造價4億 東亞運賽場豆腐渣

tlkwan

耗資近四億元興建、年底東亞運動會將產生四十六面田徑金牌的將軍澳運動場，啟用後僅三個月便出現跑道拱起現象，成了絆倒選手陷阱，康樂及文化事務署需緊急維修，原定昨舉行的全港田徑錦標賽被迫延期。有體育學者認為鈦碳橡膠使用三個月便損壞較為罕見，有必要查明問題。立法會議員則批評康文署驗收馬虎，當局應立即委託獨立機構覆檢所有東亞運場地，免豆腐渣工程淪為國際笑柄。東亞運動會場地一直被批評僅達「蚊型」國際級水平，今年五月才啟用、舉辦多項亞洲區及本港賽事的將軍澳運動場，當時已被揭發積水處處。記者昨到現場視察，更發現主場一百米起跑點前方約九至十米處，一、二、三線跑道各有數個拱起位置，其中第三線拱起位高達二點五厘米，由於「小山坡」不易察覺，運動員全速起動時危機四伏，康文署惟有以雪糕筒圍住拱起的地方。除絆倒陷阱之外，主場跑道四周均留有水浸痕迹，就連田賽區域的跳高及撐竿跳跑道、副場跑道及練習場等多個地點，明顯亦曾水浸，情況較五月時不但未有改善，水漬能見度更趨明顯。香港田徑總會原定昨日在該處舉行東亞運選拔賽之一的全港田徑錦標賽，經實地視察場地後，決定將賽事延期至十一月。

吓？唔係啩？作為年底東亞運主要比賽場地嘅將軍澳運動場，跑道竟然拱起？來港參賽嘅各國精英容乜易一仆一碌！事件太離譜，若發生在東亞運期間勢破壞本港聲譽，運動員或因此受傷，港府難辭其咎。澳門咁細嘅地方，上屆搞東亞運搞到有聲有色，但一落喺香港手上，即刻醜態百出。講到底，完全係因為當局由始至終都求求其其，宣傳工作更加係少之又少，如果唔係久唔久爆出咁多蝦碌嘢，好多小市民都唔知原來年底有個大型運動會喺香港舉行呀！記得去年京奧聖火喺香港傳遞時萬人空巷，但係睇吓日前喺鬧市進行嘅火炬傳遞活動又點呢？旁觀市民得個小貓三四隻，連示威者都唔吼，據警方公布嘅數字，圍觀市民數目唔夠一萬人。當局成日用We are ready宣傳東亞運已經準備就緒，但好明顯至今仲未 Ready，政府好應該快啲搞掂蘇州屎呀，千祈唔好令香港人喺全世界觀眾面前出醜呀，以免「創造傳奇變創造笑話」。

唔好以為問題只係出於硬件喎，軟件同樣眼冤。早幾日嘅百日倒數火炬傳送場面冷清，觀眾小貓三四隻，明顯同宣傳不足有關。睇番遠少少，今年五月將軍澳運動場舉行倒數二百日活動，政府請來九個東亞運聯會委員嘅代表出席，你真係估佢唔到，大會竟然全場以粵語廣播，並無英語麗音，一眾外賓聽到一頭霧水。當大會司儀邀請各代表上台就座，噏完八個國家同地區，硬係唔提「中國香港」，東道主代表惟有面懵懵「自動獻身」上台就座，瘀爆鏡！唉，東亞運係香港第一個主辦嘅大型國際賽，到時咯喎，如果畀人覺得你係搞緊一個「將軍澳區小型校際賽」，香港人真係乜架都丟清！講到尾，舉辦大型運動會，是需要長時間籌備配以適合的環境和大量金錢來建造的，並非霍公子想取悅霍老先生而迫政府硬上馬的項目！否則，今年十二月賽事舉行期間好可能係香港「揚羞國際」嘅黃金機會。最後，我慶倖2006年亞洲運動會爭辦戰中，香港輸比多哈，否則，香港係2006年已經「揚羞國際體壇」，令好多人哈哈笑！

[ 本帖最後由 tlkwan 於 2009-8-31 03:07 PM 編輯 ]

電梯男

中國特色

電梯男

假大空  

mnbvc

東運刀係為發財先爭唔通真係想香港出名咩
不過到時各國捐手刀係到仆街捐手就唔方唔出名