娛樂滿紛 26FUN - Powered by Discuz! Board

標題: [愛情診療室] 又有經歷想講下......(如有意見﹐隨便講) [打印本頁]

作者: ThomasKoon 時間: 2009-4-30 07:00 PM 標題: 又有經歷想講下......(如有意見﹐隨便講)

可能會比較長﹐各位唔好介意................

我呢個經歷﹐係同我一個唔同分店嘅同事有關..........我同佢做嘅兩間舖﹐因為都係UNDER同一個主任﹐而且距離唔係好遠﹐所以我哋同事之間都會比較熟絡﹐我同佢本身亦有私下傾電話﹐大約就2-3日傾1次啦(當然係私事).....而機緣開始﹐就係CHRISTMAS開始..........
嗰陣我阿HEAD所管嘅幾間舖﹐我都有送一張CHRISTMAS CARD過去﹐咁當時佢就代表佢嗰間舖打俾我SAY THANKS, 我哋由嗰陣開始﹐傾電話嘅次數﹐就比之前更多.....
之後有一次同佢傾電話﹐就講起佢男朋友嘅一啲嘢﹐而呢啲嘢我聽咗之後﹐我就同佢講我覺得佢男朋友對佢好似唔係太好﹐又唔係好緊張佢﹐如果我係佢﹐我一定唔會係咁﹐佢就應咗我一句"如果佢好似你咁就好啦﹐所以我真係有啲鍾意你呀"﹐我話"咪玩啦﹐我會當真架"....佢話佢係認真﹐唔好講笑......呢個時候我真係唔知俾咩反應佢﹐因為佢嘅語氣真係幾認真﹐但當時我對佢又乜嘢FEEL都冇﹐而且佢亦有男朋友﹐所以我冇乜特別感覺.......唔知點解﹐自從呢張CHRISTMAS CARD之後﹐我同佢傾電話嘅次數﹐就越黎越密﹐去到1日至少1次﹐有時我打俾佢﹐有時佢主動搵我.......又過咗1個月之後﹐唔知係咪因為慣咗同佢每日都傾電話﹐所以我喺冇野做嗰陣﹐都會諗起佢﹐而且慢慢變成會等佢電話﹐佢如果冇打俾我﹐我個心會好唔舒服﹐呢段時間我已經諗緊﹐我會唔會係鍾意咗佢﹐咁我都搵個朋友傾過﹐佢話肯定我係鍾意咗個女仔﹐不過我話佢有男朋友架喎﹐佢同我講﹐撬牆腳係好衰格﹐不過佢哋兩個只係拍拖之嘛﹐個女仔都有權揀﹐而且愛情根本好難講對與錯﹐如果你真係鍾意佢﹐你就同佢講啦﹐如是者我諗咗幾日﹐喺呢幾日﹐我照平時咁同佢傾電話﹐過咗大約個幾星期之後﹐我忍唔住開始對佢有少少暗示﹐好似間中會同佢講我好掛住佢呀呢類說話﹐佢有時會同返我講佢都係...而呢個時間開始﹐我有時想搵佢﹐或者有野要問佢﹐而佢又喺公司有野做緊﹐唔得閒聽電話嗰陣﹐我就會SEND SMS俾佢﹐試過最高紀錄﹐一日SEND咗十幾廿個俾佢呀.....佢本身係一個唔太鍾意講野嘅人﹐我都唔知點解﹐佢同我可以日日咁樣勁傾電話﹐因為咁樣﹐佢話鍾意我SEND SMS俾佢﹐仲要我應承佢﹐每日最少SEND一個俾佢添﹐咁簡單嘅野﹐我梗係會答應佢啦.........慢慢我同佢由朋友﹐演變成一對間中會偷偷見面嘅"曖昧情人"﹐我哋見到對方嗰陣﹐拖手、KISS一定唔少得﹐但其實我哋都唔知﹐同對方到底係咩關係......
但問題就喺上星期六晚出現喇......星期日嗰日佢同我講﹐當晚佢同佢男朋友一齊﹐但佢唔記得DELETE我SEND俾佢嘅SMS, 唔好彩俾佢男朋友偷睇到﹐佢男朋友問佢我係邊個﹐佢呃佢男朋友我係佢舊同學嘅朋友﹐冇話同我係同事.......咁佢男朋友就叫佢約我出黎見面﹐由於我唔想搞大件事﹐更加唔想難為佢﹐所以推咗.....咁星期日嗰晚﹐佢嘅手機SEND咗個SMS俾我﹐大約內容係話純粹係我自己誤會咗﹐其實佢對我係冇野﹐仲叫我以後都唔好再搵佢....呢一刻我已經懷疑緊﹐個SMS會唔會係佢男朋友打呢﹐因為嗰日我知道佢會同佢男朋友出街﹐正常情況下佢係唔會SEND SMS俾我﹐而且個SMS咁多字﹐更加唔會係佢打﹐但當時我梗係冇覆返問佢啦....就喺之後嗰日﹐即係星期二嘅上晝﹐我搵佢問清楚佢﹐係咪真係我自己FEEL錯﹐佢係咪真係一啲都冇鍾意過我﹐仲有梗係問佢﹐個SMS係唔係佢打啦.....之後佢答覆我﹐佢話佢真係有鍾意我﹐不過而家俾佢男朋友知道咗﹐佢覺得唔可以同我再維持住﹐呢個唔知咩關係嘅關係﹐所以要離開我﹐佢又話個SMS係佢男朋友打﹐不過SEND俾我之前﹐佢有睇過﹐佢覺得個SMS冇問題﹐所以就SEND咗俾我﹐佢仲叫我唔好再SEND信息俾佢﹐費事俾佢男朋友睇到....佢臨尾仲同我講SORRY, 佢話成件事錯嘅唔係我(我聽到佢SAY SORRY嘅一刻﹐我真係好想喊.....)﹐之後我問佢仲可唔可以做朋友﹐佢話做在心............

我而家每日都會好掛住佢﹐好想見佢﹐可惜......我雖然知道佢逢星期四收工都會去MK上堂﹐不過連去偷望佢﹐都唔可以......

成件事令我最HURT﹐就係"你以後都唔好再搵我喇"呢句說話﹐我之前行咗7年嘅女朋友﹐要同我分手嗰陣﹐都係對我咁講...唉.......2個先後係我最愛嘅人﹐都係用呢幾個字﹐去結束同我嘅關係......

心徹底地碎﹐化成灰燼........

作者: easy_man 時間: 2009-4-30 07:35 PM

睇完之後覺得無咩可以講,
只好講句,
祝你搵到自己ge 幸福啦.

作者: infjlam 時間: 2009-4-30 07:45 PM

呢個唔係你問題，佢唔係你真心人，
天涯何處無芳草，加把勁裝備自己，
有麝自然香，D女撲埋o黎添呀

你未搵到真正最愛，梗係會覺得之前果D係最愛喇...

作者: 17317328 時間: 2009-4-30 08:36 PM

堅強少少呀巴打
天下間傷心既事好多
留返d眼淚第時再流啦

其實呢段感情一早唔應該開始...
有時呢d野要有自知之明...
試諗下如果你有女朋友你女朋友出面又有一個咁既關係既男人
你會點?
當然人係自私的
冇話邊個一定錯晒做得出就唔會覺得自己衰特別係愛情  愛情係一樣冇保證既野
係愛情既道路上  錯既人緊有藉口  將自己變成對
忘記佢吧我地大家都知道係好難  但係  痛  總有一日會好
1個月? 3個月? 半年定一年有心忍耐  就一定可以過
呢段時期  搵其他野充下d時間吧

作者: ThomasKoon 時間: 2009-4-30 09:00 PM

唉…我真係好掛住佢呀…

作者: hung414 時間: 2009-4-30 09:12 PM

老兄
情緒有起伏就一定架啦

4#的兄弟都講咗啦...呢個時世...做d對自己有意義既事先啦

又或者可以順序聽吓以下既臃腫兒既歌
1 爭氣
2 流沙
3 心淡
4 心病
5 流淚眼望流淚眼
.....歌...自己搵啦....

其他人可以幫你打氣

但係要起番身都係靠你自己

你得既

作者: 17317328 時間: 2009-4-30 11:29 PM

原帖由 ThomasKoon 於 2009-4-30 09:00 PM 發表
唉…我真係好掛住佢呀…

忍一時風平浪靜
咁岩呢排我個fd 比條女一腳2船
雖然同你唔同
但係我都係叫佢忘記佢
佢用左1個月左右啦我諗
係痛嫁失眠頹呢d就緊係好辛苦
但係過左就冇事

作者: ThomasKoon 時間: 2009-5-1 12:33 AM

原帖由 hung414 於 2009-4-30 09:12 PM 發表
老兄
情緒有起伏就一定架啦

4#的兄弟都講咗啦...呢個時世...做d對自己有意義既事先啦

又或者可以順序聽吓以下既臃腫兒既歌
1 爭氣
2 流沙
3 心淡
4 心病
5 流淚眼望流淚眼
.....歌...自己搵啦....
其他人可 ...

我都知道.......但係呢一刻真係好辛苦.......好似我之前7年嗰個﹐就算分開咗3年﹐都仍然冇忘記過﹐直到呢個出現.......點知又係咁......

作者: Flea 時間: 2009-5-1 12:46 AM

當買個教訓囉

無辦法，我都試過咁。之後我發譬呢世都唔會搞Ｄ咩三角關係。

作者: hung414 時間: 2009-5-1 02:02 AM

原帖由 ThomasKoon 於 2009-5-1 12:33 AM 發表

我都知道.......但係呢一刻真係好辛苦.......好似我之前7年嗰個﹐就算分開咗3年﹐都仍然冇忘記過﹐直到呢個出現.......點知又係咁......

努力未必一定有回報
但成長就一定要付出

冇人叫你訓醒就乜事都冇
你可以慢慢做到的

作者: ThomasKoon 時間: 2009-5-1 03:24 PM

之前嗰個愛咗7年，最後離開我…3年後嘅今日，終遇上另一個令我深愛的人，幼稚地以為今次是上天彌補俾我…點知原來係玩我…愛上才知結果一樣…一個傷口被傷兩次……恐怕已失去再愛人的膽量……

[ 本帖最後由 ThomasKoon 於 2009-5-1 03:31 PM 編輯 ]

作者: 自由神 時間: 2009-5-1 11:56 PM