關智斌五窮六絕七翻身，衣錦還鄉，Thomp 有乜啟發?
小鮮肉  
【東方日報專訊】近年北上出征嘅關智斌（Kenny）大成功，短短4年時間凱旋歸來挾一億軍餉回鄉，阿爸、阿媽、阿爺、阿嫲個個有份重賞大宅，搞到係人都想認親認戚。家陣嘅Kenny今時唔同往日，未紅時個樣生得青靚白淨，因為成個女兒相就被人叫做「小斌女」，家陣下下做內地劇男一，唔少劇都靠佢搶收視，人人都改口叫佢「大斌哥」啦！
只不過佢嘅最佳人氣代表作，唔係乜劇乜戲，係喺個活動上撞見萬人迷碧咸，佢將同碧咸張合照po上網之嘛，嘩！即時群情洶湧，葡萄一地，啲人猛話羨慕，不過唔好睇錯隔籬，啲人係話：「自己都想做碧咸，可以同Kenny影相。」事實證明，原來Fans對佢嗒糖仲多碧咸。
其實佢離開組合BOYZ，單飛發展後行足五年衰運，個人唱片冇得再出已經夠慘，仲做咗兩年「男版薛凱琪」，日日等工開等到頸都長，正所謂長期糧尾好快餓死，咁啱有導演想搵人返大陸拍劇做三打七閒角，佢諗都冇諗，仲着草咁款拖住個篋潛行求生，俗語有云「一命二運三風水」，Kenny嘅成功就係「一捱二聾三命硬」。
地獄人間無限輪迴
以往有助手跟出跟入，返屋企做皇帝仔嘅佢，嗰陣冇銀就連80蚊人仔一晚嘅旅館都照住，環境、設備斷估好唔過砵蘭街嘅時鐘酒店，仲要咪天真以為Kenny喺香港假假哋都係偶像歌手，人離鄉賤有冇聽過呀？況且喺內地啲大哥多的是，家陣做個茄喱啡梗係冇人理啦，咬實牙齦瞌埋對眼係咁捱先係上策，佢曾經講過：「化妝、整頭要見縫插針，搞掂咗就自己等埋位，亦都冇住宿安排，收工就拖住個篋返旅館o架啦！」聽落都幾悲秋風。
喺內地拍劇做閒色，仲要學識扮聾，被人笑係「勞模」，連做賊呀、路人甲、強姦犯呢啲人見人藐嘅角色都撈埋，因為聽不見為清淨，就會自我感覺良好；至於要「命硬」，就頂得順笠住厚過太空衣嘅戲服，再喺36、7度超時乾蒸，一日中兩次暑，嗰頭暈低，嗰頭起身又輪迴拍過，地獄、人間環迴又折返都識交戲先叫過關。好在皇天不負可憐人，有導演又搵佢執二攤拍《追魚傳奇》扮書生，點知時來運到，鹹魚翻生變上鮮。
髮線愈高愈旺
講真，人有錢自然有自信，「大斌哥」儘管有男人最痛嘅脫髮問題又如何，佢早前喺香港出席活動時詐嬌話：「哎吔，我呀，喺大陸拍劇連續兩個月戴住頭套，之後覺得髮線高啲啲，返港剪髮先知膠水堵塞頭髮毛孔呀，不過一把年紀算係咁啦！」把口就話驚驚，但表情不知幾風騷骨，容光煥發過女人，其實髮線高又使乜怕，男人髮線就如「發」線，愈高愈旺，正所謂十個光頭九個富，如果你係第十個就認命啦！ |
發表於 2017-9-24 06:33 PM
| 
