|
- 帖子
- 40777
- 精華
- 5
- 威望
- 18931
- 魅力
- 1745
- 讚好
- 0
|
6474#
發表於 2011-5-12 12:16 AM
| 顯示全部帖子
再一次證明, 千祈唔好叫女人掂工具箱.......就算只係一個螺絲批, 都應該自己親力親為去拎!
再一次證明, 千祈唔好比女人掂你整緊嘅嘢.......就算佢只係坐喺你隔離, 你都要確保佢只係齋坐, 視線絕對唔可以離開你枱面嘅物件!
千祈唔好因為一句: "老公我幫您吖~ " 而心軟, 一定要大大力咁去拒絕.
如果我肯狠心咁去拒絕, 我嘅古董打火機就唔駛死得咁慘......
我只係行開5步.....無錯, 係5步. 短短十秒嘅時間, 已經令我嘅古董火機同我永遠陰陽相隔......
自己不嬲都有買d 古靈精怪嘢嘅習慣, 錶同火機係其中一種, 唔一定係好貴亦唔一定係好高科技, 只要覺得有趣嘅都會買.
反而對所謂名牌子從來無興趣, 乜cartier, givenchy 同 dupont 都只會同埋d "7 仔牌" 放埋一邊.
婚後回港曾經返過舊居, 東望望西摸摸之下, 搵番以前一個裝打火機嘅盒.
入面有十零個打火機, 火水爐又有, 入氣嘅又有, 甚至要入燈油嘅都有.
有d 係自己買, 有d 就係由朋友送.
最老嗰幾個, 都有成百歲.......尤其係第一次世界大戰時期嘅imco, 報銷一個就無一個lu.
所以對呢十零個火機都有多少感情, 好理所當然地帶埋佢地返新屋.
今日拍完拖, 等屋企人帶魚毛上嚟開飯, 忽然醒起好耐無同d "老嘢"抹油, 於是入書房擺晒檔, 準備開工.
雄霸好奇心比一般正常兒童更強, 加上佢不嬲都有"撒窿巴斯症侯群", 就梗係坐喺我隔離睇我做乜啦.....
本來都相安無事, 兩公婆有一句無一句咁講吓d 火機歷史, 順便比佢發表吓佢嘅"老公戒煙對後世影響"嘅偉論; 點知當要拆開其中一個imco 嘅時侯, 我發現手上無啱size 嘅微型螺絲批, 而個工具盒就正正喺佢嗰邊, 於是我就叫佢幫我拎個啱size 嘅過嚟, 順便比個火機佢對size.
同時間, 電話到, 四大元老同條魚毛到咗我樓下 (咁老人家都叫通氣嘅, 唔知我地做緊乜吖嘛, 打個電話先好d).
我就係行去拎個電話返埋枱嘅時侯出事.
"老公, 搞掂~ "
"吓!!!!!!!!!?  "
"唔? "
"您做乜成個銼輪位扭晒出嚟呀..........? 另一邊嘅絲帽呢? "
"唔? "
"吓!? 您撬開佢呀!!!? 個較位都"肴"咗嘅............. "
"唔驚, 至多買過啫~ "
"吓!!!!!!!? "
"蝦! 佢地上嚟喇! 我去開門先~ "
"............"
就係咁, 個imco 就死咗喇, 因為要每邊parts 都鬆開少少先可以完全拆開, 如果只鬆一邊就勉強拉就會"肴"...........老骨頭, 個殼就堅, 內臟好脆弱咖咋.
仲要連個銼輪位嘅絲帽都唔見咗, 我地氈式搜索都無發現, 太細粒喇, 恐怕都好難搵得番........
唉! 千錯萬錯都係我錯.
如果我自己親力親為去拎個螺絲批, 就唔駛打咁大段訃文去超渡個火機...........
如果我確保佢只係齋坐, 視線無離開枱面上嘅物件, 就唔駛打咁大段訃文去超渡個火機...........
如果我無因為一句: "老公我幫您吖~ " 而心軟而又肯大大力好狠心咁去拒絕佢, 就唔駛打咁大段訃文去超渡個火機..........
嗚............嗚..........我以後都唔敢喇! |
|
should be good