我地打工仔既心底話~

ter215

打工仔心底話:

現今打工甚淒涼 返工慘過去打仗
其實只係為兩餐 唔係打劫唔係搶
只望兩老能安樂 養妻活兒咁平常
究竟有乜咁哀傷 不如大家來參詳

見工已經夠惆帳 番工更如入墳場
首先唔好大衰相 十八武藝要高強
天文地理電腦科 多國語文要識相
ＡＱＥＱ加智商 唔係上市軟件商

看更原來識雞腸 掃地都要寫文章
學士碩士唔馨香 因為博士都在場
人工一定唔理想 七仟左右已中上
十二個月無雙糧 兩年合約要裝香
半年之內有工返 已經算係好收場

開工應該喜洋洋 點知世態更炎涼
資源增值好榜樣 以為發揮你所長
光管燒左等你換 影印食紙你當殃
電話唔通都關事 水廁唔通你清場
電腦壞左要識整 發現病毒要早揚

對付下屬要識相 對住上司要讚揚
對待同事要禮讓 對住老闆扮羔羊
老闆個仔問功課 資料搜集你擅長
同事出錯有你份 仲要鬧你正粉腸
開會猶如打靶場 比人插到啪啪響
翻開肚皮睇全相 鬧完仲要拍手掌

工餘進修係妄想 回家食飯無相量
想放大假來休養 老闆面似碳一樣
晚晚加班無沖涼 唔通真係嫌命長
放假以為好安樂 手提電話日日響
笑面迎人裝模樣 當正自己做歡場

以上所講無誇張 全是我的生活相
奉勸各位打工仔 積極求存為至上
年尾流流高危日 偷懶都係咪咁揚
香港打工係咁樣 大聲疾呼吹唔漲

chun_singho

首詩真係正, 推!!