娛樂滿紛 26FUN - Powered by Discuz! Board

標題: 藝人自爆撞鬼[+左] [打印本頁]

作者: kaixinren 時間: 2005-6-23 11:43 AM 標題: 藝人自爆撞鬼[+左]

俾鬼摸－陳敏之

　唔知係咪前排做o野做得太累，導致腦電波太弱。有晚睏o左冇幾耐，突然感到有一股力量壓住自己，不但全身唔郁得，連想叫出聲都唔得，好辛苦先睜開對眼睇到當時係半夜兩點鐘。過o左冇幾耐我又感覺有隻手好慢咁由額頭開始摸我，一直摸o左好耐，由於我已經好累，第二朝又要開早，所以我突然由驚變成憤怒，心諗點解佢咁耐都唔走o架！於是我用盡氣力叫到出聲為止，仲o係度狂鬧 o個隻o野，最後佢都走o左，之後我成個人都舒服晒！

日本猛鬼酒店－趙學而
　我出o左名大膽，所以每次出埠都一個人睏一間房，舊年我去日本工＊，同成班工作人員入住一間酒店，好自然地我亦係一個人住一間房，但有一晚當我睏睏o 下，突然感覺到左腳麻痺，跟住痺到上左耳，之後又到輪到右邊腳痺，同樣痺到上右耳，我成個人都郁唔到，想叫又叫唔出聲，惟有唸心經，過o左一陣，我以為冇事，但又感覺到有一隻似手又似腳o既物體踏住我個肚，我驚到大叫，今次終於叫得出聲，個人仲郁得到，我望o下個鐘，係早上五點零二分，我拿拿臨走落大堂坐天光，等o的工作人員起身，之後我聽番一位工作人員講，原來o個間係有名o既猛鬼酒店o黎o架！

「喃無阿彌陀佛」趕鬼－袁彩雲

　o個次係我首次去美國華盛頓玩，一踏入酒店房我已經好唔舒服，平時我一覺就睏到天光，但o個晚點都睏唔著，半夜仲突然間感覺到有個人影好快咁由我右邊床邊走到床尾，因為太驚，所以我冇起身望清楚，但就不停o係心裡面唸『喃無阿彌陀佛』，雖然之後再冇見到黑影，但第二日當我同隔離房o既朋友提及此事時，原來佢都有同樣經歷，後來我先知，原來o個間酒店歷史悠久，o係華盛頓打仗時期已經存在呢！

墳場鬼火－蒙嘉慧

　我有兩次恐怖經歷，第一次係細個o個陣，我全家住o係村屋，我同媽咪睏到半夜都同時聽到大門外有『人』拖住鐵鍊行路o既聲音，因為太驚，所以我o地最後都冇開門睇o下發生乜o野事。另一次係幾年前我同李燦森合作拍一套鬼電影時，有晚我o地去墳場拍戲，竟然見到有個荒廢o左o既墳墓突然著起小火，當時已經係凌晨五點幾，而在場o既工作人員亦一直冇行過埋去，點解會無端端起火呀？諗落都有o的驚！

凌晨四點耳邊響起單車聲－譚小環

有次我去大西洋城登台，當踏入酒店房間時，覺得渾身不自在，由於當時我先到過助手的房間後才入自己的房，在她的房間感覺並無任何不妥，但在自己房間就特別唔舒服，到半夜四點左右，我的耳邊突然響起單車鍊我聲音，但當時酒店外的街道很靜，連車聲也沒有，我心知不妙，便將媽咪給我的玉珮拿出來，過了約半小時後，便再入睡了。之後，媽咪每年都在泰國四面佛替我求一道符，給我隨身攜帶保平安。

學校內見鬼－車婉婉

我小學讀o個間學校以前係亂葬崗，所以成日有o的鬼故流傳，不過o個陣細個唔識驚，有一次仲同幾個同學暱埋o係廁所，諗住嚇另一個同學，點知等等o下見到一個白色物體經過，起初以為係幻覺，又以為係同學伸個頭出o黎嚇我o地，後來問番佢佢話我o地黐線，仲話頭先都唔得閒理我o地，o個陣大家先懷疑可能係見鬼呢！

水喉自動開關－黃泆潼

較早前我去o左泰國參與一部鬼電影o既外景拍攝，因為入住o個間酒店都幾舊，所以俾我o既感覺唔係太好。咁o岩大部份工作人員都住o係九樓，我則住八樓。

o係最初o個幾日都冇乜o野發生，但最後一晚我睏睏o下，就聽到洗手間傳出好清楚 o既水喉聲，起初好慢，後來就愈開愈大。o個刻都幾驚，我又唔敢望洗手間有冇o野，但係又睏唔著喎！之後等o左好耐，o的水喉聲先漸漸收細返。為o左保平安，我經常都會將呢道由朋友幫我求o既護身符放o係銀包o架！

夜半奪命鬼爪－薛家燕

小時候我住在鑽石山的石屋，有日我同家姐見隔離屋的阿伯將窗門的玻璃油上綠油，問他點解，佢話前一晚睏覺時見到有一隻爪在窗外猛抓塊玻璃，於是便油上綠油，如果再有爪抓玻璃，佢都唔會見到，咁就冇咁驚。點知第二日我們見到附近有救傷車，原來o個個阿伯出o左事，送去醫院後仲死埋添！不過到底阿伯係因病還是真係因o個隻爪而死就無從稽考，因為當時只有我和家姐知道有關鬼爪的事呢！

會彈的汽水罐－楊怡

好細個o既時候，有晚我坐巴士途經沙田某處，因為紅燈著o左，所以巴士停低等候， o係呢個時候，我望到街上一個汽水罐竟然直立式咁彈o下彈o下，每次都彈得好遠，而且仲彈到兩、三呎咁高，我開頭以為有人用線拉住個罐，但睇清楚之後，知道一定冇可能，因為附近唔只冇人，仲連一座建築物都冇，咁你話奇唔奇呀！

[ Last edited by 左輪仔 on 2005-6-23 at 07:46 PM ]

作者: kaixinren 時間: 2005-6-23 07:55 PM

一分？！！現在想得分真難！
不過也十分感謝！！

歡迎光臨娛樂滿紛 26FUN (http://26fun.com/bbs/)