怪人米不多

怪人米不多

怪人米不多

怪人米不多

怪人米不多

怪人米不多

怪人米不多

怪人米不多

城中名人藝人近年生雙胞胎成風，38歲的樂壇天后陳慧琳（Kelly）昨日也宣佈再度榮升媽咪，自爆接受人工受孕後意外懷孖胎，現已懷孕三個月，預產期為暑假。據悉Kelly前年誕下蝦餃仔劉昇後，一直渴望追多個女，惜遲遲未有聲氣，由於她欲在40歲前完成生BB大任，結果聽從醫生建議接受人工受孕，終如願以償。

38歲的陳慧琳再度榮升媽咪，昨日她直認人工受孕，意外地一箭雙鵰懷孖胎，難怪懷孕三個月的她腹部已隆起。

繼梁洛施、黎姿和徐子淇等先後懷孖胎後，陳慧琳昨日到迪士尼樂園出席五周年主題活動時，自爆經人工受孕下再度懷孕，更親口承認懷有孖胎三個月，換言之，現年歲半大的蝦餃仔劉昇將會在暑假做哥哥。

Kelly昨日與李克勤一同唱活動主題曲《飛躍奇妙》，Kelly唱歌期間與米奇老鼠碰鼻打招呼，之後又與特首曾蔭權及樂園高層主持揭幕儀式。大肚Kelly披厚褸包裹圓潤腰腹，但腳踏3吋高踭長靴，其後她接受訪問，在旁的克勤謂她有事宣佈，Kelly即笑咪咪說：「我有咗孖胎，夠三個月可以公佈啦，未知係仔定係女。」問她心情如何？她說：「開頭好驚，驚陀唔掂，見步行步啦。」

08年Kelly和劉建浩結婚後即努力造人，如今她再度有喜，令老爺（右）喜上眉梢。　資料圖片

Kelly陀孖B，李克勤即拱手恭喜她。

「老爺奶奶好開心」
克勤八卦Kelly上次懷孕與今次的分別，她答道：「今次反而驚，上次第一胎個肚已經大到想爆開咁，驚今次兩個會好巨，又驚應付唔到。」會否減少工作？她說：「睇個肚有幾大啦，如果唔係好大就出嚟玩吓，到個肚大到唔想見人就唔出街。」原來Kelly未告訴蝦餃仔做阿哥，此時克勤教路：「佢明o架，你喺生之前講佢知，再買定禮物話係細佬送。」
Kelly指家人得知喜訊後又驚又喜，她說：「親戚都冇人試過，今次（指得孖胎）唔係計劃之內，失咗預算，屋企人開心到爆，又嚇親。老爺奶奶好開心，爹哋媽咪都好開心。」她承認孖胎屬人工受孕，她說：「因為想40歲前生，家都38，就嚟39歲。聽人講越遲生，BB越危險。自己努力過一排，搞搞吓又唔係好得，又怕40歲風險大，怕太晏生，所以醫生提議囉。本來想要一個，點知就有咗兩個，加埋三個夠啦，其中一個係女就得啦，唔可以太貪心嘅。」孖B出世後，Kelly是否打算「收爐」？她說：「生得出就係，到時唔只收爐，封爐㖭呀，今次開硬刀。」

Kelly長子蝦餃仔已一歲半大，今年暑假他將升呢哥哥。　資料圖片

大肚Kelly貪靚依然，腳踏3吋高踭長靴的她與米奇親熱錫錫。

華仔帶朱麗倩求醫
前年Kelly為丈夫劉建浩剖腹誕下長子蝦餃仔，據悉當時為她接生的何永超醫生，是生殖醫學專科權威，有不育聖手之稱，由於Kelly今年9月滿39歲，一直恨追多個囡囡的她希望在40歲前完成生兒育女的大任，故去年她已不設防積極造人，但大半年過後仍沒聲氣，最後她在醫生建議下在港接受人工受孕，試了幾次終於成功，還意外地一箭雙鵰。今次同樣由何醫生負責其生育大事，Kelly會留港安胎及分娩。
除了Kelly是何永超醫生的客仔外，據知吳君如和吳鎮宇太太生BB都由他接生，李嘉欣也曾向他求診；有指一直恨生仔的劉德華也曾帶妻子朱麗倩見何醫生，希望求子成功，難怪上月Kelly擔任華仔演唱會嘉賓時，二人在台上交流湊仔湊女經勁啱口形，其實當日Kelly已有孕，但因未滿三個月擔心BB「小器」，故才拒認有喜。
Kelly昨於活動後接受記者電話訪問，她表示電影《大鬧天宮》的戲份已拍竣，下月會拍攝廣告，但出埠工作全部暫停，她強調無息影打算：「我以後會用多啲時間照顧小朋友，但生完都會繼續做，攞個平衡。」她稱陀孖B相當疲累，令她經常渴睡：「我夜晚9點前瞓，都會做吓瑜伽、步行，胃口冇乜點變，但因為有兩個BB，所以食多咗鈣質，每日都要飲奶、魚同豬骨煲嘅湯，醫生都有開鈣片我食。」



李克勤盼續約環球
此外，克勤昨表示不會亮相亞視春晚節目，他說：「我過年一早攞咗假陪細路仔，但唔關邊個台嘅事。」有傳東亞斟他過檔，華仔為克勤提高身價，由2,000萬升到3,000萬，克勤對此笑說：「呢啲咪友情可貴囉，買嘢好貴嘅貴。我真係唔知，我叫咗張國忠（經理人）唔好講我聽。」克勤滿約環球後前路如何？他說：「南華足球隊、東亞銀行同環球三個地方，等我問吓個仔先啦，首選梗係環球，去慣去熟，最好唔好走啦。」

怪人米不多

怪人米不多