吳建仁

網絡歌手漸漸興起, 我認為有以下呢啲原因.

1. 樂壇質素低落, 引起潛伏係民間嘅音樂勢力不滿, 索性"自己唱好過".

2. 做歌手, 捧十個, 得一個紅, 風險大, 萬一唔紅就係咁先. 而呢啲網絡歌手好多時都有穩定嘅工作, 又或者有學識, 可以預計將來嘅前途. 因此呢啲人會選擇一條平坦而低風險嘅路.

3. 現今樂壇俾人嘅感覺係"要紅就要有樣, 有關係", 網絡歌手認為自己欠缺呢兩樣嘢, 唔會紅, 唔入樂壇.

4. 娛樂圈中嘅黑暗傳聞, 令呢啲網絡歌手唔想入娛樂圈.

5. 互聯網普及, 為網絡歌手提供一個簡易而便宜嘅渠道發表自己嘅作品.

6. 家長望子成龍. 雖然香港教育制度唔重視體育音樂藝術等技能, 但好多家長都會送子女去學習呢方面嘅嘢. 對音樂有一定認識嘅人其實有好多.

7. 非法下載盛行. 非法下載除咗對唱片銷量有所影響, 另一方面亦提高咗唔少人嘅音樂水平. 冇錢嘅人都可以透過呢種方法接觸大量唔同種類唔同地方嘅音樂. 非法下載亦引起唔少人對音樂嘅興趣, 去學習音樂.

8. 互聯網作為新興傳媒嘅影響力. 冇錢宣傳? 上網啦! 網上資訊爆炸, 同時亦對現實世界構成影響. 好多藝人都曾經因為網上嘅小道消息而見報上雜誌. 網上短短幾句, 可能比報紙上一篇報導更具影響力. 加上互聯網存在一種羊群心理, 一個話好, 兩個話好, 三個話好, 個個都話好, 令呢樣"好嘢"係網絡世界迅速流傳.


隨著科技嘅嘅發展, 現代音樂將會進入一個不論貴賤, 不分地域, 百花齊放嘅時代. 傳統嘅唱片公司亦好應該去面對呢種改變, 而唔係故步自封.

[ Last edited by 吳建仁 on 2005-6-16 at 03:28 PM ]