chenfeng

無幾耐之前剛剛考完科sociology of marriage and family
入面d 料可以大派用場，哇哈哈

1. 你信唔信男女平等呢樣o野?覺唔覺得仍然係男性主導ge社會? <--- 而家 o既社會的確仲係男性主導，你睇香港特首仲係男人做、同埋一日仲有幾多男性 o係屋企虐妻、打女朋友、或者每日安坐於家中一d 家務都唔做、由得個老婆做到隻「積」咁你就知啦。至於男女平等，睇你點睇「男女平等」呢個terms 究竟點解啦：係指absolute equality 定係relative equality。如果係指absolute equality 的話，sorry 我真係唔太相信會做得到啦……in case 各位女性都仲係覺得男性同女性相處時要有紳士風度、或者總之同你平時班兄弟相處時 o既態度用d 唔同時，就點都去唔到絕對男女平等架啦。不過，我都相信，起碼要俾到女性有同男性公平競爭 o既機會同條件 (equality of opportunity)，之前咁封閉、打壓女性 o既社會，的確扭曲人性、亦埋沒左好多原本有條件去幹一番大事 o既聰明、能幹女性。

2. 你贊唔贊成男主外﹐女主內? <--- 根本唔能夠一概而論 o既……男主外女主外 o既「正常」家庭分工觀念，都只不過係由一個美國學者talcott parsons 所大力鼓吹同提倡咋嘛。佢覺得男性天生就係應該要做一個instrumental leader，即係要負責做晒決定、話事，從而令到個家庭能夠正常運作同埋完成某d 特定目標；而女性就天生係expressive leader，要負責take care 照顧晒男性或其他家庭成員 o既情緒問題，提供"psychological gold" (eg：love、warmth) 俾佢地，令佢地能夠安心專注於工作同對外事務。但，唔通你認為當一個男性搵唔到工、而老婆就仍然有工作時，都仍然拎到「男主外女主內」o既觀念，強逼個老婆每日放工後都要繼續開"second shift"，幫你做晒d 家務甚至take care 埋你丫嘛? 所以，我個人覺得睇情況而定：如果我老婆有工做、而我暫時未有工的話，咁，我係唔怕做《老婆大人》入面 o既陳錦鴻，做煮飯佬，變成男主內女主外架。相反啦喎，亦唔代表我放左工之後會放晒手由得個老婆做到死 o既，我一定會幫下手，唔使佢一個人負責晒對內事務。

3. 你覺得男仔係咪好應該"大男人"? <--- 唔一定喎……正如我頭先所講，呢樣都係talcott parsons 佢個人覺得正確、覺得好 o既一個分工pattern 同男性形象，點解男性一定要「大男人」，話晒事、做晒主導人同話事人? 如果個女性叻d、做 o既決定係明智合理過我地男性的話，咁點解唔可以俾佢「大女人」一下，而一定要拘泥於其中一種性別分工模式入面? 男性冇錯係應該要有d 主見同決斷能力至正常，但一定要同時尊重、聆聽女性 o既意見同想法至得。

4. 你俾唔俾你ge 女朋友叻過你/成就高過你? 定係你會鐘意同一level? 或者鐘意佢冇咁聰明? 咁女仔﹐你又係咪想你男友叻過你? 定係同一level? <--- 我要求唔高，我只要求我 o既女朋友 (而家仲未有……) 係真心鍾意我就ok，我唔在意佢究竟係唔係叻過定蠢過我；唔通我女朋友叻我都唔俾、都要覺得係一種羞恥? 其實我個人認為，你真係愛佢的話，係根本唔會介意佢係唔係head 住你、叻過你；否則，你連對住自己個女朋友都覺得有威脅感、甚至嫉妒的話……你自己走去檢討一下自己係唔係真係鍾意人啦。

以上純粹係個人意見，如有冒犯，請各位大佬大姐多多包涵~~~