夏蕙BB親證從未整容，如假包換，貨真價實

自拍男

http://hk.apple.nextmedia.com/enews/realtime/20151015/54318139


一向被盛傳「變臉女王」嘅黃夏蕙，已屆82歲高齡，仍然關心時事，亦都八卦娛樂新聞。今日最爆嗰兩單，一係七警被落案但同時曾健超亦於同日被律政司起訴，原告變被告；另一單，當然就係Angelababy今日突襲中國醫學科學院整形外科醫院要搵專家驗證冇整容。

夏蕙BB接受《蘋果》訪問時，就自稱身上除咗假髮同眼睫毛係假之外，其他都係真，又重申從未整容——冇錯，夏蕙BB重申佢係冇整過。早前佢接受周刊專訪時，都劈頭否認曾整容，謂因為兩好友都係因整容搞到命仔都冇，故唔敢攞條命較飛。至於個妝——當時夏蕙BB係話，後生嗰陣唔識化妝，所以越化越濃。到年紀大，開始多皺紋，個妝就更濃。一切全是愛美之過…

咁今時今日夏蕙B點講呢？佢竟然心思思：「我係如假包換(指冇整過容)，見皮膚鬆弛，想拉下面皮，又想整高鼻樑及下巴，覺得有呢個需要。」

咁醫學美容中心嘅醫生有冇意見可以提供？夏蕙B真係登門造訪問意見，醫生就用手同尺檢查面部及進行評估，完成晒之後，夏蕙BB笑言：「樣樣都想整，又再打走笑紋、眼紋，鼻再整高啲靚啲。」

但醫生就覺得，已屆82歲高齡嘅夏蕙BB係唔適合整容:「鼻就夠高，唔使整，有啲儀器係可以刺激骨膠原增生，不過佢年紀唔適合，應該冇效。」

對於「整容」定義為何？醫生表示：「依家好多技術有『微整容』，『微整容』好多針藥，鼻樑都未必須要開刀，打透明質酸都OK，可以維持一年半年。不過依家有啲人貪心打過量，打得太多，陽光下會睇到透明。」