|
- 帖子
- 40777
- 精華
- 5
- 威望
- 18931
- 魅力
- 1745
- 讚好
- 0
|
117851#
發表於 2010-3-11 10:25 PM
| 只看該作者
呢幾日, 同咗呀ruby 姐四圍去, 睇狗.
佢都冤咗好耐想養狗仔, 由返嚟香港開始冤到依家..........
但係佢又唔諗吓, 我地仲要繼續行程喎, 有d 朋友已經問咗好多次幾時過去佢地嗰邊; 咁又係, 唔通等滿月酒先一次過咩? 
尤其係, 我d 藥淨番兩個零月, 都差唔多係時侯要返去"排街症"喇.........
佢嘅答案都幾奇特.
"咁我地可以帶sunny (名都改定! 可憐我有個老死又係叫sunny, 佢一聽已經反對, 但反對就當然無效啦 ) 一齊去嘛!  物仲好, 佢見證我地嘅愛情足跡 (foot print of our romance) 呀~ "
但係帶狗四圍去, 好唔方便喎.........上機都多嘢搞啦..................
"老公您咁叻實無問題咖, 呢d 對您都唔會有難度嘅~  "
嘩! 我神仙咩! 就算出入境搞得掂, 我都唔識帶住隻狗四圍走啦, 照顧一隻小狐狸仲未夠咩............
再者, 我仲要"排街症"喎.............
"咁物啱咯! 到時我分分鐘陪住您, sunny 又可以陪住我, 您可以放心休息唔駛擔心我咯~ "
我幾驚佢話係"安息"而唔係話休息呀..........
狗我自問都養過, 但真係只係"養", 從來無理會過; 以前d 狗會認得我係主人, 都係dog trainer 將我d 衫比佢聞等佢熟識我味道, 我同我以前d 狗出街十隻手指都數得晒, 都係應囡囡要求先帶佢出去.
今時今日會唔會都係咁呢? 我就真係唔知, 不過學馬沙條死仔話齋, 我呢亭人連婚都結得, 睇怕都無嘢做唔出.......
又好似啱啱地喎.....
不過最頂唔順就係, 餐餐比隻小狐狸用d 渴望嘅眼神詐晒嬌, 結果我都係決定投降輸一半算喇........
但係想養咩狗呢? 呢個真係有難度.
大少姐要求如下:
1. 要好cute 嘅
2. 要唔大隻嘅
3. 要毛唔長唔短嘅
4. 要活潑嘅
5. 要乖嘅
6. 要靚仔嘅
7. 要係公嘅
咁即係要乜? 我真係抝晒頭...........
諗嚟諗去我淨係諗到去玩具反斗城買隻入電芯嘅玩具狗比佢.
諗還諗, 結果都係比佢捉住咗去睇狗.
買唔係問題, 但係我就想去愛護動物協會(SPCA)睇吓先, 咁ruby 都好乖, 一口就話好; 當然, 如果可以搵到啱佢心水嘅就皆大歡喜啦.
但係, 去到SPCA 又唔係好似預期咁理想.
飛禽走獸多就真係多呀, 不過狗仔就唔多, 大狗就有唔少...........尤其係唐狗.
本來"有要求等如無要求"嘅ruby, 都話品種無所謂, 至緊要合乎佢"7大原則", 但係一入到去佢就已經比幾隻"over size 狗仔" (即係大狗啦!) 吠到嚇親!
個職員同ruby 講, 咪睇佢地好大隻, 其實好溫馴........但係老實講, 又真係同ruby 姐嘅"7大原則" 爭好遠........
個職員仲話, 只需要$1000就可以帶佢地走, 不過就要做吓家訪.......咁佢地嘅要求又唔過份喎, 如果ruby 啱嘅我都諗住要夠兩隻, 陰公吖嘛!
但係ruby 姐真係睇唔啱, 咁又無理由逼佢要咖..........衰得佢後來去咗睇龍貓! 不過就當然無要啦, 佢心目中嘅 sunny 唔會係鼠類吖嘛.
結果, SPCA 嘅"小狗" 我真係幫唔到佢地, 唯有帶住失望嘅老婆大人四圍去睇啦.
咁就大災難開始喇.
香港九龍新界.......所有寵物店集中嘅地方都行勻晒, 大大話話都超過50間.
合乎ruby 姐"7大原則"嘅"侯選佳麗"呢, 多就無, 廿零三十隻啦..........
我真係暈低咁滯.
佢又好心機喎, 逐間抄低d 資料, 方便自己做決定.
其中有兩隻, 又真係幾得.
一隻係白色玩具狗仔, 第一眼見佢就只得一個字形容: elegant
行路有儀態到呢, 人都未行得咁型.
一見我地兩公婆, 自動坐底搖尾, 仲要係輕擺嗰隻.
嘩! 如果我係狗公(真狗公呀!!!! ) 而佢係狗女, 溝梗佢!
呀ruby 姐已經尖叫話"係佢喇係佢喇 "
不過佢呢句說話我之前喺其他狗舖已經聽咗過百次呢.................
呢隻狗仔一路行, 其他狗仔已經撲去同佢玩, 佢就攸攸閒閒咁行去食嘢, 食完再番過嚟"電"呀ruby 姐.
如果ruby 係狗女, 咁我有兢敵呀!!!!
本來都諗住傾多兩句比錢, 點知ruby 突然講: "哎唷! 原來佢係女仔嚟咖? "
....................................
噢! 可惜...............唔怪得知佢咁lady 啦, 不過我地都算懵, 玩到最後先知.
最強嘅係, ruby 姐都仲問個店員: "佢有無呀哥或者細佬咖?"
...................................
第二隻, 我只可以用"似足我"去形容.
一隻啡白色嘅查理斯.
去到寵物店嘅時侯, 佢嗰格比一班學生妹圍住.
佢就無乜儀態咖喇, 不過就活潑到暈, 同條毛巾都玩得一餐.
一見我就即表演"冚被", 自己反轉捲住自己, 再伸個頭出嚟望住我.
啤~~~~~~~
問個店員可唔可以抱佢出嚟, 佢話要搵個女仔先得, 因為佢唔鍾意男仔; 平時都係見女仔睇佢先肯"表演".
再啤~~~~~~
ruby 已經嘰一聲笑出嚟, 話呢隻叫"hubby".
.....................啤~~~~~~~
一放出嚟, 嗲到暈, 個女店員直情話如果佢唔係咁貴一早買咗佢.
呀ruby 姐已經同佢玩到.............我都唔知係邊個玩緊邊個.
正當個女店員自我介紹兼講佢屋企d 狗同佢老豆嘅同時 (先旨聲明我無喑示明示溝佢呀吓!!!! ), ruby 又試大叫"so cute! 係佢喇係佢喇! "
第百幾次呢?
點知, 同時間呢隻狗吠喎.
於是我就同個女店員行過去睇吓.
隻嘢一見到我, 跳吓跳吓.
原來要我抱.
我一抱佢上手, 個女店員就好愕然咁講: "你係第一個男顧客佢肯比你抱!"
唔係咁好彩吓話? 你話如果有個靚女同我講, 我係第一個男人佢肯比我抱就話好啫.........
ruby 聽完就話: "老公你鍾唔鍾意佢呀???  "
點知個女點員失驚無神講一句: "佢係你女朋友?"
ruby 就好開心話: "唔係! 我係佢太太呀~ 呢隻狗係新婚禮物嚟咖, any discount? "
"折實咗咖喇, 一萬六千八...............不過未打晒針喎! 你地係要就留電話, 打好晒先call 你地啦! "
吓............................d 態度轉得咁快!?
正當我諗住同個女店員講, 錢我即比狗我照要, 打好晒針送去我指定嘅獸醫診所check 清check 楚先再送過嚟嘅時侯, ruby 已經同我講: "要等呀? 老公我地又去第二間睇咯~ "
咁唯有又繼續睇..........
睇到今日, 電我就無乜喇.............不過呀ruby 姐就樂此不疲, 仲上埋網check 佢睇中嗰d 狗嘅資料添.
不過, 同時間我搵人check 過, ruby 睇中嘅狗入邊, 有幾間寵物店嘅商譽好差, 專賣病狗.
其實我有做功課嘅, 係個傻妹唔知啫~ 
做人老婆大個女喎! 咁我無理由出咁多聲咖, 等佢自由發揮吓先啦~
不過, 難得佢有"任務", 咁比佢做多d research 都好, 最緊要佢鍾意.
係難為我啫~ |
|
去A佬度望下先
