秋葉林

陳奕迅闊別咗我哋兩年，真係幾掛住佢果把既懶洋洋又可以狂呼嘅聲音。因為呢排工作比較忙，未有機會聽晒佢啲新歌，只係响電台同電視聽過《夕陽無限好》同《浮誇》，反而最有印象係佢果枝U87，因為聽過幾個訪問都有提過。

問話佢事隔兩年有無退步到，真係唔知應該點樣講，感覺上總係覺得同以前係有少少唔同。例如話《夕陽無限好》，係果種初初聽好似無乜特別，但係愈聽就愈有feel嘅類型，Eason以前好似真係無乜呢種咁嘅歌，尤其是早兩晚响電台聽到個唔知unplugged定係乜嘢嘅version，真係好鬼正。作為第一首派台歌嚟講，《夕陽無限好》都算無佢以前果啲咁commercial。

唔知可唔可以話係成熟咗，有深度咗呢，你知啦家陣連老豆都做堆，思想上應該係有啲唔同咗嘅；又可能會同轉咗唱片公司有關掛，新嘅環境、新嘅同事自然會有啲新鮮感，加上停咗兩年無做唱片，好多以後習慣成自然嘅嘢都可以重新build up過，應該都係好事。不過，我估應該同果枝U87無乜特別關係。

通常果啲幾年無出過碟嘅歌手，再出番碟我都一定會支持，好似早幾年陶喆同張震嶽咁，鍾意果份新鮮感，同堆硬係覺得咁樣做一隻碟係有誠意啲嘅，質素應該有保證。