bbsex

原來有咁多德國迷係度，仲以為自己係「小數民族」！

講返場波！ 輸波無錯係好可惜，但係都屬於「正常賽果」。 用球員質素去計，無論前中後三線每個位，意大利比德國實在過之而無不及，最多可以話拿姆同格羅素，波歷克同無態既托迪可以打過和(個人意見)！ 再加上德國現役呢班好多都好後生(尤其條後防線)，大賽經驗實在係唔多，甚至可以話無！ 所以普度斯基連番失機同埋D後防間中走灟左人，其實都係預期之內(諗返第一場對哥斯達黎加就知)，問題係走灟左個次會唔會輸波同可以改善幾多。 就算用成隊去睇，細心既都知道其實意大利真係可以用「踢成隊」黎形容，唔係話德國無隊形，但係球員之間互相包位同走位，意大利的確勝一籌！ 就以條中場線回防做例，可以見到意大利D球員(尤其加度素同派路)會自動自覺填返後衛走灟左D位，而唔係就咁跑返三閘線企返個位就算，雖知道回防唔係企位咁簡單！

講左咁多，好似講到自己唔係德國隊迷咁！ 但正如之前咁講，輸左係好失望！ 其實整體黎講已經係「喜出望外」！ 諗返熱身賽對意大利，真係無眼睇 ... ... 當然有人話主場幫唔少，呢個係一定有既，起碼係自己人面前都唔敢懶啦！ 但係整體同埋同別球員既進步真係好明顯！ 要再三講既係條後防線：第一場可以用豆腐黎形容，到而家可以包到位同力抗D世界級前鋒，已經可以大拍手掌！ 希望班後生仔例如拿姆、侯夫、梅迪煞卡、贊臣、同埋無入選既軒基等可以快D進步，就算上唔到一線頭，都可以做到一線尾既球員！ 至於前鋒保度斯基既把握力雖然未算好成熟，但話哂人地得20歲仔，下年仲去拜仁踢下大賽，相信係有希望既！ 而高路斯亦都唔再「得個頭」(諗返上屆世界盃就知)，扭簡拿華路個下真係好出色，而控球、射波、盤球等都進步左唔少，雖然要佢踢多屆世界盃就未必得，但係呢緊兩、三年都可以靠下佢，同埋希望佢可以帶起普度斯基、古蘭爾同漢基！ 剩返中場線，短期內波歷克真係好難有人頂到佢：舒韋恩舒迪加未必適合打正中場分波，左中場啱佢多D，況且佢同拿姆合拍開；迪斯拿出波幾好，打右中場好適合佢多D；如果講同類型既，保路斯基會係一個好選擇，都係長傳準、體力唔錯、跑上跑落、後上有頭有腳！ 反而比較擔心既係守中呢位，芬寧斯係唔錯，但係企位同包位兩方面唔係咁好，見佢好多時都係追返走灟左個D人，多過成功攔截到對方傳送同補返後防走灟左D位！ 諗下馬基利利就知啦！ 車仔唔知幾靠佢，尤其係二閘上左去助攻，有佢逗返D位令到林柏特同二閘上得幾放心！ 雖然芬寧斯射波幾勁同仲可以打多兩三年，但似乎後繼無人：基爾年紀唔細，其他德甲球隊呢個位用外援多，例如夏格維斯、蘇度等。 所以真係好希望呢幾年內可以出返同好似馬圖斯、森馬、伊歷斯呢D級數既防中。

打到手都軟，其實我諗而家話鍾意德國既，好少係呢幾年先至開始鍾意，我諗係由90西德或者96歐洲國家盃開始(當然有更早啦)！ 所以不期然會用返呢兩代既球員做比較(好似樓上有D朋友既分享咁，我自己都會)。 不過坦白講，我諗短期內德國都好難(甚至無可能)去返個兩屆既水準(除非無端端出返好似高拿、巴治禾、薛基、布林美、畢圖特、路達、馬圖斯、慕拿、希士拿、森馬、列巴斯基、伊歷斯、禾拉、奇連士文呢D級數既球員)，不過好明顯德國已經走出左「青黃不接」既階段，所以如果德甲球隊肯俾多D機會本土年青球員，同埋而家班後生可以出國搵食，德國一定有機會重登世界一線球之列！