娛樂滿紛 26FUN - Powered by Discuz! Board

標題: 各行各業的禁忌 [打印本頁]

作者: dinx 時間: 2009-10-15 12:54 PM 標題: 各行各業的禁忌

戲班
原來係戲班演戲o既叫伶人
分:生,旦,淨,未,醜,貼,副,外,雜
生有小生,武生,旦有花旦,老旦,刀馬旦
淨有花臉,未將,醜角,(貼)花衫,副師,(外)老生,(雜)武二花。

1)上o左關帝的小生,在後台上不得開口說話,否則會褻瀆神明。
2)原來同騎師一樣,掛靴都有收山o既意思。
而伶人嚴守o既禁忌,就係禁洗網巾,
網巾用作戲子勒頭之用,
而洗網巾有告別亦有不祥之意。

咕喱
即係宜家o既搬運工人
禁忌方面,用膳後的碗碗碟碟,
係收拾時,一定要逐隻逐隻執拾
一定唔可以重重疊疊咁執,
如果唔係工作時會好易被貨物所壓。

戲院
其實我諗好多人都知
好多時有每當有新戲上演
戲院都會先影一場空場,
一來試o下條片,擴得順唔順,
二來就係俾o的『大佬』睇,
等上正場o既時候唔好同人爭位啦。

聽講以前全港最猛o既東成戲院,
每次試片都會坐滿『大佬』o架。

大廚
有兩個禁忌；
1)第一張單決唔可以是炒飯,瀨粉
因為炒有炒魷魚,瀨有瀨o野等不祥o既意頭,
所以一般廚房都會做蒸飯工作,有(蒸蒸日上o既意思)

2)中國傳統,重男輕女,
一般大廚都係男人o既job
所以大廚o既刀同鑊一定一定唔可以俾女人掂,
否則就會有血光之災。

風水大師
依一個禁忌,我諗絕對可以叫做唔講唔知。
原來係入行拜師之初,都要係『三損』之中選擇其一,
作為入門條件。
乜o野係『三損』？
『三損』為
絕子絕孫
終生貧困
折福折壽

原因係堪輿,風水與天機有關,
天機洩露,不得善終。

嘩,俾著我都唔知揀邊樣好？
仲要入得依行,無得百無禁忌,真係好囉命。

護士
1)忌係病人判除帽,因為與喪服類同。
2)護士盡可能避免與搶救垂危o既病人有目光o既接觸。
因為相傳如果見到反白眼o既話,就會被鬼魂寄存身體之內,
直至鬼魂自動離去才可倖免。

棺材鋪
開棺材鋪就梗係唔老禮,
最緊要o既兩個禁忌,就係
1)一定要係日落之前收工,廢事o的遊魂野鬼走入o黎啦。
2)一定唔可以貪得意訓棺材,生人訓死棺,你o地話又幾唔老禮喇。
俾錢都唔制啦。

記者
通常o的意外o既人通常都血跡斑斑,
面目全非o架啦,聽講話記者去到意外現場,
千其唔可以講好核突呀,對死者or意外者不敬o既說話,
如果唔係佢o地真係會跟住你。

空姐
以前o既空姐通常都會養龜,
寓意『歸』來o既意思,
因為好多時佢o地身在外地,客死異鄉就唔好啦。

理髮鋪
理髮鋪依定o野最多係乜？
鏡也！
中國傳統,鏡不祥也,
如果你唔小心打破鏡,我外婆話衰一年。
所以舊o既理髮鋪收工之前,都會將毛巾cover哂所有o既鏡先會收鋪。
就係廢事俾o的鬼走入去。

警察
我諗好多人都聽過喇。
就係無論點都好,晚上行beat,千其唔可以除帽。
所以你o地睇佢o地追賊都係按住頂帽去追o架。
點解關頂帽事？
聽講話帽頂頂花,好大殺氣,無鬼夠膽攪你。
仲有就係係凶殺案現場,都會莊住香先。
等被害o既『人』幫o下手,等佢快o的尋冤得雪。

演員
如果演員要拍死o既戲,
拍完之後就一定要囉利是,
囉o既時候導演仲要同你講,『做戲o既o者』
廢事o的鬼信以為真,咁你就大件事lu

導遊
帶團通常最多時間同團友一齊o既時間
就係係架巴士度。
係巴士度,導遊就梗係吹o下水,唱o下歌,講o下鬼古。
但聽講話如果去緊一間酒店o既journey
就唔可以講o果間酒店o既鬼古。
因為o的酒店閑閑地幾百年歷史,
覺得你對佢不敬就唔好啦。

搭棚
唔好睇小依個行業呀,好多裝修重建都係要搭棚o架。
搭棚師傅成800蚊一日,開足工幾皮o野一個月o架。
原來搭棚o既竹,分新竹同舊竹。
所有臨搭棚o既竹,都要莊香拜過1日1夜先可以上棚。
如果唔係就好容易會有意外咁話。

巴士司機
我都有聽過巴士司機,同版主講o既都差唔多。
之不過仲有一個禁忌,
就係話係車廠出車之前,響一次大『安』
目的都係叫o的朋友仔落車,俾o的晨光第一線照親就唔好啦。

救生員
老一輩o既救生員,都覺得有人遇難,
除o左泳術唔掂之外,都會覺得係水鬼作怪。
如果佢o地救o左一個人上水,就算真係無o左氣都好,
都要係佢o地耳邊不停講,
『你未死o架,你都未斷氣,快o的醒番之類o既說話』
目的就係想等o的水鬼信以為真,離開遇難者。
咁佢o地就可能會救得番。

騎師
騎師o既禁忌呢~~~
就係騎師裝束上任何一樣o野都唔可以『掛』,
尢其尢其係對掛靴(音-her),
掛her即係retire,離開馬場也。
聽講話幾年前有個好出名o既騎師唔信邪,
掛o左對靴,之後一落埸隻馬突然癲o左
個騎師跌o左落馬,斷o左條大骨
從此係馬場上拜拜。

麻雀館
1)麻雀館忌面對米鋪,原因米鋪日日開門o既時候,照例把米倒係米桶內,日日對住倒米壽星,係麻雀館大忌。
2)麻雀館忌用紅色,酒色財氣都係游魂野鬼喜到之地,而紅色本屬陰邪之色,故此更易招若鬼魅。

夜總會舞小姐
首先問大家一個問題
知唔知道最賺錢o既舞小姐係夜總會叫乜？
答案；紅牌阿姑。

所以佢o地禁忌就係唔可以借唇膏俾任何人。
點解？
唇膏又叫口紅
喂,大佬,借o的紅俾你喎！？
你肯唔肯喇？

歡迎光臨娛樂滿紛 26FUN (http://26fun.com/bbs/)