娛樂滿紛 26FUN - Powered by Discuz! Board

標題: 食人巨魚入侵香港水塘 [打印本頁]

作者: edwin1978 時間: 2005-6-22 12:18 AM 標題: 食人巨魚入侵香港水塘

兇殘食肉巨魚入侵香港水塘！最近有釣友在大潭篤水塘，釣獲俗稱「金筆」的四呎長巨魚。此產自東南亞觀賞魚，幼期只有兩吋長，但數年間可長達六呎，飼養困難，故被棄置水塘。專家指出，金筆生性兇殘，食量和繁殖力驚人，在外地曾咬死人，如政府不加管制，不僅破壞生態環境，甚至危害遊人性命！

九月是水塘釣魚的季節，有十多年釣魚經驗的發燒友風哥，一次跟友人到港島區的大潭篤水塘垂釣，竟意外地釣獲一條長四呎、重三十多斤的巨型金筆。他憶起當日情景，仍感到驚心動魄。「日我坐岸邊，一心諗住要釣大魚，所以用三十磅魚絲同假餌去釣，等一陣，突然劇烈震動，我知有魚上釣，梗係出盡力去拉啦，但點都拉唔上。」

三位釣友力擒巨魚

風哥立即急召兩位同伴幫忙，合三人之力與巨魚展開一場角力戰。「我同兩個朋友，足足同條魚角力五分鐘，真係手都軟呀。我三個大男人都咁狼狽，如果畀十零歲靚仔，分分鐘被扯埋落水！」他表示，那條巨型金筆，頭像大魚、身似生魚，牙齒鋒利，全身滑潺潺，呈褐黑色。

他伸長雙臂比畫說：「我以前都釣過金筆，但最大都係一呎長，今次真係嚇一跳。以前試過將金筆煲湯，味道似生魚湯，好鮮甜，但今次因為太大條，政府規定唔可以拎走，所以將佢放番入水塘。」

「其實旺角金魚街都有細條金筆賣，好多人鍾意買返屋企養。」風哥從養魚的朋友口中得悉，金筆食量驚人，故不少人最終都放棄飼養。「金筆乜都食，仲恐怖過食人，好多人養唔掂，就拎去水塘放生，我親眼見過好多次啦，有朋友估計全港水塘有成十萬條，我驚水塘魚遲早俾佢食晒呀！」

生性兇猛曾咬死人

香港大學生物多樣性學系榮譽研究員陳輩樂是本港淡水魚的研究專家，他表示，金筆學名為小盾鱧，產自東南亞，是外來入侵的肉食性魚類，與常見的生魚同屬鱧科。「金筆好粗生，只要會郁動生物，金筆都會食，甚至體積比佢大龜、蛇、鴨、水鳥、青蛙都照食，金筆只需三、四年時間，就可以由兩吋生長到六呎咁長！金筆生性兇猛，如果擺魚缸養，你伸隻手指入去，佢會連你隻手指都食埋。」

陳輩樂更指出，印尼等東南亞地區，不時發生金筆咬死人事件。「金筆有護幼習性，東南亞人試過潛水捉魚時，金筆以為有人襲擊幼魚，張口咬落潛水者個頭度咬死人。九八年，已有釣友話畀我知水塘有金筆，我自己都有實地觀察，發現港島區大潭、香港仔等水塘，有為數不少金筆出沒。」

陳輩樂表示，不少飼養者將金筆放生，其實是好心做壞事。「金筆成長後會呈黑色，帶白色雪花紋，同幼期完全唔同，本來不在本港生活，但因為一直有入口，又有人水塘放生，對整個生態環境、食物鏈造成好大傷害。﹂他表示，本土魚類，將會是金筆魚入侵的受害者：﹁本地魚大多食昆蟲、微生物、小蝦等，對於好似金筆呢兇殘入侵者，根本無力招架。聽釣友講，近年已很少見本地藍刀魚，相信好多都俾金筆捕食。」

金筆在水塘出現，會否威脅市民的安全？陳輩樂說：「其實係唔應該構成威脅，因為水塘唔係畀人游水地方，但萬一有人唔小心跌落水，或者有人釣到金筆，拉扯間俾佢弄傷係唔出奇。」

游出山澗恐損生態

對於有釣友估計全港水塘有十萬條金筆，他說：「冇正式統計，不過應該冇咁多，如果唔係，水塘所有魚都死晒啦。好彩金筆暫時只係水塘生活，但如果俾佢游出山澗，後果就不堪設想！郊野地區生物，生命將大受威脅。」他認為最有效的管制方法，就是政府將之禁止入口。「其實香港有好多觀賞魚可供選擇，唔養金筆冇損失，美國最近禁止中國生魚進口，目的都係要保護當地生態環境。」

其實旺角通菜街金筆魚的銷情也不錯，一間水族店的老闆表示，金筆從泰國入口，售二十八元四條，深受飼養人士歡迎。此外，水務署高級工程師客戶關係主任林文鵬表示，大潭水塘的水質並無問題，生態平衡方面亦無異象，對於有釣魚人士發現金筆，由於署方只關注水質問題，故並無有關資料，但會交回署方的科學部作出跟進。此外，市民在水塘傾倒魚類，如未得到水務署同意，最高罰款港幣兩萬元和監禁兩年。

另一方面，漁護署發言人指出，漁護署一直關注外來物種對本地生態環境的影響，雖然郊野公園條例並無禁止在水塘放生魚類，但是，市民不應在淡水環境包括水塘放生魚類或其他動物品種。

作者: claudiuskwong 時間: 2005-6-22 12:35 AM

圖片附件: y503111_big.jpg (2005-6-22 12:35 AM, 62.7 KB) / 下載次數 326
http://26fun.com/bbs7/attachment.php?aid=385368&k=829eb34593e6adaa1f09248386894c38&t=1732448598&sid=ax8J7J

圖片附件: y5083102_big.jpg (2005-6-22 12:35 AM, 43.4 KB) / 下載次數 454
http://26fun.com/bbs7/attachment.php?aid=385369&k=5071713619c61419d52c1406bda0828e&t=1732448598&sid=ax8J7J

作者: biglin 時間: 2005-6-22 06:13 AM

omg!!wut a big fish!!!as long as a child!!

作者: aia_k 時間: 2005-6-26 04:03 PM

what a big shit <-

歡迎光臨娛樂滿紛 26FUN (http://26fun.com/bbs7/)