[轉貼]周星星經典對白

手田水

星爺經典對白


《望夫成龍》

娣：流星呀！人地話對住流星許願會好靈ga！

石金水：流星喎！話明「流」ga咋，你都信？




《無敵幸運星》

巢家二哥：咁鍾意啜野，啜得好過癮啦？想邊隻手指唔要？

幸運星：隻隻都要架！呢隻(手指公)愛黎打手指模 、呢隻(食指)愛黎篤人背脊 、

呢隻(中指)問候你老母 、呢隻(無名指)愛黎戴結婚戒指 。

巢家二哥：咁手指尾呢？

幸運星：手指尾愛黎撩鼻屎。


《整蠱專家》

車文杰：咩叫洞房呀？

古晶：呢個係一個好生理既問題。首先男女雙方會處於一個極度興奮既狀態，

雙方經過一輪前奏之後，男方會將佢果條……

眾人：果條咩呀？

古晶：果條褲頭帶鬆開。然後呢，新娘就會將佢果塊……

眾人：果塊咩呀？

古晶：果塊紅頭巾揭開。然後呢，佢地……

眾人：佢地點呀？

古晶：就開始洞房。

眾人：車！﹗


《新精武門1991》

大爛雄：強哥，呢排李sir昅得咁緊你知ga啦，我地講數都要轉下方式。

灣仔個地盤就用「山竹牛肉」黎做代號。

強哥：好呀，大爛雄，以前我都益過你唔少好野，今日你應該比我食左呢碟「牛肉」啦！

大爛雄：比你食左我隻「牛肉」，我點向d「馬仔」交代！

強哥：挑！你大我呀！你當我西環d「鳳爪」流ga？

大爛雄：咁講落去，都係兩敗俱傷既姐，如果你比碟「牛肉」我食既，我將旺角兩個「雞扎」俾左你！

強哥：「雞扎」我夠有啦，拿，最多我加多三碗上個月起越南運黎既「蓮子羹」俾你啦！

大爛雄：「蓮子羹」有咩用呀？我屋企仲成箱「菠蘿」添呀！

大爛雄：唔好講啦，我再大方d，加多碟「肉片炒河粉」比你，

你知d粉幾好利錢ga啦，而家成碟炒俾左你喎！唔夠呀？搭多兩條「油菜」啦！

強哥：「油菜」咩意思呀？

大爛雄：冇咩意思架！諗住加d色水好睇d咋！

強哥：挑！大爛雄呀！識左你十幾年都唔識轉膊架！呢碟「牛肉」我地就一人一半！

大爛雄：唔得！我要一個人食晒！

劉精：各位！唔駛爭呀！要多籠咪得咯！


《逃學威龍》

周星星：教書我冇乜信心。

阿頭：唔係叫你扮教師，叫你扮學生。

周星星：扮學生！我當年就係因為至憎讀書先至加入警隊，我唔可以扮學生架！

阿sir，你咁樣做，就等如將我帶去一個滿佈毒蛇猛獸既火山口上面，

唔理我既哭叫，唔理我既哀號，狠狠地、亳無憐憫地，將我用腳一伸，

伸入火紅既岩漿裡頭，你咁做又於心何忍呢？

阿頭：咁咪好囉！等你活得豐富，死得精彩！唔駛講啦，吟詩都吟唔甩ga啦！


阿女麻：請飲茶！

周星星：唔該，唔該。

阿女麻：你地係同學呀？

周星星：係呀！係呀！

阿女麻：一齊讀書ga？

周星星：係呀！係呀！

阿女麻：書友黎ga？

周星星：係呀！係呀！

阿女麻：你地係同學呀？

周星星：係呀！你點知ga？


周星星：較剪腳喎，你話笑死唔笑死。

達叔：唔係呀！佢以前真係好勁架。

周星星：以前咋下話。

達叔：一個打廿個。

周星星：打廿架飛機就有佢份。


史提芬周就即係steven chow亦即係周星馳o既英文名o既中文串法

[ Last edited by 手田水 on 2005-10-8 at 05:57 PM ]