娛樂滿紛 26FUN - Powered by Discuz! Board

標題: [轉貼-重整]黃子華集[00+] [打印本頁]

作者: qweqweqwe 時間: 2005-10-26 01:41 PM 標題: [轉貼-重整]黃子華集[00+]

01. 愛情


白雪公主,幾甘純潔無瑕.

但係諗真o的,白雪公主,識得o個個係王子,灰姑娘識o個個又係王子;

有個有特殊嚐好,鐘意錫青蛙o既女人錫o左隻青蛙一啖,隻青蛙變出黎o既又係王子!

有冇人諗過根本個王子係同個人呢?

根本呢個王子都不知幾花心,周圍溝女.

仲無良到扮青蛙去溝添!

---------------------------------------------------------------------------------------------------------------------

02. 情竇未開


我第一次戀愛之前，我認為自己就係楊過，
而我同書里面個楊過唯一唔同的地方、就係佢有隻大鵰。

而我0個陣、就鐘意撚呢個相思多D。
同楊過一樣，我從來冇諗過要考第一。
我只需要愛情，只要搵到我0既小龍女，
我就可以拋棄學業，退隱山林，搬入新界住。
但係我一定要住西班牙別墅，我唔住得村屋，我怕蛇蟲鼠蟻。
然後每個月至多出一次市區，不過我唔會逗留得耐，問亞媽囉完零用錢我就會番番入去。

冇錯，基本上、我由中一至中五都係0係呢種咁超然0既思想下度過。
當時學校最流行的辯論題目係：中學生應否談戀愛？
我認為，我地應該辯論0既係『中學生應否讀書？』

而0係我第一次戀愛之前，我0既小龍女只需要一個條件，就係靚，我知道我咁諗你好幼稚，但當時我年紀小，唔知道原來身裁都好重要。

---------------------------------------------------------------------------------------------------------

03. 性


聖人話:『食色性也！』

食同色，好唔同！
一個人無論幾鐘意食，
會唔會比幾十蚊入戲院睇套『蒸氣騰騰小龍包』？

一個人無論幾鐘意食，
又會唔會為0左望一舊冇包住0既牛肉望到俾車撞？

-------------------------------------------------------------------------------------------------------------

04. 愛情


戀愛唔係PART-TIME，你唔可以話：『愛！做完咪走囉！』
戀愛係一盤生意，你要二十四小時諗住佢。

自己生意，冇所謂PART-TIME 正識。
人地放假或者過年過節，你更加要開OT添。
行花市啦行海旁啦睇戲食飯啦....

你有乜0野競爭對手呢？
我冇競爭對手?！
你估你係專利巴士公司呀？
港巴都執0左啦！

有冇考慮結婚？
咁就要向公眾交代，咁就即係上市啦！
所以，『中學生應否談戀愛』唔係問題、
問題係『人類應否有兩份全職工作？』

你再拍拖，需要知會你老闆：
『老細，我出面搵0左份戀愛，我真係好需要呢份戀愛?，不過公司0野我會照做，我兼顧到。』
然後你老闆會話：
『咁你不如搵多份愛情，咪直情唔洗番呢分工囉

-------------------------------------------------------------------------------------------------------------------

05. 新鮮


依家D人溝女，對絛女最大0既要係乜呀?
唔係靚，最緊要，係夠新鮮!

乜0野叫做夠新鮮呀?
就係話、溝0左一年0個個，就唔夠溝0左半年0個個咁正。
因為半年0個個新相識，新鮮D。
同樣，溝0左半年0個個，就唔夠三個月咁正。
溝0左一個月就唔夠半個月0個個咁正。
溝0左一日就唔夠半日0左個正，如此類推，終於...
溝0左0個件，就唔夠未溝果件咁正！

咁即係點呢??
仲溝唔溝好呢?一溝就唔正?！

[ Last edited by sfxc0000 on 2005-10-26 at 06:55 PM ]

作者: qweqweqwe 時間: 2005-10-26 01:43 PM

06. 女人偉大


黃:係愛情之中,女人最偉大!

男人o既犧牲,就為o左追求美麗,
而女人o既犧牲,就只係得倒一個麻甩佬!
而最偉大既係佢地根本唔覺得係犧牲.

如果你話俾一個女人聽,喂,你男朋友有口臭!
張:車.人梗有局部缺點o既!

黃:佢仲有臭狐同香港腳喎!
張:咁佢咪好平均咯!

黃:佢鼻鼾聲好勁喎!
張:我男朋友一定係夢見我,我開心.

黃:佢屙尿亂o甘啡!
張:好壯呀!

黃:佢唔洗手喎!
張:邊有男人洗手o架!

黃:我有!
張:姆型!

黃:佢重講粗口呀!
張:但係佢心地好!

黃:佢係電梯度食煙喎!
張:公眾場合都唔俾食咯,佢咪呢埋一邊食囉,你地重想點呀!

------------------------------------------------------------------------------------------------------------

07. 責任何在


如果你話我聽,因為我唔靚仔,所以唔可以做戲,
你唔應該話我聽!
因為唔關我事,我唔應該負呢個責任,你應該同我父母講,
係佢地攪成我咁o既.
如果你要罰,應該罰佢地.
以後,邊個醜樣,就罰佢爸爸,媽媽唔準做戲!
或者剩係做茄哩啡!

我唔係一個唔負責任o既人,為我爸爸媽媽果短短一剎o既快感,
我已經負責負o左廿幾年.
你估做我好易做呀?

我細個讀書唔好,或者唔合格,我冇要父母負責.
我自己簽晒o的成績表o既,
每當我爸爸媽媽有爭執鬧交o既時候,
我有冇叫佢地為o左我o既童年著想,忍下對方?
冇!
我叫佢地出街鬧!

我大個O左,唔知應該信邊個宗教,唔知做人為嘜,唔知人生事業o既方向都冇要求父母照顧我

反而係我調番轉頭,提醒佢地:
你地要搵錢呀,積穀防飢呀,唔係第日老來無依無靠呀!

嘜野都係我!

-----------------------------------------------------------------------------------------------------------------

08. 男仔唔駛靚仔

靚仔係唔係真係o甘重要呀?
有o的人話男人唔駛靚仔o既,有才華o米得囉.

係,你有冇試過帶你o既才華去落disco識女仔呀?
人地o的靚仔一行入去,唔洗二十分鐘,就已經同的女仔互相問問題:
[你度定我度?]

我帶住我o既才華入到去,幾難先搵到個女仔肯比個機會我.
唔係比機會我交換問題,而係比機會我天才表演.

唱歌跳舞做話劇講大話功夫表演,成套歡樂今宵一個人做一次......

------------------------------------------------------------------------------------------------------------------

09. 演戲天份


我從小就知道,我係一個偉大既演員.

人地細個成班細路群埋,鐘意玩扮結婚,扮爸爸媽媽.
我細個,就鐘意扮姦夫淫婦.

但係唔知係o米我個樣比較老實,我係從來都無機會扮奸夫.
每次我都係扮淫婦......既老公.

雖然係o甘,雖然,我亦都係全班人之中最細個個.
但係我已經可以將一個妒忌o既男人心態表現得淋漓盡至.

當然,我的朋友個個都讚我,話我天生出黎,就係戴綠帽既.

--------------------------------------------------------------------------------------------------------------

10. 死亡


細個o個陣,我係唔怕死o既.

我覺得,係以前o的人先會死o既.
係歷史書裡面o既人至會死.
好多人唔明歷史有嘜用,歷史o米話你聽邊o的人死o左囉.

我從來未睇過一本歷史書有提到黃子華呢個名,我點會死呀.
最緊要係,就算死都唔係嘜o野一回事.

細個o個陣隔離陳師奶成日叫佢老公:
[咁多人去死你仲唔去死?]

然後去完番o黎,阿陳師奶又會話:
[死番o黎勒,唔死多陣添?]

所以我一路都認為,去死,即係去街,同埋一定唔會去好遠.
因為阿陳生每次都好快就返黎o既.

[ Last edited by qweqweqwe on 2005-10-26 at 01:52 PM ]

作者: qweqweqwe 時間: 2005-10-26 01:45 PM

11. 賭馬


喂,賭馬係需要付出好多o架.

朝早要睇晨操夜晚要睇董鏢,又要同朋友交換讀書報告.

你估我地睇得書少?市面幾多馬經呀?

仲唔係話你睇得多就得o架o咼!

香港D馬經,一埸十隻馬,十隻馬都有人貼,你自己思想唔夠獨立,
o甘你就死梗o勒
:唔該,呢場每隻幫我落100蚊o丫!希望中o勒!

夏天o黎o勒,抖暑o勒,你估係比D馬休息咩?係比我地休息呀!

--------------------------------------------------------------------------------------------------

12. 泳池


黃﹕去公眾泳o個D唔係叫做游水,o個D叫做浸水.
因為係公眾泳池游水,只可以用一種泳式,就係彈式,同一個位,彈下彈下.
張﹕如果係高手可以用式,但係要潛落水底o個度用.

黃﹕點解D泳池有咁多人?
張﹕唔好問呀,趁人多你好快浸下.等陣所有人上晒水個陣,你就會發覺,個池的水原來到膝頭哥o架o乍!

黃﹕其實我地香港人都習慣o左人多,去浸 o下水都好.但係可惜o既係,呢D水,唔係一般水,呢D係暖水.
張﹕o下,o係度屙尿,o甘冇公德心!

由細到大我爸爸媽媽都教我,急尿,去隔離池丫嘛!

黃﹕所以我係度,趁呢個機會,同你D靚仔講呀!!游游o下小童走o黎大人池,擒係個池邊,唔好話我聽係學游水呀!

張﹕特別係擒正係噴水口個D呀!

想毀屍滅跡呀!

----------------------------------------------------------------------------------------------------------------

13. 改名


改名,只係o的父母係將自己o既主觀意願套係o的仔女身上.

所以大部份女仔唔係叫美嘜就係麗嘜.

男仔唔係叫阿堅,就係阿強,一唔係就叫阿祥.

o甘我地係o米好美麗,好堅好強好長呢?

-----------------------------------------------------------------------------------------------------------------

14. 黑白不明


我非常欣賞鄧小平o既「黑貓白貓,捉到老鼠就是好貓.」

我老友阿雄個老婆生仔,生左個黑人出o黎,我都係o甘對佢講:

「黑仔,白仔,快高長大就係你個仔啦!」

--------------------------------------------------------------------------------------------------------------------

15. 鬧人


以前我地笑人,會話:
“你有得發達?太陽由西邊出o黎呀!”

依家我地就會話:
“你有得發達?建築面積等如實用面積呀!”

又或者話人醜,現在我地都會技巧好多:
“你唔醜,你點算醜呀,你係塊面唔多實用o甘解o麻.
你o既鼻台太大,o的眼耳口鼻o米唔見洗o羅。”

----------------------------------------------------------------------------------------------------

16. 失戀


失戀係會令人成長o既.
我失戀之前,一向都覺得世界上所有問題都有答案.

點解我地每日都要8點鐘起身返工呀?
因為夠鐘o羅!

點解我地有夠鐘呢樣o野呀?
因為我地唔用浮動上班時間o羅.

點解呢個世界有戰爭?
因為我地有武器羅.

o甘點解我地要有武器呀?
因為佢地有武器o羅.

一切都有答案,直到我失戀.

阿珍,點解你唔愛我?
阿珍比o左一個經典既答覆我,佢話:
“愛情係冇點解o架,係唔可以解釋o架,唔好問啦.”(記緊這句啦)

如果番學阿sir問我o野都可以o甘答就好o勒!

“黃子華,物体燃燒點解需要氧氣呀?”
“阿sir,係冇點解o架,係唔可以解釋o架,唔好問我啦!”

[ Last edited by qweqweqwe on 2005-10-26 at 01:54 PM ]

作者: qweqweqwe 時間: 2005-10-26 01:47 PM

17. 隆胸


葉子微簡直為演藝界創下新標準.

以後的女仔想做明星,又唔洗睇樣,又唔洗睇演技,去磅啦!!!(加強語氣) 得入去磅一磅就得o勒.

[開黎六斤半,片酬係六千五蚊一日,小姐做唔做?]

[開黎八斤有疤痕,八千減一千疤痕費,即係7千蚊一日.]

你話幾客觀呢!　

-----------------------------------------------------------------------------------------------------------------

18. 愛滋論


為何無人提及大陸收番香港呢?

其實即是有愛滋一樣,
你係唔係走去驗先,
我驗o左你係唔係可以醫番好我先,

唔係o架o麻,我咪唔去驗o羅,
咪當自己無o羅,如果有就等發出來咪死o羅,係咪先?(高半聲!)

同樣大陸要收番香港這問題都係o架o麻,
係唔係講下佢會唔收先,
係唔係我帶安全套佢唔收,
我見客又帶,連食飯都帶3個,
唔係啦!!(低半語)

大家來做個大o架粒住香港!!
唔係架o麻,你講唔講,
佢要收就收架啦!!

--------------------------------------------------------------------------------------------------------------

19. 一家和一國兩制


世界上有乜羞恥得過親娘接返個親生仔o番o黎,然後同個仔講:
“阿仔你放心,我地一家兩制架,果個係你大佬!!”

“仆街,人地叫你呀!” (同大佬講及打大佬o既頭)

“sorry...sorry...有冇嚇親你呀,唔會發生係你身上,
我地一家兩制家麻,五十年不變!!!”

你知唔知道一國兩制最偉大既地方係乜呀,
一國兩制最偉大o既地方就係佢地都肯認佢地自己個制真是嚇親人呀!

---------------------------------------------------------------------------------------------------------------

20. 放假


黃:一般人都會好珍惜每年一度o既年假!

張:今年我要去夏威夷游o下水.

黃:如果你決定去夏威夷,你就要預忖出沉重代價!前四後六!

張:我講緊係年假,唔係產假呀,子華!(真係呀....)

黃:前四後六既意思係,係你放假之前個四個禮拜,同你放假之後六個禮拜, 都要做到仆街!(死未)因為無論你放幾耐假,你o既o野始終係你做番.

張:係你既始終係你o既!

黃:唔單止,放完假,唔係你既都會變成係你o既!

--------------------------------------------------------------------------------------------------------------

21. 金撈


點解要帶金撈??
唔帶勞,有乜資格同人講,時間係寶貴?
我既時間點值錢呀?(你話係唔係先)

o拿,支時針圍住行一個圈,12個鐘,十幾皮o野,即係為皮幾o野一個鐘。
你一個鐘值幾錢o丫?
幾舊水?
我點同你一齊食飯呀,大家時間觀念o甘唔同!

唔單止o甘,你帶撈,表示你個人有幽默感.

勞力士,有邊個靠勞力搵食o既人帶得起勞力士o丫?
越帶勞力士o既人就越表示佢唔洗用勞力!
呢D,就叫做幽默感o勒.

--------------------------------------------------------------------------------------------------------------

22. 女愛情觀


吳﹕女仔對愛同鐘意有很大既分別,如果個女仔知道個男仔鐘意佢呢, 她都會同佢去o下街, 睇o下戲, 食o下飯, 但想做進一步既野就唔得o勒.

而女仔知道個男仔愛她時係絕對可以付出更多.
在女仔心目中, 鐘意等於"幫襯", 鋪鋪清唔好找我更多好處。

但愛在女仔心中等於"收購",
收購包括"注資",以後"合併"......(係呀...係呀!)

所以女仔要男仔把佢o既愛注資落o黎, 把護口注資落o黎, 最重要o既係把錢資落o黎.
然後去買 Joyce啦,Panda 啦,Gueeo啦,買到一身都o係, 等佢認為可拱固佢自己既價值,但佢地是絕對無得倒男方o既同意架!!

o拿!!我宜家同你地講呀,你地o既黑箱作業,很容易破壞男方o既經濟o架!!!(你們都很有共鳴o拿)

----------------------------------------------------------------------------------------------------------------

23. 男愛情觀


吳:男仔對愛就很隨便,愛同鐘意都無分別,
只要佢知道妳鐘意佢,立即可帶妳番屋企,或去妳屋企,

係唔係男仔心中無愛呢?我覺得又唔係o可.
係佢地比其他人更清楚愛o既定義,

愛係乜呢?跟耶蘇既講法係:
“愛係恆久忍耐又有恩賜
愛係不張狂,不大喚,不作害羞的事
忘記別人的錯.”

你話o勒作為小小男人o既我地怎可隨隨便便同你講聲愛呀!!

所以以後有人同你講愛,一就是他講大話(加強語氣),二就是有個耶蘇係你面前呀.

但耶穌主張愛人如己,博愛o架!!

[ Last edited by qweqweqwe on 2005-10-26 at 01:56 PM ]

作者: qweqweqwe 時間: 2005-10-26 01:49 PM

24. 自重


當乜o野人都唔搵我做o野,
我就知道,我係一個偉大o既藝術家,

在生o既時候係唔會獲得應得o既尊重.

唔止o甘,我仲偉大過偉大o既藝術家,因為我知道,
我死後都不會受到尊重.

-----------------------------------------------------------------------------------------

25. 紅館


依家做歌星,好犀利,因為有紅磡体育館.
因為呢樣o野,做歌星,可以o係一晚.
就賺晒你o地朝九晚五一世人都搵唔到o既錢啦!!

o的人話,我真係唔明張國榮點解要退休,(點解?)
佢一晚已經搵o左你一世搵o既野,
佢一晚已經做天你一世人要做既野,
仲有乜野可以做呀??
唔退休做乜?
做五場,已經輪迴五次!
做三十場,輪迴三十次,如來佛祖都話:洗唔洗???

的人話, 唔係既, 佢唔拾得退休既!佢最後個場演唱會,佢自己都o咸o架.
佢係o咸,不過唔係為自己o咸,o係為o左你o地o咸呀:
“我就退休勒,我聽日就唔洗DO勒,.你地聽日仲要番九點,唔好遲到呀!!”

-----------------------------------------------------------------------------------------------------------

26. 迷惘


o係公司,老闆會同我講:
“你番o黎唔係訓就o係去廁所,你當呢度係屋企呀,呢度係公司呀.”
我番到屋企,阿媽又會話:
“你仲當呢到係你屋企咩,你番o黎唔係霸住個廁所就剩係識訓!”

o甘...o甘我番屋企又唔訓覺又唔去廁所,番公司又唔去廁所唔訓,o甘我呢o的o野去邊到做呀?

不過後o黎我諗過自己又係過份的o既, 於是我就痛改前非.
以後番屋企我就剩係訓覺,番公司就剩係去廁所.

-------------------------------------------------------------------------------------------------------------

27. 居安思危


董建華講o左多o野。
知唔知最o岩係邊句？大家知唔知呀.

最o岩就係﹕
“我地要居安思危,居安地思想危難既時刻.”
呢句野好得意架呵,居安就思危,o甘你居危時思乜呢?
你更係更加思危架啦,o甘樣居安果時要思危,居危時又思危,
安黎做乜鬼o野呀!!?(係o米先)

我地居安就係唔想思危o架o麻,我地宜家居安都要思危,

董建華就話o左比你地各位聽﹕
“你地安極有限啦老友!!”

-----------------------------------------------------------------------------------------------------------

28. 老豆


我一向以為老豆,係option黎o既,附加o架o乍.

無錯,大部份人係有老豆既,
就正等如大部份既車係有收音機一樣.
但係個樣係option黎之o麻,唔係架架車都有.

所以我細個o個陣好憎o的o靚仔成日係我面前話:
“我老豆點點點.......”

我覺得o個o的人好晒命,就好似你有部車, 不停o甘同人講:
“我部車開蓬架,大包圍o架!”

你不如話﹕
“你老豆開蓬o架,用無鉛汽油o架.....”

---------------------------------------------------------------------------------------------------------------

29. 十八歲


點解十八歲先至係合法年齡呢?
因為到o左十八歲,係法律上我地就要對自己負責任

多餘,唔通十八歲之前,我地就唔洗對自己負責o羊?
唔通十八歲之前,我就可以隨時撲出馬路:
“我唔信呀,我17歲半o乍,你敢撞死我?”

唔通十八歲之, 前我o係油麻地踩完個紋身佬一腳, 個紋身佬會話﹕
“死o靚仔,你未夠十八歲,我忍你!”

唉, 十八歲既最大好處, 就係你到o左一個合法既做愛年齡.

我想請問,有邊個做愛係因為合法先做o架.
我以為大部份人做愛係為o左快感同高潮?

抑或你想話我聽,十八歲之前做愛係冇高潮o既.
十八歲之前做愛係白做既!

o甘樣十八歲就具有特別意義o勒!

------------------------------------------------------------------------------------------------------

30. 中國古仔


每個番去大陸一定有起碼十個故事講番出o黎。

歌仔都有得唱, 一首歌總括番大陸既經驗﹕
“十個古仔, 九個係曳, 淋漓盡致, 嚇壞腸胃,

公安綁架, 霸肚生仔, 番到大陸, 實會心悸,

啊亂個鬼, 賤個鬼, 死俾你睇, 法律隨時倒轉夾硬o黎,

人人自動自覺甘心做蟻,因為馬克思你無曬問題,

因為馬克思你無曬問題!”

-------------------------------------------------------------------------------------------------------

31. 拜年


呢幾年,拜年既賀詞之中,最流行係邊句?
祝你------不勞而獲.(唔係o卦?)

恭喜人地發財當然好, 但係發財, 都要有方法.
有邊一個方法,好得過不勞而獲?(係o米)

不勞而獲o既方法就係唔洗方法, 唔洗方法就係最好o既方法.
我地想發財, 已經想到到o左一個禪o既景界!

不勞而獲既然可以成為新年賀詞,我期待係未來幾年,
我地話人蛇鼠一窩,即係讚佢合群,話人非奸即盜,即係話佢勇敢!

o華,真羨慕你呢個家庭,真係蛇鼠一窩非奸盜.
梗係,唔係我地點會陷家富貴!

32. 兒童教育


我一向都認為, 我地成日o厄o的細佬仔, 懶係nice o甘對佢地, 講到呢個世界乜o野都好好o甘,o甘係唔o岩o既,(何解?)

細個我同媽媽搭飛機,睇見廁所既水係藍色,我未見過, 咪走去問媽媽o個o的係乜?

媽媽話﹕“係天空。”
所以我就成為世界上第一個食迥天空o既人.

細個的大人成日講童話講白雪公主.(你都聽過啦.!)
佢地講既就係白雪公主又靚又好人,好值得去追求.

但係冇講到我地唔係白馬王子!
邊個人至係白馬王子呀?

起碼有隻白馬啦.
o甘就即係馬主啦,你係唔係呀?

講o的唔講o的好危險o架.
即係等如你同個細路仔講﹕
“小明呀, 飛出窗口好過引o既, 成個香港望晒o架,浮下浮下.....”

但係唔同佢講﹕
“不過你落到下個陣,會快過搭電梯好多!”
---------------------------------------------------------------------------------------------------------

33. 用家炒家


好多人結婚,最初就以為自己係婚姻o既用家.

後來先發覺自己係感情o既炒家,於是想離婚.

但係離婚又要攪幾年,睇住周街都係新盤靚盤,

自己個盤又放唔出,幾難受!

[ Last edited by qweqweqwe on 2005-10-26 at 01:58 PM ]

作者: qweqweqwe 時間: 2005-10-26 01:50 PM

DONE!!!!

:cool:

[ Last edited by qweqweqwe on 2005-10-26 at 01:58 PM ]

作者: sfxc0000 時間: 2005-10-26 06:55 PM

繼周星星之後又有黃子華集

加左o係 #5 度... =.="

作者: coolyiceman 時間: 2005-10-27 12:45 AM

very good share~~~
thx alot

作者: kimoche 時間: 2005-10-27 01:03 AM

thank you ^^

作者: ravemother 時間: 2005-10-27 03:44 AM

very well done!! thx

作者: therocking 時間: 2005-10-28 12:27 PM

多謝分亨!!

作者: 烈風拳霸 時間: 2005-10-28 04:43 PM

正野,謝謝

作者: luisy 時間: 2005-10-29 11:20 AM

good job

作者: ａr琳.. 時間: 2005-10-29 11:59 AM

正呀**

歡迎光臨娛樂滿紛 26FUN (http://26fun.com/bbs7/)