吳啟華搏命搵錢養四頭家，賭枱過日辰，Thomp 有乜感受?
男人之虎  
吳啟華與內地演員石洋子離婚4年來，不時與前妻帶同女兒吳熙兒外遊晒幸福，被指藕斷絲連有機翻撻，但原來全是假象。據知石洋子回復單身後每月拎6萬人仔贍養費，唔使湊女生活無憂，快活過神仙，根本冇諗過會與吳啟華復合。寡佬生活除了搏命搵錢養四頭家，有時間都要鬆一鬆，53歲的吳啟華多年來賭根深重，愛流連賭場及以麻雀會友，早前本刊記者直擊吳啟華在港約朋友打雀局，由朝打到晚最後戰敗一支公返家，感情生活冇著落，惟有賭枱過日辰。
吳啟華 撲水養四頭家
近年為了養四頭家，吳啟華曾表示疲於奔命，長期中港兩邊走，頻頻接劇、接電影，投資內地連鎖甜品店，表面上豬籠入水，實情有苦自己知。事實上，他要養活前妻石洋子及9歲的親生女兒吳熙兒、負責照顧囡囡的前岳母以及自己的父母，知情者透露：「個女讀國際學校一年要成廿萬人仔，每個月又最少畀6萬人仔前妻，仲有前岳母一家同自己父母，啟華搵少個崩都唔得啦！佢好錫個女，到依家都冇同佢個女講爸爸媽媽已離咗婚，仲定期一家人去旅行扮恩愛，每次都使幾十萬。其實啟華咁做都係想留條後路畀自己，等前妻有日會回頭，不過想還想，依家石洋子做番單身女王，個女就長期由婆婆湊，佢每個月唔使做都有錢收，周遊列國吃喝玩樂不知幾happy，又點會想食回頭草？」
為了讓愛女感受更多家庭溫暖，吳啟華每年會包起三、四次家庭旅行的所有費用，去年一家三口帶埋岳母去過日本與澳洲等地，旅行期間任玩任買，每次花幾十萬碌爆卡而回，吳啟華坦言負擔好大，但亦有指他為博翻撻前妻所以願意無限付出。
吳啟華與細他21年的石洋子於14年結束七年夫妻關係時，曾有報道指石洋子是「大花筒」才致婚姻破裂，但當時吳啟華卻維護嫩妻說：「想買靚嘢係人之常情，除非我冇能力，有能力會滿足佢，而且佢係我太太，唔買畀佢買畀邊個呢？」
即使石洋子被指是「大花筒」、「洗腳唔抹腳」，但吳啟華是個重情義的人，他非常樂意照顧前妻，並曾公開表示：「洋子永遠係我屋企人，佢係我囡囡個媽咪，我哋有屋企人嘅感覺。」 |
發表於 2018-3-30 01:25 AM
| 
