最正o剌!!!檸檬茶雪條都可以算得上係雪條既黑馬o剌!!!!!!!^.^唔知大家又鍾唔鍾意食檸檬茶雪條呢?
經典指數:***

39.鴨仔糖

鴨仔糖呢款零食其實可以話係"皮禮士糖"既廉價版，大家都是又有得食又有得玩，只係皮禮士糖係卡通人物，而鴨仔糖係鴨仔，講得係廉價版，緊係平過"皮禮士糖 " o剌。而呢款鴨仔糖都有好耐既歷史o羅，通常細個o個時先會買呢種鴨仔糖，小學高o的年班買番學校都可能俾同學仔笑呀。你話係唔係呢!!!!講開鴨仔糖，其實都幾得意o架，按掣之後鴨仔條就會伸出o黎，所以而家都有唔少細路仔會買o黎買(食)o架。而家士多就賣$4.5，都唔算太貴，你細個既時候有無買過o黎玩呢。我就有o剌!!!!!
經典指數:****

40. 罐仔糖(圓罐形)

其實呢一種罐仔糖連我都唔知叫乜名，但係你同人講圓罐裏面裝住一粒粒圓形既果汁糖，而入面又有好多粉既，我相信好多人都會記得!而呢種罐仔糖其實都幾好味同埋好抵食，有好多果汁糖，當你食o的果汁糖之後，個圓罐入面仲有o的粉，但係細個o個時都只係會叫呢o的做粉，o的粉甜甜地，所以通常都會用手撩埋佢黎食，有時覺得o的粉仲好食個o的糖添呀，唔知你覺得係唔係呢!而呢種罐仔糖有都有好多個包裝，以前o的糖就細粒o的同埋係圓珠形既，但係無變既係罐入面仲有好多粉，打開o個時一定要好小心，如果唔係就會倒o西o的粉出黎o架o剌!!!!!!!!
經典指數:****

41. 欣欣杯

大家細個既時候有無食過欣欣杯呢，其實細個o個時唔係叫欣欣杯o架，但係就真係唔記得叫乜名o剌!!!!但係食法原全一樣o架!!!!!!!講番欣欣杯，細個食o個時將一條條既餅乾條點落o的朱古力度食，都真係幾好味o架，但係唔知大家會食晒o的餅乾條先定朱古力醬先呢?如果食晒o的朱古力醬先淨係食餅乾，又唔想食o的餅乾條o架o剌，但係食晒o的餅乾條仲淨番o的朱古力既話，又會挖埋o的朱古力黎食，唔知你係邊一種呢?而欣欣杯有朱古力同士多啤梨兩種味，但通常都係朱古力比較受歡迎，你有鍾意食邊種口味呢?
經典指數:***

42. 沙爹魚串

其實本身真係唔知呢款零食叫沙爹魚串，同埋細個食o個時仲以為係魷魚黎，沙爹魚串細個食都通常只係在士多買一串黎食，而o個時都係賣3號毫子一串，都真係幾抵食o架，o念落細路仔既時候幾毫子都可以買到好多野食o架o剌，!!!!!但係而家好多地方都係一包一包甘賣o羅，好能因為衛生方面既問題o剌。但係都係覺得一串一串買o黎食得意o的!!!!!而沙爹魚串用一條長竹簽串住o的魚串，有少少沙爹味，個樣同o的味道係幾似魷魚o架，我到買番黎介紹先知道係魚o黎，哈哈，o念落都真係幾得意!!!!
經典指數:*****

43. 雪菠籮

雪菠籮呢一款零食唔知大家細個既時候有無食過呢? 其實係將一塊塊既菠籮放落雪櫃雪，雪到硬硬地同埋有小小結冰，都真係幾好味o架!!!!!以前只係賣五毫子一塊，而家就賣 $2 o剌!!!! 其實o念番以前細個既時候一蚊幾毫都真係買到好多野o架o剌，唔知大家覺唔覺得呢。同埋我以前食o個o的雪菠籮係長長o地一塊o甘o架，可能以前係自己整 o架o剌，而家買番就只係得圓形既雪菠籮o羅!!!!其實以前除雪菠籮之外，仲有雪木瓜o架，但而家都好難買到雪菠籮同雪木瓜o剌，只係間中一o的舊士多可以買到。唔知細個你o地有無食過呢款零食呢!!!!
經典指數:***

44.鞋帶糖

鞋帶糖呢款零食相信在你既童年時代一定會食過，而講起鞋帶糖其實都幾得意，得意既唔係佢既外形，而係佢既食法，好似細個既時候成日都會拉長o的條鞋帶糖，好似長拉長o的會抵食o的o甘，同埋會將鞋帶糖打結黎食，有時又會咬住條鞋帶糖續小續小慢慢食，而細個既時候也會用口咬住"fing "來"fing"去當鞭o甘打人，o念落都真係幾好笑!!!!!唔知你細個既時候係咪o甘食鞋帶糖既呢?而記得以前鞋帶糖賣二毫子一條，但慢慢都變了一包一包o甘賣，到而家好多士多同糖果店都好易買得到鞋帶糖，可以講得上係長青既零食o剌!!!!
經典指數:****

45.牙膏吹波糖

呢款牙膏吹波糖唔知大家細個既時候有無見過呢?我問過朋友都唔係個個都食過呢款零食，而且以前都唔係間間士多買得到，而家買得到呢款牙膏吹波糖都好開心呀!
講開牙膏吹波糖，記得以前既牙膏吹波糖係肥o的大o的架，可能係唔同牌子o剌。食佢o個時好似牙膏o甘佢出黎食都幾得意架，但係買佢黎食大多係貪得意，通常都食唔晒架，但係o念番起細個既時候食過o甘多得意新奇既零食，都真係好開心架!
依家牙膏吹波糖就賣$6，記得以前只係賣到$2，其實都真係幾貴!

有幾多你食過呀~

ps 唔知點解無左38，不過我估 38 應該都係大白兔糖架啦！

作者: wind69 時間: 2006-8-3 03:47 AM

有十五款係我細個成日食ge

2.3.5.6.12.14.21.24.25.29.30.31.33.36.42

作者: lypoon 時間: 2006-8-3 04:13 AM

全部都係經典~~~成日食ga~~~仲有"曲曲薯片"冇講~~

另外"雪菠籮" 真係即刻令我諗返細個呀~

[ Last edited by lypoon on 2006-8-3 at 04:29 AM ]

作者: lypoon 時間: 2006-8-3 04:16 AM

仲有我細個成日食一粒個外型係檸檬的香口膠ga~

作者: lypoon 時間: 2006-8-3 04:25 AM

仲有復活節時個d 好鬼難食, 但一定會食ga 復活蛋朱古力~

作者: playbr2 時間: 2006-8-3 04:42 AM

Originally posted by lypoon at 2006-8-3 04:25 AM:
仲有復活節時個d 好鬼難食, 但一定會食ga 復活蛋朱古力~

係喎!!!!玩具朱古力蛋都係童年必吃零食

重有变成糖,有多種顏色,食完條利重变左粒糖既顏色

記得有一次買黑色食,食完條利变左黑色,比老師見到以為我食物中毒條利發黑

重有牛肉乾,的達糖,变色龍,蓮花柸去左边

作者: wind69 時間: 2006-8-3 05:14 AM

仲有Po路薄荷糖！有個窿ge薄荷糖

作者: benson00 時間: 2006-8-3 06:14 AM

ps 唔知點解無左38，不過我估 38 應該都係大白兔糖架啦！

>>>>>會唔會係七彩蝦條？？？我仲記得七彩蝦條姐姐著住件透明蒲，yeung yeung 下甘，問個肥仔D蝦條好唔好食...

作者: wind69 時間: 2006-8-3 06:20 AM

Originally posted by benson00 at 2006-8-3 06:14 AM:
ps 唔知點解無左38，不過我估 38 應該...

哇~~~~七彩蝦條姐姐呀！！

作者: tsowaiman 時間: 2006-8-3 11:35 AM

我想問我細果既時候食過一種糖

1.個包裝好似係紅,白,綠三色(因為太久沒有見過,所以印象唔係太深)
2. 糖係偏平一塊成長方形
3. 一半係朱古力,一半係牛奶
4. 係軟糖

請問有冇人食過同記得果名?

作者: AWU 時間: 2006-8-3 02:22 PM

Originally posted by benson00 at 2006-8-3 06:14:
ps 唔知點解無左38，不過我估 38 應該...

咪係, 童年點可以無七彩蝦條姐姐o架

作者: toro 時間: 2006-8-3 04:13 PM

加分~~~~

作者: iknow 時間: 2006-8-3 07:05 PM

我成日食出奇蛋的><

作者: loklok117 時間: 2006-8-3 07:43 PM

good post LOKLOK+3FUN
細個果時老母面(媽咪面)真係當飯食

作者: 伊達臣人 時間: 2006-8-3 08:19 PM

好多都食過

作者: 阿感 時間: 2006-8-3 09:00 PM

仲有隻絲帶糖,好似係咁叫

作者: lypoon 時間: 2006-8-3 09:47 PM

Originally posted by loklok117 at 2006-8-3 07:43 PM:
good post LOKLOK+3FUN
細個果時老母面(媽咪面)真係當飯食

老母面

果包味精真一流~~~~~

作者: loklok117 時間: 2006-8-3 10:38 PM

Originally posted by lypoon at 2006-8-3 21:47:

老母面
果包味精真一流~~~~~

無錯
有d人重加兩包粉黎食tim ar

作者: wind69 時間: 2006-8-4 12:19 AM

有種糖一條條十幾吋咁長，硬糖黎ge！食果時鍾意一手拿住一路含一路轉，轉到支糖尖晒，之後就會拮損條利....

作者: kahang0210 時間: 2006-8-4 02:17 AM

Originally posted by lypoon at 2006-8-3 04:16 AM:
仲有我細個成日食一粒個外型係檸檬的香口膠ga~

我依家中二升中三,我四年級成日買黎食^^好好味!好似係4蚊6粒左右!

作者: benson00 時間: 2006-8-4 04:30 AM

Originally posted by tsowaiman at 2006-8-3 11:35 AM:
我想問我細果既時候食過一種糖

1....

引像中好似食過，唔太甜，係咪國貨公司買ga???

作者: benson00 時間: 2006-8-4 04:33 AM

Originally posted by wind69 at 2006-8-4 12:19 AM:
有種糖一條條十幾吋咁長，硬糖黎ge！食果時鍾意一手拿住一路含一路轉，轉到支糖尖晒，之後就會拮損條利....

仲有戒指糖，好似奶嘴既，食過未？？

作者: tsowaiman 時間: 2006-8-4 11:22 PM

Originally posted by benson00 at 2006-8-4 04:30 AM:

引像中好似食過，唔太甜，係咪國貨公司買ga???

我記得好似係,不過我好似係街邊d士多買.

歡迎光臨娛樂滿紛 26FUN (http://26fun.com/bbs/)