娛樂滿紛 26FUN - Powered by Discuz! Board

標題: 戇男馬明為黃心開竅，大破慳囊，元老點睇? [打印本頁]

作者: 地溝男 時間: 2017-3-11 12:21 PM 標題: 戇男馬明為黃心開竅，大破慳囊，元老點睇?

【東方日報專訊】天然呆小生馬國明可算現今娛樂圈碩果僅存嘅超級戇男，平日生活慳得就慳，慳埋慳埋買樓兼上繳阿媽，一直以來死做爛做，由《男親女愛》小強，做到《On Call 36小時》一件頭，雖然叫做終於出人頭地，但佢照樣只顧搵銀冇娛樂，頂多只係得閒落街踢吓波，再唔係就係匿喺屋企，以直男之身超誠實取用電腦，即係咩？即係匿埋睇鹹網囉！馬明甚至唔介意坦承佢呢種普世到爆嘅嗜好，任你笑佢太戇直，但如果佢話佢嗜好係做義工，最鍾意幫公公婆婆裝平安鐘，絕對唔上鹹網，最憎上鹹網，咪仲假到得人驚！
上天總是眷顧好心人，宅男馬明早排就被發現同黃心穎撻着，去咗太古城睇戲，又去銅鑼灣豪食冇4、5千銀都埋唔到單嘅日本料理，以往dating鍾意帶女返屋企，齊齊匿埋唔出街嘅馬明，依家唔單止出街，仲豪歎人均消費2千銀起跳嘅日本菜，一反佢「無事出街少破財」嘅理財哲學，被指係繼曾華倩、胡定欣、模特兒徐佳琦等「愛就宅一起」嘅失敗個案後，終於遇上黃心穎令佢深切開竅，明白到溝女點都要跌錢，但只要坎坷過後有訕搭，蝕底之後有拖拍，做人轉轉膊，自然「轉膊遇到愛」，又何妨為女玩破袋（慳囊）！
神女有心翹手埋身
就連心穎都以為43歲嘅馬明不但肯出街、肯使錢，仲告別埋着咗十年嘅sponsor免費衫，改穿Q版鐵甲奇俠卡通衫，戴埋鴨嘴帽扮young，自己呢勻仲唔得米？難怪記者一提到馬明，佢都難掩內心竊喜，一臉甜絲絲嘅春風樣！
實情係被指係圈中罕見筍盤嘅馬明有苦自己知，年屆43嘅佢，至今都仍未封盤，望住有「絕世好女友」之稱嘅唐詩詠，即將被緋聞情敵洪永城全面私有化，自己完全冇嘢可以做到，夜闌人靜，偶然諗起今後將再冇人甘願主動為自己剝蝦殼，都咪話唔自憐自傷！眼見心穎由幾年前開始，已經對自己採取天羅地網攻勢主動埋身，時不時喺無綫大騷借頭借路主動翹實影合照，仲上載埋instagram，當正自己男神咁拜，仲講到出口恨合作，慌死冇人知，終於被心穎恨到，唔只合作拍劇，仲獲馬明慷慨應約出街食飯、睇戲，完美演繹經濟學中嘅供求曲線！
潮服拉近15年距離
雖然家陣香港男女失衡已經去到每1,000個女人對925個男人，筍盤馬明大可奇貨可居，睇定嚟食，但反正依家大部分嘅現代愛情故事已經倒退到得番4個英文字母：「L.O.V.E.」，即係Luxury（奢華）、Optimize（優化）、Valuable（貴價）、Exaggerate（誇張），只要滿足到女人呢4個物質上嘅要求，例如食一餐奢華、優化、貴價、誇張嘅日本菜，你想冇拖拍難過有拖拍！
難得今時今日嘅馬明已經好似日本作家茂呂美耶話齋，由「平常做的都是一些不花錢的活動」嘅30代（30幾歲）男子，過渡而成「既成熟又有錢，既寬容又會玩」嘅40代（40幾歲）男子，着吓Q版卡通衫，戴吓鴨嘴帽扮young，回春做吓小鮮肉，用潮服拉近同心穎距離，為女玩破袋（慳囊），真係一啲都唔志在，事關人生最緊要好玩，食餐4、5千銀嘅日本菜，有個細你15年嘅對手陪你玩喎，點計都值，所以43歲戇男就算中年先嚟學做闊佬，一啲都唔遲！

圖片附件: 0311-00282-011b1.jpg (2017-3-11 12:22 PM, 166.4 KB) / 下載次數 0
http://26fun.com/bbs/attachment.php?aid=2859597&k=580f39289ae2c2e9336ee38eb21f3ac1&t=1732770120&sid=O7qrAv

作者: 地溝男 時間: 2017-3-11 12:22 PM

有錢有女真實版牙

作者: sarmsan 時間: 2017-4-3 09:34 PM

仲問,元老唔係表過態咩

作者: 自拍男 時間: 2017-4-3 10:38 PM

仲問,元老唔係表過態咩
sarmsan 發表於 2017-4-3 09:34 PM

元老口是心非系列

歡迎光臨娛樂滿紛 26FUN (http://26fun.com/bbs/)