joseph1234

其實我覺得愛情有d似宗教，都係人既精神主宰。有時甚至唔需要對象，喜歡一個人，o個種感覺已經好幸福。

戀愛既時候，如果一切條件都係positive既話，個人會開心好多，做野都會醒神d，戀愛中既人都會特別靚。

拍拖係兩個人心靈交流。無論開心唔開心，都有個親密既人可以同自己分享。當然，你可以擁有好理想既事業﹑擁有一切，但講到底，少個人同自己分享o個份喜悅，係好似缺失左d好重要既野咁。

我覺得，拍拖最大既意義，係你o係愛裡面，唔係單單為自己而活。你多左一份考慮，你既存在，都係為另一個人存在，於是，自己人生又有更深一層意義，生活會更加積極。我諗，呢個係拍拖最大好處。

當然，人總會有單身既時候。單身當然一樣有單身好處。一段關係冇可能所有stage都完美，一定會有爭吵同互相傷害既時候，呢d情況可以好醜惡，都可以好傷人心。單身就可以避開呢d情況發生。

單身亦都唔使再長期忍受某個人既缺點。伴侶幾好，都硬係會做左d野，自己睇唔順眼，單身貴族就唔使啞忍。

當然個人會空虛少少，不過亦都自由好多，少左好多交代。去邊﹑同邊個去﹑去做乜野，都唔使下下同人交代。拍拖o個陣可能要避忌，不過自由身就可以識返多d異性朋友。

冇拖拍，多左時間留俾自己。唔需要星期三六日奉旨陪情人﹑唔需要晚晚抽時間出黎o係電話度講廢話，可以做多d自己野，陪多d屋企人﹑朋友。

其實所有野都可以好美好，睇下自己選擇點去睇而已。