【掉哪媽冇得講廣東話？】《十年》

港人唔靠大陸冇得撈
梁健平：嗰種難堪感同身受
《十年》本來只此一家戲院上映——百老匯電影中心，場場爆滿，昨日宣佈加場。《方言》主角梁健平得悉1月1日加開的太古城UA場次如今只餘最前一行有位，奇道:「點解買唔到飛？」

《十年》正式上映半個月左右，票房暫收67幾萬。一家戲院。梁健平笑道:「咦，咁咪好過好多所謂港產片？你一間戲院咋大佬，人哋百幾個house嗰啲都係幾十萬就收工喇喎!」
方才梁健平講完《十年》的《自焚者》(導演周冠威)最令他震撼，現在說回他主演的《方言》(導演歐文傑)。故事預言十年後的香港，廣東話被取締，只有靠攏大陸、說普通話，才有搵食的權利。梁健平這個不諳國語的的士司機，完全被這城市「摒棄」，處處被禁足。
「其實我都唔係好識講國語，我識半桶水，所以好感同身受。將來第日如果香港再變，譬如我哋香港演員，都會諗，我要快啲學好啲國語喇，如果我有機會上上面拍戲，唔係就死喇!」
「喺戲裡面，你見到有啲講國語講得好好嘅就有得撈，有啲普通話屎嘅，咁有啲地區我哋係唔可以進入同埋上客。故仔裡面，last嗰場我俾人上咗車，心諗算喇俾佢上車，俾行家告發，俾差佬抄牌。嗰種難處，嗰種難堪，同埋你五十幾歲人，前路茫茫，其實香港好多人都係咁，即係，我唔揸的士我做乜呢？我唔做演員我做乜呢？好有感覺。」
「我成日講一樣嘢，係要有共鳴。」