娛樂滿紛 26FUN - Powered by Discuz! Board

標題: 陳偉霆福布斯排21位，年賺1.2億人仔，元老服未? [打印本頁]

作者: 港燦男 時間: 2017-10-10 11:47 AM 標題: 陳偉霆福布斯排21位，年賺1.2億人仔，元老服未?

本帖最後由港燦男於 2017-10-10 11:55 AM 編輯

早排公布嘅福布斯中國名人榜，范冰冰攞第一唔出奇，不過北上四年嘅陳偉霆，以年收入1.2億人仔位列第21位，我Nuts哥真係要講句：「深刻感受到陳偉霆嘅『底氣』！」佢嘅排名大幅拋離歌神陳奕迅、師兄謝霆鋒同「宇宙最強」甄子丹等不在話下，以港星嚟計，排名僅次於成龍及舊愛Angelababy，當日一句「而我不知道陳偉霆是誰！」嘅黃曉明，亦只係排名第17、多佢5,000萬咋！躋身內地小鮮肉之列嘅佢，論粉絲同叫座力都唔弱過黃曉明，睇嚟黃生都要改口：「乜又係你呀？陳生！」北上一個華麗轉身，陳偉霆做咗吸金男神，升幅就好似仙士股直升去紅底股咁喎！你或者會話：「超！好運嘅，撈四年有過億有幾奇？」查實佢入行已經有11年，16歲曾經幫郭富城喺港姐決賽中伴舞，但之後發現佢一個鏡頭都冇；18歲參加新秀奪冠並加入英皇，放棄去美國讀書，等時機正式出道，一等就等咗三年，呢三年佢日日返公司幫手剪報或者主持兒童節目，歌冇得唱，舞冇得跳。佢講過當時Down到成日飲酒夜蒲發洩，甚至離家出走。有日佢哥哥請咗個健身教練返嚟，令佢感動到喊出嚟，因為哥哥本身經濟同身體都麻麻，唔單止用咗一個月人工請教練，為咗鼓勵佢重新振作，仲戴住個血壓心跳測量器陪佢跑！

2006年，陳偉霆憑男子組合Sun Boyz正式出道，兩年後開始單飛發展，點知唱咗首《Taxi》，仲整咗部美國黃的嚟拍MV，網民評價好壞參半，封佢做「的士陳」，之後佢同蔡卓妍（阿Sa）一段姊弟戀，真係比粗口更難聽嘅批評都有！事業同愛情都畀人派Dislike，但佢呢位「的哥」冇被你一句「的士陳」嚇到「冚旗」，反而開行Turbo由香港踩到返大陸！四年前有人叫佢拍內地劇《四大名捕》，佢話當時聽到都打個凸，認為自己喺香港都未搞得掂，返大陸更加未必有運行，但當時謝霆鋒就點醒佢，話如果機會畀咗人，人哋成功咗，自己咪好唔抵？於是佢博一鋪北上照拍，拍到第二部內地劇《古劍奇譚》，憑「大師兄」一角喺內地爆紅，身價暴漲！

佢話部劇播咗冇幾耐，有日一條友返大陸開工，助手都冇個，點知落機出閘見有大批粉絲瘋狂大叫，佢驚到跑去洗手間Call救兵，呢刻佢先知自己真係得咗！講多無謂，數字最實際，舊年佢喺內地開巡唱，係人生第一個演唱會，首場門票30秒賣晒；前年佢豪擲2,700萬買北角半山千呎單位送畀阿媽，有傳佢依家手上至少有五個共值超過半億嘅物業！搵錢億億聲嘅陳偉霆，已經唔係「的哥」咁簡單，吸金能力咁強勁，叫「的神」仲啱聽！佢呢部的士，早更、中更、夜更全開，由香港開到去內地都未夠，支「的士旗」開埋去美國，舊年做埋國家美式足球聯盟（NFL）推廣大使，衝力勁過金仔射嘅導彈！等咗咁多年終於吐氣揚眉，人如其名，內地粉絲叫佢做「陳等等」，因為佢英文名Wai Ting，拼埋就係英文生字Waiting（等待）。陳偉霆呢期威到盡，不過話唔識佢嘅曉明亦唔輸蝕，前日同老婆Baby放閃慶祝結婚兩周年，仲上載囝囝「小海綿」嘅肥手仔照片示威添！

圖片附件: 1010-00282-010b2.jpg (2017-10-10 11:47 AM, 96.2 KB) / 下載次數 0
http://26fun.com/bbs/attachment.php?aid=2883476&k=046a95b6ff84b509cc24598115eb1b2a&t=1726954290&sid=f1680Z

作者: 港燦男 時間: 2017-10-10 11:58 AM

元老年賺150K

作者: t6t 時間: 2017-10-10 03:22 PM

超好運嘅taxi chan

作者: 港燦男 時間: 2017-10-10 03:24 PM

超好運嘅taxi chan
t6t 發表於 2017-10-10 03:22 PM

捱四年發達

歡迎光臨娛樂滿紛 26FUN (http://26fun.com/bbs/)