娛樂滿紛 26FUN - Powered by Discuz! Board

標題: [散文小品區] 我的愛的故事(三十回顧) [卡+] [打印本頁]

作者: attaboy 時間: 2005-7-16 10:11 PM 標題: 我的愛的故事(三十回顧) [卡+]

中國人話三十而立。今年剛好係我而立之年，且咁o岩係我人生o既轉捩點。趁而家得閑，想借呢度小小空間，回顧一下我前半生o既愛路歷程。

話咁快就三十年o勒，以前覺得三十歲係好遙遠o既事，點之話咁快就出現o係自己年齡o個一欄度。咁多年以來，真正拍拖o既只有一次，認真追o既女仔就有兩個，成功率計落尼都有一半，雖則唔係好理想，但總算勉強合格。

先講畢生人唯一一個女朋友吧，已經係十年前o既事。同佢o既拍拖經過真係好似整定咁。十年前剛到袋鼠國讀書，第一個月就認識o左同班o既佢。雖然佢其實係讀低我一年o既，但係有Ｄ班就冇分一齊上。第一次見佢已經對佢好有印象，因為佢第一堂就同個Miss拗頸。我記得佢o地拗o既原因大概係，Miss問全班想唔想玩遊戯，而呢個女仔就問番Miss：咁會玩乜遊戲？但係Miss就話要先答佢想唔想玩先講玩咩遊戲，但係個女仔就話都唔知玩咩遊戲，答唔到想唔想玩喎。如是者兩個人o係呢個雞同蛋o既dead loop度僵持不下。結果係點我已經唔係好記得，但係當時就覺得呢個女仔好有性格，而呢類型o既女仔正好係最吸引我o個種......

[ Last edited by Rika on 2005-7-30 at 03:04 AM ]

作者: JCer 時間: 2005-7-16 10:32 PM

係咪重打緊???

作者: attaboy 時間: 2005-7-16 11:00 PM

......續前

上o左堂三個禮拜，越o黎越畀呢個女仔吸引，因為佢有著一切我喜歡o個類型o既特質。除o左有性格外，佢o既樣子亦都好標緻。相信所有男仔都知，一個女仔最先最能吸引男仔注意既地方就係佢o既外表（中年以上男人可能會注意身裁多Ｄ;>）。Anyway，在當時重係學生哥o既我o黎講，基本上冇乜去留意佢o既身裁。但係佢o既外表同佢o既舉止，令到剛結束七年男校生涯o既我已經覺得佢係我理想o既追求對象。但問題出現o勒，係人都知讀和尚寺出身o既男仔o係異性面前特別怕醜，況且我之前莫講話追女仔，同女仔交往o既經驗都少得可憐，要我自己想辦法追佢真係比要我想通相對論重難。好彩當年我係同一個中學老死一齊過去「岳士差呢亞」讀書，而當年尼講呢位老死真的可稱得上係情場殺手（因為佢讀完同校中五升唔到，去o左一間好多明星讀過o既商科學校讀預科。而o個間學校男女關係之複雜係出晒名，我呢位老死就o係o個度兩年練就一身冧女好武功）。咁理所當然叫佢幫幫我呢位情場新丁，而佢亦不負我所托，幫上我一個最大o既忙：幫我問呢個女仔攞電話，並且造就我同佢第一次o既約會......

[ Last edited by attaboy on 2005-7-16 at 11:25 PM ]

作者: attaboy 時間: 2005-7-16 11:08 PM

Originally posted by JCer at 2005-7-16 10:32 PM:
係咪重打緊???

係呀。我o既愛情經歷雖則次數唔多，但係都好長篇，特別係追第二個女仔時所發生o既事。我冇寫日記o既習慣，只係想o係呢度記底我自己o既故事，記得幾多打幾多，睇緊o既朋友請見諒，並非有心慢慢POST，因都是即打即POST。

作者: gn00751960 時間: 2005-7-16 11:22 PM

岳士差呢亞.........
唔識中文不如打返英文啦....=.=
袋鼠國係咪 = 澳洲啊?

作者: JCer 時間: 2005-7-16 11:50 PM

Originally posted by attaboy at 2005-7-16 11:08 PM:

係呀。我o既愛情經歷雖則次數唔多...

無所謂既, 慢慢打...
最好自己keep返個copy la, 日後睇返都好呀...

作者: attaboy 時間: 2005-7-17 12:30 AM

Originally posted by gn00751960 at 2005-7-16 11:22 PM:
岳士差呢亞.........
唔識中文不如打返英文啦....=.=
袋鼠國係咪 = 澳洲啊?

側聞香江特別神經雞......對不起，應是行政區學子之兩文三語每下愈況，但聽君此言，想君國學定必深厚。區區雖身在異邦，但心仍無日不懷故國，亦偶有涉獵中國文學，如若不吝，何不與君在此切磋琢磨，好教各方有識之士得知特區之大，並非無人。且在此杏壇施教，廣播中華學問，春風化雨，桃李花開，則區區之幸，特區之幸。君以為然否？

然君以岳士差呢亞一語斷定區區中文之高下，則未免武斷。蓋區區並非不知澳洲乃港人對AUSTRALIA之稱（國內同仁則稱為澳大利亞），實此乃區區之行文作風，然耶否耶，當難定論。且袋鼠乃澳洲之獨有珍禽，此乃常識，區區如應此一問，則未免彌彰閣下之無知，如此損人之事，區區素不欲為。

Yet if you think you would feel more comfortable if reading my story in English, fine, I am okay to tell the whole story in English. Though I don't think my English is any better than my Chinese. And I may need your help to translate my story to Chinese. Do you think you can do that for me?

[ Last edited by attaboy on 2005-7-17 at 12:40 AM ]

作者: gundamman678 時間: 2005-7-17 01:03 AM

閣下所言有輕蔑港人之嫌......

小事吧了，用不著這麼勞氣吧?

[ Last edited by gundamman678 on 2005-7-17 at 01:04 AM ]

作者: brightlee 時間: 2005-7-17 01:07 AM

Relax,
I am listening to your story
Plus, thanks for your sharing, about your personal life.....

作者: attaboy 時間: 2005-7-17 01:30 AM

Originally posted by gundamman678 at 2005-7-17 01:03 AM:
閣下所言有輕蔑港人之嫌......

小事吧了，用不著這麼勞氣吧?

[ Last edited by gundamman678 on 2005-7-17 at 01:04 AM ]

確是小事。但何以見得我勞氣呢？雖然我o既脾氣無可否認係唔好，但係以文字作媒介時我只會以事論事。至於輕蔑港人，見笑啦，我何德何能，留番畀曹捷啦。只不過有一句話好值得深思：夫人必自侮，然後人侮之；家必自毀，而後人毀之；國必自伐，而後人伐之。中國人聽到人家批評往往唔會去理有理冇理，只係會即時反應當對方係仇人。有志氣o既人，係會首先反省，諗下被批評的地方是否真的有待改善，再痛下苦功，證明畀批評你的人睇你o既本事。一個人咁樣先至會有進步，一個國家咁樣先至會有進步。

作者: gundamman678 時間: 2005-7-17 01:40 AM

Originally posted by attaboy at 2005-7-17 01:30 AM:

確是小事。但何以見得我勞氣呢？...

哦? 閣下可要看真我所說的話喔! 之前說話得罪你之人可不是我，而且閣下所寫之中文英文，我看得懂有餘，哪你叫誰先反省?

然而閣下可真要小心為上。我好言相勸，閣下就像神經過敏一樣，似乎犯下你自己所說出的"中國人犯的毛病"的人是你自己。

看你的post是俾面你，不是看你說這些的。請你繼續寫post吧。

[ Last edited by gundamman678 on 2005-7-17 at 01:44 AM ]

作者: attaboy 時間: 2005-7-17 02:07 AM

......續前

好啦。繼續我的故事。

當時其實重有一個禮拜便會同o個個女仔分班，即一個禮拜後便冇機會一齊上堂，但係我連一句說話都未同佢講過。惟有想藉口啦，咁做同學仔最好攪Group Function去約人，我就諗住攪個巴別橋借頭借路去識佢，但係想係好理想，但到真係要開口時，個心不其然係咁跳，開唔到口。本身我個人雖然比較好靜，但都唔算怕醜o個類，我係o個種讀中學時成日同阿SIR頂頸之人（所以當見到o個個女仔同Miss嘈，不期然諗起以前o既我，亦即產生共鳴）不過廿歲前我真係好少機會接觸女仔，所以當面對佢時真係好唔自然。好彩呢個世界有樣o野叫朋友，朋友之為物，最重要係o係有困難時互相幫助。咁我o係o個個無助o既時刻好自然叫我的中學老死出馬，在佢o黎講亦只不過是舉手之勞。睇住我個老死輕輕鬆鬆行埋個女仔度，同佢講我o地禮拜六有個Barbecue喎，你地（個女仔重有兩個女同學）有冇興趣一齊o黎呀？只係聽到O個個女仔（辜且以下稱佢為Minnie，係假名，故事係真但我唔想影響其他人o既生活）話：我要問我另外兩個Fren喎，咁啦，你畀低電話我，我問完佢o地再覆你啦。咁我o既老死既然稱得上殺手，呢個時侯點會放棄大好機會問佢攞番電話。只係聽見佢講：哎呀，我o地（指我同佢）有時可能唔o係屋企喎（當年手機並未普及),不如你都留個電話畀我，如果禮拜五晚都等唔到你CALL，我o地便CALL你，OK？只見Minnie好自然寫下電話然後離開課室，睇住佢個漸遠背影，o個一刻我從心裡面笑咗出o黎，o個一刻亦都係我人生裡面其中最快樂o既一刻......

作者: attaboy 時間: 2005-7-17 02:25 AM

Originally posted by gundamman678 at 2005-7-17 01:40 AM:

哦? 閣下可要看真我所說的話喔!...

啱o既，因為我都係中國人。現正努力去中國化。老實講，我之前回你所講o既並唔係針對你，只係我生活在香港／中國人圈子廿多年o既所見所聞，有感而發而已。我本身係好惹火，讀書時同阿SIR嘈，打工同老細嘈，上到大陸同公安嘈，去街同Ｄ黑口黑面SALES嘈，返到屋企同阿媽嘈。今日我剛回到一個我認為最和諧，最唔駛勞氣o既地方生活。我唔想再有任何爭端。而家我o係度只不過當寫日記咁記下我的前半生，我唔想再生枝節，有興趣觀看o既朋友，多謝賞面，但請勿在我完成我的故事前打擾，在此先行謝過！

[ Last edited by attaboy on 2005-7-17 at 02:34 AM ]

作者: attaboy 時間: 2005-7-17 05:01 PM

......續前

攞到電話後，當然就要靠自己了。當晚我就鼓起勇氣打電話畀Minne，o係電話度傾我覺得輕鬆自然得多，唔似面對面時唔知講乜咁樣。點知第一個電話一傾就兩個鐘，我都估唔到。o係電話裡面，我o地互相介紹自己o既背景，暢談剛到這個新地方o既所見所聞。唔知係天意定真的是緣份，傾到差唔多要收線時佢問我今年幾多歲，我諗一諗，咿，聽日就係我生日喎（因為我本身並不重視生日，並沒有慶祝生日o既習慣，所以亦唔為意）。咁我好自然答佢，哦，聽日就２１歲o勒。當時佢好奇怪，以為我講笑，問：咁你咪聽日生日？我話係吖。佢跟住問我會點慶祝，我話冇喎，我都唔慶祝生日o既。佢更覺奇怪，同我講，唔得喎，２１歲生日係大日子o黎喎，點解唔搵人同你慶祝？我話，嘿，o岩o岩先黎到，搵鬼同你慶祝咩？佢問：咁同你一齊住個男仔呢（指我中學同學）？我答：唔通兩條友仔自己去撐枱腳咩？咁異相。此其時，我突然間醒起我o係想追佢o架喎，大好機會擺o係眼前，點解我重o係度講埋Ｄ無謂o野？即刻把握時機同佢講，咁如果你肯出o黎同我食餐生日飯，我便約埋阿Jean（我老死）一齊食飯，好嗎？佢當時o既反應好似冇乜所謂咁，同我講：咁呀，OK啦。咁你o地會去邊度食呀？我擔心太遠我返唔到屋企喎。（因為當時大家都冇車，而係袋鼠國冇車呢就代表你邊度都唔駛去，因為巴士七點鐘就尾班車，而且等車通常要等好耐。而我當時又住到冇雷公咁遠，住係ZONE 3，即CBD係ZONE 1,類似中環，ZONE 3就似去到元朗咁。）但係我都唔知點解當時同佢講，o係我呢頭食啦，我會CHECK BUS TIME TABLE，保證你一定返到屋企。咁佢話，係先好喎。我話得o勒，你放心。事後回想當時可能太鹵昧，第一次同人出街就SUGGEST去Ｄ咁遠同山卡罅地方，好易嚇走人。但係Minnie當時一口答應，等我重以為佢其實對我都有意思。但係拍拖後問番佢，原來佢當時唔係對我有特別好感，只不過佢覺得同人慶祝生日係禮貌o黎。但點都好，o個一刻佢答應出o黎，畀咗好大信心我放膽去，而我亦都成晚瞓唔著去倒數明天這個重要約會的來臨......

作者: 心冷之戀＊行 時間: 2005-7-17 07:27 PM

等待ｉｎｇ．．

作者: attaboy 時間: 2005-7-17 07:42 PM

......續前

好不容易等到第二日o既三點鐘。我約咗Minnieo係火車總站等（其實當地冇地鐵，火車即等如香港o既地鐵。）o個日佢遲咗十五分鐘，冇所謂啦，約女仔預咗要等。只見佢匆匆忙忙出現，連說唔好意思，佢話去買禮物揀耐咗喎，跟住係袋度攞張卡出o黎話祝我生日快樂，張卡係Hallmark既Forever Friends生日卡，普通生日卡一張，佢係上面寫了Happy Birthday字樣。跟住我同佢同阿Jean就上火車去我o地住個頭，車程大概九個宇倒，係火車度我o地三個傾下閑偈，阿Jean亦好努力幫手打開話題。四點幾到咗我住o個邊個火車總站，但因為冇理由咁早食晚飯，所以就帶Minnie係火車站周圍行下（o個度有少量商店）。到咗五點，我o地三個去咗火車站度一間香港人開o既餐館食飯，席間都有講有笑，氣氛都幾輕鬆。食到六點幾，因為尾班巴士我查過係七點半，所以雖然可以坐耐Ｄ，但都叫埋單。之後阿Jean好醒水話佢自己有o野做返屋企先，同Minnie話我會送佢撘巴士。Minnie亦冇異議。咁我就得到咗同佢第一次......單獨相處o既機會o勒。我同佢係巴士站邊等邊傾，佢講好多佢o既o野我聽，佢係家中孻女，咁o岩我又係家中孻仔，遇到好多處境都一樣，故此亦不乏共同話題。談話間我知佢原來只有十七歲半，比我細足足三年半（因為我係考完A LEVEL先過去讀書，而佢就考完CERT過去，所以o係學校雖則差一級，但實際年齡就差三年半）。傾傾下，睇下表，咿，七點八囉喎，點解車重未黎，當時我其實都唔係好care架車o黎唔o黎，但見Minnie開始成日望表，知佢趕住返屋企，我就問佢，怕屋企人擔心呀。佢話唔係呀，佢自己一個人住，但Daddy同Mommy每日都會o係香港打電話過o黎睇吓佢生活成點，典型小家碧玉既女仔。咁我話：哦，等我打電話問下我個Fren先，佢係呢度人（即移咗民過去個邊，並唔係留學生，其實亦係中學同學）。我個Fren話，你等緊邊架巴士呀？吓！呢架六點半就冇車囉喎！我話我查過唔係七點半咩，佢話七點半係另一架o黎o架，唔係經你而家o個個巴士站o架。而家乜車都冇架啦。我問：咁點算？佢話，冇啦，我又唔o係你o個頭，唔係過o黎車你o地，而家一係我幫你call的士啦，你o係番個巴士站等。我連忙同Minnie講唔好意思，搞錯咗，不過你放心，我話保證你返到屋企，一定keep promise。十分鐘後，的士到咗，我同Minnie話不如我送你返去啦，我唔係好放心。Minnie話：咁你點返o黎呀？我話原車去原車返咪得囉。佢話唔係幾好，我話唔緊要。咁佢亦冇堅持，我就同佢一齊上車，廿分鐘後到佢屋企，咁我就冇落車，淨係同佢講拜拜，跟住坐番同一架的士返屋企。

[ Last edited by attaboy on 2005-7-17 at 07:51 PM ]

作者: attaboy 時間: 2005-7-18 03:07 PM

......續前

返到屋企，由於前一晚冇瞓，加上我每日係要朝早六點半起身返學（等車加撘車要個半鐘一程），所以就算心情興奮，亦都倒頭便睡。第二日一放學，就即刻返屋企打畀Minnie（o個日冇見到佢，因冇堂一齊上）。我o係電話度同佢講o尋日唔好意思，自己大意check錯time-table，我話要請佢食餐飯當賠罪，佢當然話唔駛啦，咁我話唔得，點講都係我唔好，一定要做Ｄo野補償，o係我堅持下，佢話飯就唔食啦，但係如果我一定要賠罪，就去幫佢搵一隻Disney卡通人物糖啦，我話o係邊度有，佢話香港就好多，但o黎到依度就未見過。我當時諗，死o勒，女仔野我從來唔留意，重要搵隻佢都搵唔到o既糖，死得啦。但係口講當然話一定幫佢搵到啦。收咗線後，開始諗辦法，剛o黎到人生路不熟，都冇計喎，唯有等阿Jean返歸，問佢有乜計。但一諗到阿Jean，咪住，我突然想起一樣野......之前講過阿Jean係少女殺手，佢當然有好多女仔朋友，其中有Ｄ除咗成日寫信畀佢外，重成日寄o野過o黎比佢，大部份都係Ｄ精品，擺設，小玩意等，有時就會寄Ｄ朱古力同糖。但阿Jean係唔食junk food既，所以每當佢收到糖時，都會放係廳度畀其他人食。於是乎我即刻衝出廳，搵下有冇Minnie講o個隻老鼠糖，一搵之下，bingo！呢次重唔係整定，唔單止有，重有兩款，每款兩包。雖然我唔信上帝，但o個一刻除咗多謝神外都唔知多謝邊個。等到阿Jean返黎，禮貌上都要問准佢先攞，阿Jean 當然樂得我攞去，因為Ｄ糖在佢o黎講完全冇用。但係o個個時候在我o黎講，Ｄ糖比黃金重要緊要，連忙謝過阿Jean，馬上打電話畀Minnie.....

作者: attaboy 時間: 2005-7-18 06:12 PM

......續前

電話通o勒，因為諗住畀個surprise Minnie，所以詐諦話問過Ｄfren冇人知o係邊度有個隻糖買。Minnie話都冇所謂啦，佢都知難搵，我話不如都係請番食飯算o勒。佢就話唔駛，我話唔好啦，求其食餐啦，唔係我過意唔去。o係我堅持下，Minnie終於免為其難答應。咁就約咗佢第二日放學去city食。第二日一放學，即刻去學校門口等佢，呢次佢好快出現o勒。我同佢去咗Hungry Jack's度食，即類似McDonald's既當地連所店，順帶一提，我覺得HJＤ野食好過麥記好多。我o地叫咗兩個Whopper餐。好快食完，我話順路（實情都好唔順）不如送佢返屋企，咁佢都冇拒絕。我地就一齊撘電車向佢屋企出發。當架車行到中途時，係時候o勒，我話其實我帶咗Ｄ野畀佢，但唔知o岩唔o岩佢心水，佢就好奇怪問：咩o黎呢？呢個時候我就施施然o係衫袋度攞出殺手諫。吓！好靚好得意喎，你o係邊度搵o架？Minnie直頭開心過六合彩。我話：乜你唔係話要呢隻糖咩？佢話：係就係呢隻卡通，但呢隻糖連我都未見過喎，佢比起我買開個隻重得意呀。個天對我實在太好o勒，一切順利到不能置信，我已經決定落車後向佢表白。車停o勒，我話重早，不如陪佢行埋返屋企，呢個時候我話乜佢都唔會反對。去到佢屋企，坐咗陣，一路諗緊點講，但Minnie時不時望住Ｄ糖o係度偷笑。我又唔知點開口o勒，坐到五點半，非走不可o勒，唔係冇車返屋企，諗住今日都冇機會講。算吧，都係走先，同Minnie講話要去撘火車。佢話我第一次黎呢頭，認得路咩？我話，唔認得o架，你話我聽點行咪得囉。佢話，其實都好易搵，但係我怕你搵耐咗趕唔切，不如我帶你去吖。緊係好啦，我心諗。咁佢就同我一路行去火車站。十分鐘既路程佢都行到好貼近我。我當時十五十六，好冇o係呢個時候拖佢手呢？但係諗諗下，識人唔夠一個禮拜，會唔會太唐突呢？都未諗掂，Minnie突然話：到o勒，呢度就係火車站。唉，點解個站唔起遠Ｄ呢？但係都未絕望，因為Minnie話陪埋我等車。實在太好o勒！我o地坐低咗，呢個時候我終於捉住佢隻手，但就唔敢望佢。過咗一陣，我感覺到有Ｄo野挨咗落我個膊頭度，係Minnie個頭呀！Yes！我成世人o既初戀就係咁開始咗......

作者: attaboy 時間: 2005-7-19 10:12 PM

......續前

或者上天都係公平o既，追Minnieo既過程順利無比，但係往後o既日子原來先係難行o既......
首先，Minnie同我講，佢屋係好嚴o既，以前o係香港，佢絕不能遲過十點鐘返屋企，咁我話o係呢度你屋企好難check你喎。但佢話，都唔得o架，Daddy同Mommy每晚八點就打電話過o黎，如果冇人聽會一直打到有人聽為止。咁呢樣都冇乜所謂，但佢跟住又話，同佢出街唔准拖手．吓！乜拍拖唔係就係要拖手咩？唔拖手究竟算唔算拍拖呢？佢話佢都唔想，但係佢有好多親戚o係o個度，如果撞到，佢ＤUnlces,Auties一定話畀佢屋企知。咁......咁都又算。重有佢話我行路太快，佢跟得好辛苦，要我以後行街唔准過佢頭。呢樣頭痛o勒，我個人不嬲心急，就算同成班男仔Frens行街，我永遠一支箭標o係前面。要我就住就住行，又唔畀拖手，咁其他人睇落咪變咗我係佢個跟班？唉，都算，冇理由為呢Ｄ小事而拍唔成拖o架？都應承。但係最辣o既並唔係佢Ｄ要求，而係，我同佢Ｄ性格太似。由於佢屋企都就晒佢，佢係好大小姐脾氣o既。而我係來自潮州人家庭，屋企錫仔唔在講（所以男o既潮州人都好大男人），加上我係排行最細，更加由細畀人縱到大，老實講以前我都十分少爺仔脾氣。大小姐配少爺仔，睇戲就好理想，但係現實裡，嗌咬炒大鍋就變咗我同Minnie最大o既節目。拍拖頭半年，幾乎三日一小吵，五日一大吵。咁點解日吵夜吵又要繼續拍呢？老土Ｄ講句，因為我同Minnie都係真係好鐘意對方，而且呢次拍拖都係我同佢o既初戀，所以大家都好珍惜。每次嘈完，都好快冇事。但係其中有幾次真係爭Ｄ掹都掹唔番。第一次發生o係我同佢拍拖第三個禮拜時，我犯了男朋友其中一個常犯o既嚴重錯誤......咪誤會，唔係有第二個，當時o既我重未有呢個本事，而係隨便提分手......

作者: attaboy 時間: 2005-7-20 08:26 PM

......續前

件事係咁o既。拍拖冇耐，有晚同Minnie傾電話，我突然諗起我冇佢o既相，好自然叫佢畀張我keep。但係佢死都唔肯，軟攻硬攻咗成個鐘佢都唔肯。問佢點解，佢話佢手頭有既都影得佢唔靚，因為o個o的相佢之前都畀過我睇，我覺得好靚喎，冇問題喎。但係佢就真係點都唔肯應承畀張我。於是冇乜耐性o既我衝口而出；真係唔畀就不如分好啦！電話o個邊即時靜晒，然後過咗五秒彈回一句：分咪分囉，係你話o架！跟住收咗線。再打去，冇人聽，再打，有人聽，再打，電話唔通o勒．一直都唔通o勒。咁係咪即係正式辦妥手續分手啦？唔駛再畀$888阿超人律師做paper work呢？但係過咗一陣，o弊，好似有的感覺湧上o黎，係......係一種失落同唔拾得o既感覺，過多一陣，越o黎越強烈。死勒，唔捨得咁點算好？唯有Tum番Minnie啦，應該唔係好難o既，因為成日都要做，熟晒手o勒。第二日，recess去搵Minnie，唔睬。放學o係學校門口等佢，掂行掂過，當見我唔到。事態開始嚴重o勒，因為平時佢嬲極都會睬下，等我有機會say sorry，但今次連同佢講o野o既機會都冇，點算？唔通我o既初戀就只係維持三個禮拜？於是諗下辦法......有！記得Minnie同我講過每日返學前都會特登遲兩三個站落車，去City一間專賣卡通人物公仔o既鋪頭個window度望一望O個隻比真人重要大O既Disney老鼠公仔，之前聽佢講時本來諗住等佢生日先送畀佢，但係而家唔買，都唔知重有冇幾會O係佢生日時送畀佢。好！一於咁話。去到間鋪，問下價，七百五大洋，即要成四千二港紙。o係當時重係學生o黎講o既我實在係天大數目。但算啦，自己都有積蓄，鬼叫激嬲人咩？去禁機，有冇搞錯，限額每日五百蚊？！當時四點幾，銀行又柵咗，但係我唔係好等得到聽日喎。一來我份人心急，二來如果o個日唔Tum番佢，我o個晚實瞓唔著。再想辦法，又有，南半球最大o既Casino就係附近，唯有將我o既命運交畀個天，畢竟o係追Minnie時佢都好睇我，希望幫埋我呢次啦。去到ｃ字賭塲，心諗：有五百蚊o係手，雖則話博都唔可以輸晒。權衡best case同worst case後，決定攞二百五出o黎，double 馬上走，因已經夠我所需；輸咗亦馬上走，用剩低o個二百五買隻細o既公仔畀佢啦唯有。唔駛十個hand已經turn out係best case，證明個天都重係好眷顧我同Minnie，既然個天對我咁好，我都唔可以令佢失望，話咗夠就走，咁就即刻飛去o個間鋪頭買咗隻老鼠。個女sales好驚訝，因佢估唔到我真係番轉頭買，佢話o個隻大公仔擺咗係度都好耐o勒，而佢地只係入咗一隻，因為個個見到都好鍾意，但係問完價錢就唔再見人，我話係呀！今日我女友生日，咪諗住畀個surprise佢囉（唔同佢講前因後果，費事佢問長問短阻我時間）。買完拖出門口，係呀，真係拖，因為隻公仔重大隻過我個人，我本身都唔矮，都有五呎十一，但隻公仔雖則高唔過我，但係因為佢個姿勢係坐o係度o既，如果佢識起身o既話一定高過我，咁拖住都好吃力，兼且街上o既人都望住我，登時有o的唔好意思。心諗：點樣送隻老鼠去Minnie度呢？都係坐的士，唔係沿路不知重有幾多奇異目光。但係o個度唔係香港，唔係通街隨手伸一伸就有的士飛撲埋o黎。唯有守株待兔啦，等呀等，等咗三個字都冇車，突然見對面馬路有人o係的士落車，本來想一個箭步過去，但係忽然醒起唔可以丟低隻老鼠喎，畀人攞咗去點算？但係又冇埋由眼白白睇住架車走o架？呢個時候，眼見有個鬼妹眼金金望咗隻公仔好耐，係你啦！我即刻向佢招手，佢好開心行埋o黎？我就話：Excuse me. Today it's my gf's b'day. I'm going to give her a surprise......u see, this giant soft toy. I need to catch a taxi now. Could you go over there and get that one for me? 鬼妹答：oh! really?! sure. o的鬼真係好人到冇得頂，如果我有多隻士啤，實送畀佢作為報答。唔駛三個字，車已經去到Minnie屋企門口，呢個時候，眼見Minnie剛剛o係老遠行緊返屋企，我好開心馬上畀錢個司機，然後從車頭落車。Minnie一見到我馬上想拎歪面，但係我趕快係後座抬阿老鼠先生出o黎，Minnie一見到，先係愕然，然後傻笑，走埋o黎問我：你o係邊度搵番o黎o架？我話：咪日日你見到佢o個度囉！咦！做乜肯睬我o既，而家你應該係嬲緊我o架喎！Minnie畀我提醒，登時話：係喎！我應該唔同你講o野架喎！我話：係囉，咁你唔同我講o野，我唯有帶埋佢走啦。Minnie：咪住！而家我好開心，唔得閒嬲你，第日先再嬲過。唔好企係度啦，入去我屋企先啦。我：哦！心諗：係咪女仔都係咁，見到毛毛公仔就乜都唔記得晒？入到屋，Minnie問：你買咗佢呀？我話：係呀！Minnie:咁幾錢？我：七百五囉。Minnie:吓，咪成四千幾蚊？我：係呀！跟住我冇諗過既事情就發生：Minnie喊咗出黎！我冇諗過要搞喊佢喎，成世仔天不怕地不怕，最怕女人喊！都唔知乜反應好？唯有借個膊頭佢用啦。Minnie喊住講：都係我唔好，累你徙咁多錢，以後我都唔會嬲你架啦！我諗：oh! really? 本來肉赤o既感覺登時變做物超所值o既感覺（如果佢講o既o野係算數o既話）......

[ Last edited by attaboy on 2005-7-20 at 08:37 PM ]

作者: bioamen 時間: 2005-7-20 10:18 PM

I love your story, more plz, support

作者: attaboy 時間: 2005-7-20 11:16 PM

Originally posted by bioamen at 2005-7-20 10:18 PM:
I love your story, more plz, support

Thanks for reading. But I type much slower than I speak. I will finish my whole story here. At least tell 'til the end of chasing the 2nd gal (which would be much longer and more I can learn for what a (hk)gal thinks in love affair).

作者: attaboy 時間: 2005-7-21 01:25 AM

......續前

o係Minnie屋企留到過晒鐘，要走o勒，唔係唔駛番屋企：因為冇車o架o勒。雖然以當時既情形睇，唔走，Minnie都會畀我留o係佢屋企過夜（之前從未試過），但係我雖然不敢自稱君子，但係亦唔鐘意o係人脆弱時佔便宜，況且我係唔鍾意隨便o既女仔，所以好快咁跑去火車站搭火車。到站o勒，但係已經七點幾，冇巴士轉車，唯有搭的士。呢次唔駛等，因為火車站度永遠有條的士龍等客。上咗車，心情興奮但係有o野諗：究竟頭先Minnie話以後唔嬲我係咪認真呢？我本人對承諾係好seriouso既，觀乎Minnie講時o既神情，唔似講玩笑o既喎，但係依我所認識o既佢，似乎係好難做到呢點o架喎......突然我醒起一樣o野，我係好鍾意睇金庸o既小說o既，我o的中文都係o係佢度學返o黎，阿張無忌個老母（注意：母字o係呢度唔好用高聲讀，要讀低聲先係好禮貌既稱呼-->o係古文o黎講）殷素素臨死前交帶阿無忌仔唔好信女人，而且越靚o既女人就越唔好信。雖則阿素素姐都係女人，如果阿無忌take佢o既adviceo既話係會變成paradox。之但係念在素素係佢阿媽，阿媽係唯一唔會跣你o既女人o黎，所以可以excempt。咁信Minnie定無忌媽好呢？雖則我同無忌媽素未謀面，但係我係好佩服查先生o既，佢o既小說好睇係因為佢人生經驗豐富，而且佢又熟讀史書，所以寫出o黎o既o野係同真實世界好吻合o既。咁如果信佢，咪唔可以信Minnie？但係Minnie係我女友o黎喎，冇理由唔信佢o架？咁......咁......究竟信邊個好？但係唔駛過好耐，我就知道邊個信得過o的啦......

[ Last edited by attaboy on 2005-7-21 at 01:37 AM ]

作者: bioamen 時間: 2005-7-21 11:11 AM

oh, I'm not telling you to write faster, I can wait, you have all the time you need............but just I'm just glad that you're sharing you story with others, I can also learn somthing from it.~!!!

作者: attaboy 時間: 2005-7-21 12:39 PM

Originally posted by bioamen at 2005-7-21 11:11 AM:
oh, I'm not telling you to write faster, I can wait, you have all the time you need............but just I'm just glad that you're sharing you story with others, I can also learn somthing from it.~!!!

我自己都好想打得快o的，因為我過埋七月會冇咁得閒，同埋差唔多成十年冇打咁長o既中文o勒，所以好多字有時要諗好耐先記得點打。但唔用中文又唔傳神，盡人事啦。其實講我o既故事出o黎都係覺得，大部份男仔都成日唔知女仔諗乜，正如十年前我真係冇諗過原來有o的野女仔係咁諗o架喎，今日o係認識過話多唔多，話少唔少，同唔同類型o既女仔後，總結經驗，查找不足，希望年青一輩唔好再犯o的我犯過o既錯。話晒當年上帝造女人出o黎係要o黎幫阿當解悶，而唔係差遣個女仔o黎玩佢o麻。

作者: attaboy 時間: 2005-7-21 01:18 PM

......續前

之後每日我都間唔中諗下o個個信邊個好o既問題，但不出三日，Minnie己經畀答案我o勒：佢又發氣啦！雖則係小發，但係呢次對我o黎講意義好重大。我問佢：吓？！乜你唔係話以後都唔發我脾氣o既咩？點知佢o既答法係好神奇，好似睇緊迷離境界咁：有咩？我幾時有講過呀？我：o係我送隻公仔畀你o個日，即係三日前，幾日喳喎，咁快就唔記得？Minnie：真係唔記得喎，但係就算講過都o係個日o既事啦，都過咗去。心諗：吓？！咁都得！？好在我唔係同佢做生意o即，如果唔係實聽破產都得啦！不過都好，證明查先生的確係有先見之明，嗯！以後我會緊記阿張太o既遺言o勒。同埋，諗深一層，阿張大俠無忌就係當阿媽講o既o野係耳邊風（正如大部份做仔o既一樣），所以先畀阿朱九真，周芷若，趙明，朱兒輪住o黎玩，小昭好o的，都叫做冇立心玩過佢，但係都呃佢話自己係做妹仔，臨走前先話佢知聖女身份。呢個時候我又醒起死鬼古龍大概講過：如果一個男人以為自己係好明白女人o既話，咁佢就絕對係唔明女人o勒。講到女人，阿龍哥實在係比查先生「到」好多，皆因佢成世人都係o係酒同女人中渡過。多年後，阿江主席o係電視度借鬧寶娃娃敎訓中國人：你們呀，真是too simple, sometime naive！雖然sometime漏咗s，naive佢又講成「呢乎」而唔係「乃依乎」，但係都無損佢o既誠意o既。當我睇到電視時，真係宜不得阿主席早十年坐正，o係宣誓o個日用呢句說話訓示全國，咁我以前就可以早o的醒水，唔會成日咁乃依乎信人......由其係女人！(ex)主席你o係得o既！（但係都請你唔好再o係公眾塲合梳頭同打喊露，影響中國人形象！Thank you very much!）

作者: attaboy 時間: 2005-7-21 02:26 PM

......續前

好o勒，上咗人生對女人o既第一課，日子就開始覺得容易過。而總結呢一課，我得出對女人同你講o既任何o野，都係要：千祈千祈千祈，唔好唔好唔好，當真當真當真！唔好睇小呢十八個字，佢唔單止比起六字大明呪字數多兩倍，威力更加係大兩次方以上！男士們，當你有關於女仔o既煩惱時，攞出黎唸一唸，登時心境舒暢，腦筋靈活......至少係我身上係咁worko既！咁之後雖然我同Minnie都重係活o係激嬲，tum番，再激嬲，再tum番o既cyclle裡面，但係都算係情趣，日子都好快活。直至有一日，又瀕臨分手邊緣o勒，呢次同上次唔同，我已經心淡冇興趣挽回o勒......

作者: hkcitywong 時間: 2005-7-21 03:23 PM

What a good story, pls keep on.

作者: attaboy 時間: 2005-7-21 07:26 PM

......續前

拍咗拖九個月後有一日放學，我都好似如常放學後咁到Minnie屋企坐坐。但係好衰唔衰，談笑間又串呀Minnie似朱古力，因為Minnie膚色係天生偏黑o既，雖然唔係劉青雲o個隻，但係就好似o岩o岩去完東南亞遊行完返o黎咁。呢樣笑，我由開始拍拖已經成日時不時攞o黎講，但係係冇惡意o既，只係開玩笑咁講。我都知Minnie唔鍾意呢個所謂笑話，但係次次講到咁上下，佢就會話：夠啦吓，再講真係嬲o架！咁我亦都會收口，始終都唔係講出o黎要佢唔開心，只係玩吓o即。但係o個次o係佢屋企，再提番呢個講過十九幾萬次o既笑話，佢唔笑不特止，重o係無畀warning情況下立刻發脾氣。咁我都知係我唔好，即刻say sorry啦！冇用，繼續嬲。再tum，唔掂，都係嬲，咁盡埋最後努力，再tum多次，重越o黎越嬲添！咁之前都講過我份人心急，三tum唔成，呢次到我嬲o勒！我覺得大家都拍咗咁耐拖，我係點o既人佢都好清楚o架啦。佢都成日話我串串貢o架，亦都知我對住男仔Frens時講o野重過份，同埋佢而家嬲o個樣o野，之前都試過十九幾萬次啦，冇理由而家先咁大反應o架o麻？咁我呢個人呢，平時已經唔係咁好老脾，到我真係發脾氣時就真係唔係人咁品，雖然我冇乜幾可真係發惡，但係所有有幸或不幸見識過我發脾氣o既人，由其係女仔（但除咗我阿媽，因為我o的臭脾氣就係來自佢o的geneo既），都會驚咗我。嗯......或者正確o的講，係怕咗我，即係避之則吉o個種。咁同Minnie拍拖呢九個月o黎，我都好克制，話晒女朋友追番o黎係愛o黎錫，唔係愛o黎糟質o架o麻，所以之前只有小發，冇大發過。但呢次我覺得佢好冇理由，同埋，我開始覺得越就佢，佢就越亂發脾氣，所以o係o個一刻學呀脹爆話齋：我要爆啦～～～！！！！

[ Last edited by attaboy on 2005-7-21 at 07:32 PM ]

作者: attaboy 時間: 2005-7-22 04:22 PM

......續前

唔嬲由自可，一嬲火上加火，o係火遮眼o既情況下我係咩都做得出o既。我當時衝口而出同佢講：我頂唔順啦！如果成日都為呢o的小事嬲我，咁繼續拍拖落去都冇乜意思啦！不如分手o勒！跟住我頭也不回咁走出門口，亦都唔知阿Minnie乜o野反應。一路行去火車站，一路都重好慶。其實同Minnie講o既都唔係完全出於衝動，而我真係咁覺得，兩個人緊係o係埋一齊開心o的先會決定拍拖或結婚o架？冇理由你又唔開心，我又唔開心重要迫住日日見呱？所以其實當我見到好多男女成日（特別係兩公婆）投訴佢另外o個半時，我係大惑不解o既。好似楝篤華講咁，冇人求婚時會跪响度，攞出鮮花同戒指，同個女仔講：求你嫁畀我啦，賤人！你一定係覺得佢係個好理想o既伴侶先同佢o係埋一齊o架？咁點你又會對你心目中咁理想o既人諸多投訴呢？呢個問題我以前諗極都唔明，但係後來已經SOLVE出答案，但係太複雜同長篇，唔係呢詳述啦。好o勒，講完分手後，呢次我真係唔係講笑，我已經決定分手o勒。咁我做人對於下咗決心要做o既事，係會覆行得好徹底o既。首先返到屋企，搵晒所有有關Minnieo既o野出o黎，其中有o的，因為當時重好嬲，所以攞出o黎時好大力咁丟落地，整爛咗。搵齊後攞個袋袋好佢，第二日返學叫阿Jean送番畀Minnie。阿Jean話Minnie收到o的o野時冇乜反應，咁我都唔係好care，因為我都重嬲緊。過咗兩三日，打開衣櫃，見到一個音樂盒，o弊，重有樣Minnieo既o野o係度添！呢個音樂盒係o個次送完隻大老鼠Minnie，佢話唔好意思累我駛咁多錢而送番畀我o既。個音樂盒雖則冇隻老鼠咁貴，但係要都成3 HUNDRED，即成千幾二千蚊港紙。但係我唔係咁鐘意o的唔等駛......即係冇乜實用價值既o野，所以拎返屋企後就pat埋入衣櫃。咁，冇理由keep住佢o架，擺o係度又呀定，又篤口篤鼻，但係掉咗佢又好o徙。好，就送番去畀Minnie啦，而送音樂盒呢一程就攪到我同Minnie分唔成手o勒。

作者: hkcitywong 時間: 2005-7-22 04:29 PM

good, really thx for your story and i am still waiting ~~~~

作者: attaboy 時間: 2005-7-22 06:01 PM

......續前

去到Minnie門口，咯咯咯，門開o勒！門後o既佢係一個好憔悴o既佢，兩隻眼仔重紅晒添，梗係喊過o黎o勒，呢樣唔奇怪，因阿Minnie雖則平時o的脾氣比我重唔好，但係就冇我咁硬淨，有乜事唔開心都喊餐飽。佢用好脆弱o既聲線問我：咩事呀？我見到佢咁o既樣，都唔好意思粗聲粗氣啦，只有話：冇，個音樂盒我冇用o架啦，你要唔要返佢？Minnie話：入o黎先講......入到屋，我淨係企响度，佢粒聲唔出，我又唔知講咩好。大家企係度無言以對。過咗一陣，Minnie出聲o勒，問咗我一條我毫無心理準備o既問題：可唔可以唔好分手呀？吓？！好難答你喎！技術上當然冇問題啦。但係我心理上好似唔係咁想。唔想o既原因主要係：我做人係唔受得氣o既，小小都唔受得。而同佢拍拖呢我幾乎日日要受佢o的小姐脾氣，三頭兩個月就話啫，長此落去，我會發神經喎。而我一但真係癲咗，我身邊o既人係冇一個會好過個喎。因為就算我覺得自己最正常o既時候，身邊o的人都以為我係癲佬o黎，如果癲上加癲，會變成點呢？唔知架，正如冇人知道中美一但開戰究竟會變成點，但係就係人都知，冇人會好過。咁唯有答佢：都......都得o既，但係你而家都好清楚我份人啦，我真係唔係唔想就你，但係有時我真係忍受唔到你無啦啦發脾氣。Minnie：咁，最多我以後唔發脾氣o勒。咦！咁熟o既......好似聽邊個講過呢？係啦，就係眼前呢位Minnie小姐曾經用佢真摰o既眼神，誠懇o既態度向我保證過。嗯......我個人雖則唔算聰明絕頂，但係絕少會commit the same mistake twice。所以呢次唔會咁易上當，我話：你得咩？Minnie答話：我真係會改架！嗯......過而能改，善莫大焉！善哉！善哉！既然施主你係有心痛改前非．我無理由唔畀個機會你o架，雖則我知就算改o到都非一朝一日之事，但係辜且睇下呢次佢o既表現係點。我同佢講：好啦，之前o既事抺咗佢啦，由今日起我地從頭o黎過。Minnie好開心咁攬住我，而我就覺得無論之後係點，起碼o個日我係做咗件好事。

作者: attaboy 時間: 2005-7-23 02:40 PM

......續前

鬧完第二次分手，我又覺得上咗對女人o既第二課。而呢課畀我o既體會就係，凡係對女友都要：與佢常在，恩威並施。因為Minnie同我講番，o個日佢之所以發咁大脾氣，我個朱古力笑話只係誘因，最主要其實係我每日放學後都只可以o係佢屋企留到六點，就要趕住撘火車返自己屋企。佢話每次我走佢都好唔捨得，但係又唔想話我聽，等我難做。嘩！唔想我難做，唔話我聽但又亂發脾氣，我咪重難做！但係都好，咁而家我就知道問題成因o係邊度，可以人對症開方o勒。原來，女仔都係咁o既，一但成為拖友呢，就想日見夜見，男士們，如果追女仔之前冇考慮過追成之後自己有冇咁多奢侈時間去倍佢，追到之後又成日唔見人，咁個女仔會覺得好似入咗間黑店買o野咁，貨不對辦，就算唔去愛情消費者委會度投訴，都會o係心裏面狠狠咁將你black listed，以後再唔再幫襯，就要睇你有幾好彩同埋個女仔有幾唔好彩o勒。所以為免呢o的見唔到面而引起o既side effects再出現，第二年一開學，我就應Minnie要求搬出o黎同佢住o勒。另外一樣要提o既就係，之前我以為對女友好到加零一係大家相處o既最好方法，但經過呢次大發神經後，我覺得阿Minnie發脾氣o既頻率真係減少咗好多。原來女仔係咁o既，你退一步時，佢係會行前一步，到你退無可退行前番兩三步時，佢又會急急腳ton番後黎就你。就好似跳Cha Cha咁。你前我後，我前你後。所以，淨係對佢好係唔worko既，要好似外族統治我地大好河山咁，懷柔政策要露一手，高壓政策都間唔中要露一手，咁個江山先唔會白白畀其他人搶咗去o架。

作者: attaboy 時間: 2005-7-24 04:52 PM

......續前

上完第二課後，我o既日子就更加好過o勒，呢段好過o既日子大概維持咗九月左右，一場我同Minnie戀愛生涯裡面最大o既風波就來臨。呢次當然又係鬧分手啦。當其時同佢拍咗拖年半，住埋咗都有大半年，同佢相處都幾融洽，而佢亦好少發大脾氣o勒，只會間唔中發下小脾氣，因為佢己經好清楚佢o既大脾氣係會激發起我更大o既脾氣爆發，而佢更清楚o既係一旦我發神經，佢係handle唔到o既，更正確o既講法應該係呢個世界都冇乜人有本事handle到，所以佢就只係會用我畀佢o的小脾氣quota，大脾氣quota就用都未用過。點知有一日，o係我趕緊assignmento既時候，佢連續用咗幾次我可忍受o既小脾氣quota，用得兩用，用完勒，但係佢繼續overdraft。大問題出現o勒，如果我係得閒冇o野做，立即加大佢quota係冇乜所謂，但當我有o野忙，有正經事要做o既時候，係唔會有咁多閒情逸緻去審核同approve佢既excess usageo既。而通常係我做緊o野時如果有人唔識相，去搵o的雞毛蒜皮o既事o黎煩我o既話，咁後果只會有一個：我又要爆啦！　　　　　　　　

[ Last edited by attaboy on 2005-7-24 at 05:11 PM ]

作者: attaboy 時間: 2005-7-25 08:52 PM

......續前

本來係好小o既事，因為我唔識去包容同忍耐，導致Minnie做咗一個大部份女仔都試過o既錯誤決定：搵第二個男仔去沙激自己個男朋友，搞到件事爭o的收唔到科。Minnie明知講到發脾氣，佢一定唔夠我o黎，o係火遮眼情況下佢當住我面打咗個電話，個電話係駁去佢一個男同學o既屋企，而我聽到Minnieo係電話度叫個男仔即刻o黎我地屋企。當其時，我已經係由嬲怒變為火滾，就好似煲水煲到己經出水蒸汽咁，爭在未火燭o即，但係由於都想睇下Minnie會玩咩花樣，所以重未發作出o黎。半個鐘後個男到咗，Minnie同佢就一路當我透明，一路有說有笑，而我就一路繼續做assignment扮冇反應。唔知阿Minnie係咪見我若無其事，竟然講：我肚飯呀，不如一齊煮o野食囉？咁o既時候，當然唔係同我講啦，係叫個男仔同佢玩煮飯仔呀！有冇搞錯，要玩都唔好o係我屋企當住我面玩呱？雖然我知道Minnie咁做係特登激我o既，但係o個一刻真係滾到就o黎連自己都控制唔到。跟住佢地真係開火煮o野食，Minnie同o個個男仔繼續有講有笑。當時o既情景，如果有人經過，一定以為佢地先係情侶，而我只不過o係度撘枱食飯o既o即。好o勒！Minnie你要激我係咪？YOU WIN！我終於忍唔住，走埋Minnie度，同佢講：可唔可以叫呢位先生走先，我有o野想同你講！但係Minnie好得戚咁話：間屋我都有份，唔通招乎個Fren都唔得呀？我話：得！梗係得！但係如果呢位仁兄唔立即消失o既話，我會打個電話，隨便你！呢個時候其實我已經嬲到極點。Minnie冇理我，繼續佢今晚煮乜餸o既節目。好！既然係咁，卑鄙o的都要做一次。我馬上攞起電話，打返Minnie香港屋企，電話通後，我大聲話：唔該阿Minnie阿哥聽電話......Minnie一聽到我咁講，即刻飛撲埋我度要搶個電話。佢之所以咁緊張，因為佢屋企都重係未知佢拍拖o既，更加唔好話同男朋友住埋。而佢亦唔可以畀屋企知，因為佢Daddy或Mummy一知佢拍拖就實會叫佢即刻返香港。眼見Minnie撲埋o黎，我將電話熄咗但舉高個電話，Minnie唔夠我高，掂唔到電話，只好捉住我衫袖，我好自然反應fing一fing，咁Minnie就成個人坐咗落地下。呢個時候，個男仔走埋黎，喝住我：喂！你唔好打人喎！乜我咁都算打佢咩，我從來都冇打過Minnieo架喎！我同個男仔講：你都有眼見，係佢捉住我，畀我fing甩跌落地喳喎！個男仔好嬲望住我，好似要出手o勒.......Minnie立即起番身，同個男仔講：你都係走先啦！個男仔話：咁你......都未講完，Minnie就講多次：都叫你走先囉！係囉，阿仁兄，你今晚o的戲份完o架啦，下半場係上演一對情侶的攤牌，只係由我同Minnie揹飛，其他二打六通通收工啦！個男仔見Minnie開始炆，就話：好啦，我走先，有乜就打畀我啦！跟住就走咗，只剩低憤怒o既我同開始識得驚o既Minnie......

作者: Rika 時間: 2005-7-26 01:33 AM

Originally posted by attaboy at 2005-7-25 08:52 PM:
你今晚o的戲份完o架啦，下半場係上演一對情侶的攤牌，只係由我同Minnie揹飛，其他二打六通通收工啦！

我鐘意呢句

[ Last edited by Rika on 2005-7-26 at 01:34 AM ]

作者: 藍 時間: 2005-7-26 01:52 AM

=.=...樓主....嗯,雖然有d失禮,但係都想問下你,你有無興趣一次過post?
都連載左成個星期拉,睇你個故仔,好似戲肉都未到bor,會吾會要返一年半載先講得哂架
我想快d知道你個故仔講d咩呀

作者: attaboy 時間: 2005-7-26 03:16 AM

Originally posted by 藍 at 2005-7-26 03:52 AM:
=.=...樓主....嗯,雖然有d失禮,但係都...

其實這純粹是我個人的故事，不是亦不會有什麼主旨要討論或發表，只是想為自己一些生活瑣事做個記錄。如果引起閣下任何誤會，真是抱歉！但可以告訴你，我的初戀故事再寫多兩三個篇幅便會完結，我餘下另一段苦戀恐怕短期內也難抽空撰寫，因已說過這是隨筆隨貼，沒有諸稿的。請見諒！

作者: JCer 時間: 2005-7-26 03:31 AM

Originally posted by 藍 at 2005-7-26 01:52 AM:
=.=...樓主....嗯,雖然有d失禮,但係都...

~_~ 人地個真人真事, 打咁多字出來分亨... 重想點??
如果你想睇D 好驚心動魄, 又多高潮位既... 不如去買本書睇下戲la

作者: 藍 時間: 2005-7-26 12:53 PM

Originally posted by attaboy at 2005-7-26 03:16 AM:

其實這純粹是我個人的故事，不是...

呵,你誤會拉,我無任何其他意思,純粹係想快d知道你既故事(我好無耐性^^|||)

作者: attaboy 時間: 2005-7-26 09:25 PM

......續前

Minnie用好顫顫驚驚o既聲音問我：有咩要講呀？我答：本來有好多o野想同你講，不過而家乜都語駛講o勒......分手啦！聽日我會執埋o的o野搬扯o架o勒。Minnie聽到即時呆咗，而佢亦好清楚係呢個時候佢講乜o野都係冇用o既，過咗一陣，佢自己入咗房，我就埋頭繼續做o野。過咗大概十五分鐘，我聽到廁所門柵埋o既聲音，但都不以為意。過咗半個鐘，都唔係好覺Minnie出番o黎，心諗佢可能係匿埋o係裡面喊，但我都冇理繼續我o既assignmnet。再過多一陣，聽到廁所有打爛玻璃o既聲音，當時我第一個感覺係：Minnieo係度掉o野發脾氣！咁我都唔理得咁多，原本呢次如果佢冇叫到個二打六o黎，同佢講和完全冇問題，但係由於佢犯咗我絕不能容忍o既十忌之一，呢次係冇圜轉o架o勒！但係好奇怪，聽完頭先o個個兵兵聲後，就再冇聲音o勒。正常o黎講，Minnie係會不斷咁掉o野發洩個喎，呢次點解咁順攤，淨係摧毀一樣咁少呢？會唔會係我自己撞聾呢，應該唔會呱，廿歲仔就撞聾？於是好奇下走去廁所門口聽真o的。真係冇晒聲喎！咁點算，試下搞門，冇人應。扭下個門較，係鎖咗個喎。咁憑我十幾年撈電視汁o既經驗，呢個時候一係打電話問曾SIR，一係撞門啦！心諗：打畀曾SIR可能佢都只係會SUGGESTo即的WD40落個門鎖度，o係我當時咁o既情況係冇乜幫補o既。咁只好用淨低o個個CHOICE啦。嘭一聲，門開咗，呢次到我開始識驚o勒......

作者: Rika 時間: 2005-7-26 10:02 PM

Originally posted by attaboy at 2005-7-26 09:25 PM:
......續前
Minnie用好顫顫驚驚o既...

佢自殺~

作者: attaboy 時間: 2005-7-26 10:58 PM

Originally posted by Rika at 2005-7-27 12:02 AM:

佢自殺~

係。唉......女仔一失戀都冇乜好做架啦。不過放心，佢冇事，只不過經歷過呢次後，我地以後都再冇鬧過交，直至兩年後緣盡分手。本來想打埋個尾，但係聽日要interview，而家要準備的資料，等聽日先再打。

作者: Rika 時間: 2005-7-26 11:17 PM

Originally posted by attaboy at 2005-7-26 10:58 PM:

係。唉......女仔一失戀都冇乜好...

唔急既，你慢慢打

作者: attaboy 時間: 2005-7-29 07:22 PM

......續前

只見到Minnie坐咗o係地下，右手渣住一塊玻璃碎片，左手手腕內側滲緊血出o黎，而旁邊係一個打爛咗o既玻璃樽－－＞係佢送畀我摺滿幸運星o既玻璃樽。Minnie用佢好呆滯o既眼神望住我一語不發，我就講：做乜要咁？？有乜事唔可以解決呀？Minnie唔出聲，血繼續流。我話：畀我扶你出去同你包傷口？Minnie搖搖頭。我就只好問：咁你點先肯畀我理？Minnie苦笑。我再講：就算你係憎我，都唔好攞自己o黎出氣，你要界，我畀你界o勒！Minnie開始有返o的反應，放開手上o既玻璃片。我即刻順勢好輕力逗起佢，佢都唔係好抗拒，咁我就扶咗佢返房攤係床到。跟住去攞紗布，捲開紗布，問Minnie攞佢隻手，佢死都唔遞畀我。我話：唔好拗氣啦，有乜o野都等我包完你隻手先講好冇？Minnie唔出聲，手依然唔畀我。隔咗一陣，Minnie出聲o勒：可唔可以唔好分手？呢個時候要我答呢個問題實在有o的難度，老實講，我個心都重係想分，但係明知如實作答，o個晚就唔駛旨意收科。但係呃佢呢，都講過我份人係講得出做得到，唔想背負大話情人之名噃！唯有答個模稜兩可o既answer：只要你肯畀隻手我包，乜事都可以慢慢傾！Minnie似乎都都好接受呢個方案，隻手慢慢伸出o黎啦！同佢包紮時，我想起以前無數次我整親，都係Minnie好細心地同我包紮o既（佢o係香港讀書時係Red Cross o黎），估唔到呢次終於o係咁既環境下輪到我同佢包番。一路同佢包，一路見佢好滿足咁甜絲絲笑。包好後我問佢：重痛唔痛，好唔好o的？點之佢話：你唔走留o係我身邊就唔痛o勒！心諗：吓！乜原來我有特異功能，能醫百病我都唔知o既？唔知我o的特異功能可唔可以學呀左頌昇咁捽牌呢？搵日試下先！過咗一陣，Minnie瞓著咗，我亦好輕聲咁行出房，繼續未完成o既阿SIMON o勒．

作者: attaboy 時間: 2005-7-29 07:23 PM

......續前

第二日 Minnie 告咗假冇返學，而我就返咗ｕ交咗 assignment 後立即返屋企。一番到屋企又爭o的嚇死，Minnie 係度喊到收唔到聲！我以為佢傷口痛，問佢：冇事吖o麻？好痛呀？點知佢答：冇事呀！不過我一個人係屋企諗番起Daddy, Mommy 對我咁好，我就瞞住佢地同你拍拖。你對我咁好，我成日發你脾氣，我覺得自己好唔o岩呀！心諗：唉！嚇得我吖！之後 Minnie 問我：咁而家我地係咪唔分手o架o勒？見佢咁o既樣，我乜氣都消晒啦，答佢：都係o既。跟住我同佢就開電視睇我地追緊o既《同一屋簷下II》。睇到小雪患咗絕症，大佬二佬不計前嫌，一齊同班弟妹做布公仔戲 tum 阿小雪，o個一刻我同Minnie都不約而同喊咗出o黎。係囉，如果真係關心對方o既話，有乜新仇舊恨唔可以一笑泯咗去呢？而 Minnie 更同我講：莫講話你尋晚打我，就算你殺咗我，我都唔會怪你o既！我諗：吓！真係咁好？不過咪住，我真係冇打佢喎，係佢自己跌落地下個喎......不過算啦，個一刻莫講話阿 Minnie 屈我打佢，就算話屈我殺咗佢，我都係唔會怪佢o既 ;>

[ Last edited by attaboy on 2005-7-29 at 10:04 PM ]

作者: attaboy 時間: 2005-7-29 11:35 PM

......續前

之後，Minnie 做咗一個女友界o既創舉－－＞佢再冇發我脾氣o勒，連小發都冇！每遇到我真係激嬲佢，佢會同我講：今日唔傾啦，聽日先搵你！第日見番面時佢真係當無事，好似我真係冇激嬲過佢咁！如是者過咗兩年，有一日 Minnie 同我講：我想......我想......我想分手！我冇問佢點解，因為我知點解！因為情到濃時情轉淡；因為我實在畀太多氣佢受；因為我錯誤地以為我地o既愛情已經昇華，唔駛再花時間理佢；因為佢唔發我脾氣o既同時，其實佢係忍得好辛苦......重有最大o既原因係我重有半年就畢業要返香港啦，而佢重有一年留係外國，佢同我都知道兩地情係好難維繫o既......咁就相見不如懷念，分就分啦！希望來日你會愉快，祝你幸福！而我半年後亦帶住呢三年半o既美好回憶，從我最喜愛o既城市回到香港呢個金錢世界，去追求女人以外男人一生中必需要擁有o既另一樣o野......事業！但係個天可能想懲戒我呢個唔稱職o既男朋友，係我毫無心理準備下，我又被命運推上愛情o既擂台，但係呢次個對手係超重量級o既學界冠軍人馬。呢塲賽我輸得好徹底，不單被技術擊倒，點數更加係大幅被抛離......

傷心太平洋 (1998愛像太平洋)
▔▔▔▔▔▔▔▔▔▔▔▔▔▔▔▔▔▔▔
曲：中島美雪 | 詞：陳沒

＃　離開真的殘酷嗎　或者溫柔才是可恥的
或者孤獨的人無所謂　無日無夜無條件
前面真的危險嗎　或者背叛才是體貼的
或者逃避比較容易吧　風言風語風吹沙

＠　往前一步是黃昏　退後一步是人生
風不平　浪不靜　心還不安穩
一個島鎖住一個人
我等的船還不來　我等的人還不明白
寂寞默默沉沒沉入海
未來不在　我還在

如果潮去心也去　如果潮來你還不來
浮浮沉沉往事浮上來
回憶回來你已不在　＠

☆　一波還未平息　一波又來侵襲
茫茫人海狂風暴雨　一波還來不及
一波早就過去　一生一世如夢初醒
深深太平洋底深深傷心

Repeat　＃＠☆☆

深深太平洋底深深傷心

～　第　一　戀　完　～

作者: Rika 時間: 2005-7-30 02:52 AM

第一次加分~
期待有一日會睇埋你既第二戀~

作者: JCer 時間: 2005-7-30 04:25 PM

拍拍拍... (站立+掌聲)

作者: hkcitywong 時間: 2005-7-30 05:53 PM

送你一首歌,一生中最愛

作者: attaboy 時間: 2005-8-6 06:14 AM

Originally posted by JCer at 2005-7-30 06:25 PM:
拍拍拍... (站立+掌聲)

Thank Q! (鞠躬)

作者: attaboy 時間: 2005-8-6 06:15 AM

Originally posted by hkcitywong at 2005-7-30 07:53 PM:
送你一首歌,一生中最愛

＜一生中最愛＞我都好鍾意，但係最切合我心情o既應該係呢首：

怎會如此 (無線電視劇「天地男兒」插曲)
=================================

曲：陳頌紅 | 詞：陳頌紅 | 編：羅堅

一切到此心也倦了戀愛一場苦了苦了一切到此
再沒話說走的會走無法留住

* 我盡力過卻也鬥不過天意的微妙困在回憶裡留戀
空有些追思錯誤極了我已甦醒了過去應該要忘掉
要是重新再遇上可會如此一切到此心也倦了
等了多年等個開始非常凌亂 (想到昨天)
再沒話說 (也沒有淚) 可惜始終為你停住

Repeat *

[ Last edited by attaboy on 2005-8-6 at 08:16 AM ]

作者: JCer 時間: 2005-9-7 01:58 AM

attaboy 兄
期待你的續集... 等待中

作者: yungting0623 時間: 2005-9-7 08:32 PM

十分期待你既績集......support~~~~

作者: johnny1982 時間: 2005-11-25 02:27 PM

support

作者: 道友 時間: 2005-12-31 11:39 PM

好睇呀其待

作者: ChowKai 時間: 2006-5-20 09:43 PM 標題: 續集

續集在這裏

http://www.26fun.com/bbs/viewthread.php?tid=80335&fpage=1

歡迎光臨娛樂滿紛 26FUN (http://26fun.com/bbs/)