標題:
2015年「金草莓」視后選舉
[打印本頁]
作者:
港燦男
時間:
2015-12-4 10:35 AM
標題:
2015年「金草莓」視后選舉
阿爺最好戲
第五位：汪明荃《華麗轉身》
汪阿姐入行數十年，演出過無數電視劇，到咗今時今日仍然可以憑著《華麗轉身》上榜，今次阿姐都係飾演野蠻兼乞人憎但係又有靚衫着嘅女人，角色冇突破。再加上劇集播出期間，好多時打開電視都會聽到阿姐用獨特唱腔所唱嘅主題曲「經過那些年，跟你重回那天暑假~」，無綫不停力谷，一班網民當然感到煩嫌，就算而家睇到「經過那些年～」呢五個字都有聲，呢首洗腦歌有可能係阿姐登上Top5嘅一大原因。
第四位：陳凱琳《四個女仔三個BAR》
當時收視低迷嘅無綫憑《四個女仔三個BAR》一洗頹風，大結局爆冷最高錄得32點，同時亦令陳凱琳、何雁詩等四個女仔極速彈起。雖然身為港姐冠軍嘅陳凱琳當時已經常被網民插爆話佢似印度人，又冇演技。不過當時都仲可以話佢唔夠經驗，都仲有得原諒。
第三位：黃翠如《師奶MADAM》
由有線過檔無綫後，黃翠如極速上位，差唔多套套都做第一女主角。憑《師奶MADAM》同蕭正楠定情嘅黃翠如唔知係咪因為當時被蕭正楠電到戲都唔識做，俾網民插佢話每個表情都一樣，師奶造型又恐怖、演技未到家但係又要做女主角咁話。
第二位：陳凱琳《張保仔》
又係陳凱琳呀！不過去到《張保仔》嘅時候就真係令到天怒人怨。因為每一集佢都會用高八度聲線尖叫，兼且演技浮誇兼造作，令到好多觀眾都頂佢唔順。唔知佢會唔會可以同洪永城一齊靠《張保仔》問鼎"金草苺"視帝、視后呢？
第一位：蔡思貝《衝線》
雖然係香港小姐選舉當中輸咗比陳凱琳，不過今次終於可以係呢個榜上面「贏」佢一次。雖然有長腿係好事，但係由於佢係《衝線》入面明明返Office工但係每日都著熱褲周圍走，令人覺得佢淨係掛住賣性感唔理劇情。當然唔少得嘅就係佢奇差嘅演技啦！亦有唔少網民直斥佢嘅演技僵硬到可以演殭屍、講嘢時啲懶音又好似小朋友說話，仲被網民封為「高音貝」，唔明點解無綫要捧佢咁話。
歡迎光臨 娛樂滿紛 26FUN (http://26fun.com/bbs7/)
Powered by Discuz! 7.0.0
