娛樂滿紛 26FUN - Powered by Discuz! Board

標題: 關之琳專訪︰感情世界：一塌糊塗！160212 點評? [打印本頁]

作者: 電騙男 時間: 2018-10-25 04:55 PM 標題: 關之琳專訪︰感情世界：一塌糊塗！160212 點評?

為左錢搞臭自己

關之琳（之之）算唔算一個幸福女人？經歷過兩段婚姻，1981年跟認識僅兩個月嘅富商王國旌喺拉斯維加斯閃電結婚，但婚姻只維持咗9個月，其後之之同台灣富商陳泰銘相戀，2015年離婚收場，多年嚟之之嘅緋聞無數，馬清偉、劉德華、劉鑾雄……等等等等，有極強嘅異性緣，連之之都覺得自己好吸引人，佢亦自爆好要面，好少主動追男仔，享受畀男仔追嘅感覺，之之話：「我係好吸引人，唔只異性，嗰啲係飄過嘅嘢，我覺得我好吸引人嚟搵我嘅，所以我會遇到好多機會，但睇我識唔識把握。」
點樣形容自己嘅感情世界？之之諗都唔使諗就話：「一塌糊塗！可能呢個係我嘅命，我嘅性格好執着，令到唔係好多人咁愛我，我要求嘅完美係冇㗎囉，所以活在一個唔係現實嘅世界上。」問到佢對於感情由始至終都係要符合完美標準？之之話：「係呀！其實冇㗎！我見到人哋可能表面好靚，其實好多嘢發生，我自己到依家都發緊夢，依家都一盤冷水潑咗落嚟，醒一醒啲，但我嘅感情都幾失敗，唔識handle。」
有冇諗過改變吓完美主義嘅諗法？之之話：「冇辦法，改唔到，我情願冇亦唔情願遷就，咁係開心，享受一個人，瞓一張床幾舒服，唔使顧嗰個人，要就啲細節嘢其實好攞命，識咗咁多人，拍過拖、結過婚，覺得原來同一個人生活係咁難，所以一個人幾開心，打橫瞓呀！」
之之對每段感情發展都有定律，但對一次又一次嘅失敗感覺厭倦，佢話：「要去了解一個人起碼5年以上，先可以了解同配合，過咗呢段時間耐性又減低咗，所以我唔係一個好好嘅女朋友。依家嘅愛情觀都變咗少少，我好自閉，除咗做嘢，就係返屋企、做運動，運動係我最大享受，我唔諗其他，嗰啲順其自然。」
之之同陳泰銘3年前離婚後一直單身，問佢仲會渴望有新嘅愛情？之之直認仲有陰影，佢話：「冇得渴望，佢嚟到就嚟，好合眼緣都要睇性格，如果性格咁（唔啱），真係好對唔住，我冇辦法就佢，所以依家一個人，暫時都幾好。我有時都好驚，唔好出現住，出現咗咪又要嚟過？算嘞，真係好攰嘞。」之之有美人基因，問到佢有冇諗過留後？之之就話：「冇呀，曾經諗過，但我驚最唔好嘅留咗畀佢就仲煩，嚟報仇！唔好嘞！我成日好負面，所以唔會生。」
言談間之之口中衷心多謝一位朋友，好奇下問之之呢個係咪「真命天子」？之之封口話：「唔講畀你聽！佢增加我嘅知識，開咗我嘅一頁……」
關之琳嘅幸福唔係嚟自無數嘅戀愛經歷，而係一塌糊塗過後更加燦爛嘅人生，我哋就期待之之有幸福嘅新一頁吧！
採訪：栐仁
攝影：小青
攝錄：海寧