娛樂滿紛 26FUN - Powered by Discuz! Board

標題: 城嫂帶同鄉名店掃貨，執靚同鄉個Look，Thomp 點評? [打印本頁]

作者: DQ男 時間: 2018-7-25 04:28 PM 標題: 城嫂帶同鄉名店掃貨，執靚同鄉個Look，Thomp 點評?

鄉下妹出城

查看相片

方媛穿上黑白間條貼身長裙，凸顯S形身段！
更多

「城嫂」方媛前日撇下老公及女兒，孖女友人到銅鑼灣Shopping。身形Fit爆的她充當形象指導，帶「同鄉」去時裝店變靚啲，其後再化身「C9」去超市買餸返歸做煮飯婆。

去年9月，內地「網紅」方媛為天王老公郭富城誕下女兒Chantelle，可謂母憑女貴，經常出入名店兼周身名牌。出名「愛妻號」的城城早前陪老婆返鄉下補擺喜酒，還親民地招呼一眾鄉里，前日則輪到方媛在港陪同鄉掃貨。

當日下午4時許，戴着名牌Cap帽、孭住名牌手袋的方媛，以一身「漢堡神偷」黑白間條貼身長裙上陣，盡顯Fit爆葫蘆身形，與一名女同鄉於銅鑼灣逛名店。兩女邊行邊傾，有說有笑，期間方媛還形象指導上身，不時在旁給予意見。原本穿白色背心配白色喱士半截裙的友人，最終揀了一件前後Deep V的紅色上衣，付款後還即刻着住走，見其上衣肚臍位開了一個小窿，靚唔靚就見仁見智喇！

變番「C9」超市買餸

方媛為同鄉「裝身」後，變回師奶仔往附近超市買餸，主要選購蔬菜及水果等，期間更一度停低睇榴槤，但最終齋睇冇買。其後，她再往揀選BB用品，不一會已購下大袋戰利品步出。兩人行到攰，於是轉到附近咖啡店搵位坐低歎番杯凍飲，然後繼續Girls Talk，逗留約一小時才離開，急趕返歸慰老公。