那朝早晨，我坐了香港開往上海的滬港直通車
（謹此向《那夜凌晨，我坐上了旺角開往大埔的紅Van》及王家衛致敬）

11號，4月11號，喺呢一日之前，我冇買港交所（388）；喺呢一日之後，我因為李克強一錘定音，決定「滬港通」開車，我決定跟住上車，心暗叫一句：「起飛啦！」

一切都係命運，坐係證券行入面嘅17個人，一開市就不問價，掃入一堆AH折讓股，近150蚊高追港交所。見到「折讓王」洛陽玻璃（1108）爆升、港交所爆升、券商股爆升，連唔關事嘅騰訊（700）都爆升，我開始懷疑，在這個世界上，還有什麼東西是不會爆升的？嗰一日，我聽人哋講，呢架叫「滬港通」嘅直通車係無BRAKE，佢只可以一直咁開呀開。

那一天，連我那一直未買過股票的朋友，都找我問，如果佢有十幾廿萬，我願意俾佢上車嗎？佢同每個人一樣，都會經過這個階段，見到一隻股升，就想衝一隻。

直至噚日，我對著報價機，港交所一隊就隊半成，「折讓王」洛陽玻璃（1108）瀉15%，較上周五高位挫逾三成，券商股就更加唔好提了，連唯一折讓的內銀H股民行（1988），昨日更重創8.2%。

直至有一刻，證券行內的大叔突然企起身：「大家無謂再呃自己話個市一切係正常，我諗大家係時候停一停，面對我哋見到嘅現實。」

至於LV袋不離身的女人亦說：「出事嘅唔只係AH股，可能係成個香港股市。」一個油頭毒X亦顯得慌張：「內銀股係咪有毒呀？係咪真係要離開？」

證券行內根本冇人冷靜到「我唔係上海人，我要沽！」「依家唔係係唔係上海人嘅問題，係買咗輪一沽清袋呀！」「半年呀！仲要等多半年呀！半年都未到，股價已經輸啦！」呢個時候，有人即時拎起電話，「我要打電話沽貨！」「無用架，我試過，打唔到呀！」

很多時候，一個人的性格，會影響他的職業。炒股最大好處是不用做決定。誰該死，時間，地點，個市早就決定好了。我是個很懶的人，我喜歡人家替我安排一切。一向沉默的我，亦站起來：「各位，其實由150蚊一入左港交所，我哋那熟悉的3萬點，已經唔存在。」

嗰一日，我聽人哋講，呢架叫「滬港通」嘅直通車係無BRAKE，佢只可以一直咁開呀開。但原來呢種無BRAKE直通車，一世只可以停車一次，就係炒嗰陣。