娛樂滿紛 26FUN - Powered by Discuz! Board

標題: [散文小品區] 一對小情侶__今日情書 [打印本頁]

作者: cityokok 時間: 2008-5-16 11:32 PM 標題: 一對小情侶__今日情書

以下是一個男人對前妻寫的情書 , 雖然是同廣東話寫 , 沒有什麼文采可言 , 但卻是他真正的內心感受。

* * *

老婆...當你睇到依篇野...相信我地已經分開左

還記得我之前日記既entry嗎?

這天..我如常和你傾電話

電話裡面, 你追問過我係乜野意思...

當時我不想多講...只說是隨便打...甚麼舊同學的電話似的

現在我可以告訴你了...那是我們真正分手的訊息..

06年12月4日至 07年 12月25日....

諗番我地岩岩一齊既時候.. 正是一對熱戀中的情侶..

無論做乜野..只要對方係身邊...就已經好足夠

依種感覺...　我從來未感受過...

記得我地未一齊之前...我地第一次係K房kiss... 果時我真係好開心..可以同到自己暗戀既人咀咀

到之後係k房廁所既事...雖然過程唔愉快..但我都好享受..

我唔知我地一齊係咪因為性.. 但一齊之後..我的確真心真意愛你的..

每次你發脾氣..我都驚你變心..次次都係我死死氣地打俾你..

可能你覺得我因為怕無聊先會tum番你... 其實唔係囉

只要可以同番你一齊..我甘願做你既"死狗".."鵪鶉仔"..

好多時候..我自己係度諗...希望第時既老婆可以係你..

唔知你係咪呢?有沒諗過同我結婚?

但的確太遙遠啦.. 可能我地仲細..

唔緊要..我地做住情侶先啦

時間一日一日咁過... 話咁快考完A-level....

唔駛番學...見既時間一定少左

你話要搵暑假工... ok...但係我乜都未做過..

想搵份岩心水既工已經難... 但點解死都要揀係上環返工?

因為我想日日都見到你...唔知你返乜野工...擔心你俾新同事溝,,,

或者因為咁..問題出黎啦..

我地仲係咪情侶 ?抑或只係陪食晏既朋友?

依段時間...我地既感情已經淡左

只係逢星期六放工先一齊出街...

每次都係睇下戲食下飯咁..

我又成日話要趕住番屋企...連街都唔願行

要你過咁悶既拍拖生活...真係對唔住..

而你亦變了...每次見面都會只同我拗交..或者話我變柒左

我亦知你已經不再愛我了..

你鐘意的男生是清靚白淨...長頭髮...

而我卻相反...

我不是刻意逆你意..可以既話..我都想扮到慶太咁靚仔

但我唔得...我亦知你唔會同得我一齊得好耐

你講得岩..我根本唔識做人男朋友...

我一D都唔浪漫... 出街又沒planning...

連記念日都求求其其食餐飯就算..

如果係第二個女仔..應該一早飛左我啦..

我唔明你點解可以忍到我成年...

亦因為咁..我想俾機會自己做番好D去補償

但每次都令你失望..對唔住

好多次我都想同你分手... 但過幾日你都會打番俾我..

雖然我沒你咁易tum..但我都會心軟

我自私...怕沒左你會寂寞..

我根本沒為你著想..

但係今次.. 我下決心要同你分開了

我唔想再耽誤你時間...浪漫你既青春

我地的確好多野唔合...雞毛蒜皮既野都可以嘈一輪..

我唔明點解人地既女友可以咁開心....

人地拍拖有好多節目...

人地會送好多野俾女友...

人地唔會成日激到女友發脾氣.

而我...?? 每次諗到依度..我都會自卑..

唔知應唔應該同你繼續落去...

到現在..我不知道自己還有甚麼吸引你..還有甚麼本事留住你...

本身屋企又唔係有錢...自己又讀唔到書...

要你跟住我...好似拖累左你咁..

我唔想再哂你時間

直到前兩日..我終於可以下決定了

你係電話度話要分手..

雖然你之後打番黎話講笑...

但我知你係講真的... 一年了...

從你既語氣我聽得出邊句真邊句假啦

"我唔係你豬豬啦".. 依一句話令我好心痛.. 但我扮無野...

你同我一齊咁耐..沒講過一句類似既野..我知你今次係認真的

後尾你打番黎話講笑..仲問我有沒喊 ...

我話無..係呃你的..

點解最近我成日話想同你去迪士尼..

你話D飛貴．．唔抵．．又話約左朋友燒野食．．

但我死都話要去．．點解?因為我童心未盡想搵米奇?

傻啦...只係我在想分手前...俾你留番個美好少少既回憶..

點知你又埋怨我太遲先話去..又話同我去都唔會開心..

叫我不如等下年先去...

咁不如算吧..我知道我地根本捱唔到去下年既聖誕

如果我係你....我諗半年既時候我已經頂唔順啦...

其實每次你提出分手..我都會喊..但我唔會俾你知..

以前我好傻..唔識珍惜你.. 淨係諗辦法溝番你先算...

今次分手.. 我一樣好難受...但同時都好欣慰

拖左咁耐..終於可以俾你自由啦..

由今日開始..以後你提出分手..我都唔會再挽留你..

唔係因為我唔再愛你...

我只係想俾個機會大家..俾機會你去識一個更好既男仔

同時讓自己學下點做人男友...

...

或者過幾年..等我有份穩定既工作..等我學識左點做一個好男朋友...

先至番黎搵你啦..

雖然你可能已經嫁左人..但我唔會後悔..

因為我知今日既決定.. 係為你將來著想

以後你要帶眼識人啊..千祁唔好再搵個好似我咁差既男朋友呀..唔係又浪費多一年架啦

依家係朝早６點鐘..　

依排你成日問我解成個下晝都唔打俾你..

因為我失眠.. 我擔心唔知幾時會同你分手．．

我更加擔心同返你一齊會再浪費你青春．．

依篇entry雖然短..

但我用左好多心機同淚水打的....

入面雖然沒我地既回憶...但全部都係我既心底話....

好多謝你陪左我咁耐...　

雖然我地經歷既野唔多..但我知你付出左好多..

老土講句... 係我辜負左你...

雖然我地已經分開左...但我依然掛住你...

如果可以返轉頭...我一定會做得比以前好...

豬豬我永遠都愛你..

作者: easy_man 時間: 2008-5-17 12:32 AM

說真的,
我被感動了.
係字裡行間,
好似見到自己咁...

作者: cityokok 時間: 2008-5-17 01:24 PM

Originally posted by easy_man at 2008-5-17 00:32:
說真的,
我被感動了.
係字裡行間,
好似見到自己咁...

那的確是一番肺腑之言,
而我想到的卻是 , 她真是好到值得他這樣傷心嗎 ?
希望他會好好面對日後的生活吧!

歡迎光臨娛樂滿紛 26FUN (http://26fun.com/bbs7/)