公園韆鞦女鬼
公園韆鞦女鬼公園除o左係俾人遊玩同抖o下o既地方之外，其實亦聚集o左好多「另類生物」。所以如果有一日你突然間o係公園見到奇怪現象，都係即刻調頭走為妙，因為遇見佢o地，分分鐘惹到一身蟻。
公園白衣女玩韆鞦
麗欣住o係慈雲山一個公共屋村，由於對下有個細佬，所以每日放學之後都要陪佢落去樓下公園玩。今日差唔多六點鐘左右佢o地兩個又落去玩。
「咦！今日咁少人o既，唔通o的人暑假去晒旅行？」麗欣落到公園竟然一個人都見唔到，只係得韆鞦o個邊有一個人o係度盪o黎盪去。
「家姐我都想打韆鞦呀！」麗欣細佬阿進拉住佢話。
「有人玩緊呀！你小心o的行埋去，因住撞到你呀！」麗欣對細佬講。
當兩個人差唔多行到韆鞦o個陣，麗欣突然覺得有o的唔妥，因為佢竟然見到玩緊韆鞦o個個女仔身後出現一團光，而且個女仔個樣實在好生面口，都未見過佢o黎玩。
「阿進你見唔見到佢身後發光呀？」麗欣指住個女仔講。
「唔見呀！」阿進話。
「唔見？」麗欣停步、捽o下雙眼再望清個女仔。個女仔頭髮唔係太長，著住一條白褲同一件白色衫，對眼好細，差o的細到睇唔到，面色好蒼白，但係比人o既感覺又好舒服。於是佢索性行埋去望個女仔，點知行行o下突然有個阿婆跑住埋o黎喝住麗欣：「唔好行埋去呀！」
聽到個阿婆咁叫，麗欣當堂成個人呆o左o係度。「點解唔行得埋去呀？」
「佢同你係屬於唔同世界o既人，你唔可以行埋去o架！」個阿婆講。
「唔同世界？你講咩呀？」麗欣講完之後即刻擰轉頭望頭先個韆鞦架，點知已經見唔到個女仔。於是佢即刻問細佬阿進。
「個女仔走o左o勒？」麗欣問。
「佢突然間唔見o左！」阿進答。
「細路，快o的走啦！以後唔好o係度玩喇！」阿婆講。
呢個時候麗欣都覺得有o的心寒寒咁，所以決定拉埋細佬返屋企。返到屋企門口時，麗欣如常開門，不過連插三次鎖匙都開唔到門，度門就好似俾人o係後面頂住咁。到o左扭第四次門匙時，度門終於開到。但係入到屋竟然見到阿媽同阿爸都坐晒o係廳度。
「阿媽個門鎖係咪壞o左呀，我先頭扭o左幾次都開唔到！」麗欣問阿媽。
「開o左好耐咩？聽唔到開門聲喎！」阿媽話。
食完飯之後睇o左一陣電視，麗欣阿媽就落街買宵夜。無幾耐突然有人拍門。
「唔通阿媽無帶鎖匙？」麗欣聽到拍門聲就即刻行埋去準備開門。循例佢都會先由防盜眼望出去門外，不過當麗欣今次望出去時，佢見到o既並唔係阿媽，而係一隻紅到好似士多啤梨咁o既眼睛連半邊面，隻眼仲好慢咁眨o左一o下，嚇到麗欣尖叫住退後。
「門後面有隻眼呀！」麗欣大嗌。聽到麗欣咁嗌，阿爸即刻跑過去門後面望個防盜眼。
「乜o野紅眼呀！你阿媽o黎o架！」阿爸邊講邊開門。
「我頭先真係見到門外面有一對紅色眼行埋o黎望住我o架！」麗欣好驚咁嗌。
呢個時候麗欣屋企o既窗突然全部自動打開晒，屋企o既電視機仲好似俾人抬起咁升上半空。麗欣一家見到咁o既情況當然即刻跑出屋企，結果兩個鐘頭後佢一位阿叔帶o左一個茅山阿伯入屋。
「我頭先見到一隻紅色眼，跟住屋企o既窗就自動打開晒，傢俬飛起晒，好恐怖呀！」麗欣講。
「你屋企裡面有一隻女鬼飄來飄去，好似玩緊咁呀！你有冇遇到咩古怪事？你幾時惹佢返o黎o架！」茅山阿伯話。
「邊有呀……係喇！我下晝落去公園玩時見到一個著白色衫o既女仔打緊韆鞦，後尾又唔見o左，當時仲有一個阿婆叫我唔好行埋去個女仔度。會唔會係佢呀！」麗欣諗諗o下覺得都得個女仔唔妥。
「裡面o個隻都係著白色衫o既，應該係啦！我而家入去同佢講數，請佢走，你o地唔好入o黎呀！」茅山阿伯話。
茅山阿伯入到屋之後，只係幾分鐘就出返o黎，然後又叫麗欣入去。
「你入去同佢講人鬼殊途，你係唔會同佢玩o既，叫佢快o的走啦！」茅山阿伯吩咐麗欣。
「我唔會同你玩，你快o的走啦！的好驚你呀！」麗欣入到去之後就狂叫呢兩句。神奇在嗌完之後屋企就即刻回復平靜，所有傢俬落返晒o黎。
麗欣一家見到，都鬆o左一口氣。茅山阿伯呢個時候就話：「隻女鬼走o左o勒，但係你以後都唔好再去o個個公園。而且就算o係第度見到怪事都唔好八卦，因為佢o地知你見到佢，會以為你想同佢做朋友，到時就麻煩喇！」
頁:
[1]