54歲杜德偉一索得男：估唔到我咁勁，光宗耀祖，要生夠半打
有心有力 
【東方日報專訊】恭喜鵰神得米！杜德偉昨日驚喜宣布太太有喜，還自爆與太太Ice用了十多支驗孕棒瘋狂測試，以確認有喜。雖然年屆54，但他仍然有心有力，一索得男：「都估唔到我咁勁，真係光宗耀祖！」更豪言要生夠半打！
現年54歲的歌手杜德偉（Alex）無論在港、台兩地開騷都例必邊唱邊剝剩條閃底晒天賦「巨鵰」，被封為「鵰神」的他今次後繼有人！2012年跟年輕24歲的太太李曉冰（Ice）結婚的Alex，昨日在社交網上載兩人相擁的照片，驚喜宣布太太有喜：「人生的確是充滿神奇和驚喜，我一直都以為我這一輩子只會愛我老婆一個，但現在看來我要一心二用了！」可謂人如其綽號「杜德米」一樣「德偉，得米！」，榮升人父的Alex昨日接受本報電話訪問時自爆今次一索得男，透露太太已懷孕五個月，預產期為10月份。全程訪問中難掩興奮的他坦言，兩人結婚初期沒有想過生小孩，因經濟不好及世界很亂等各種理由，選擇只過二人世界。
照去旅行 全程做阿四
直至去年中，Alex在朋友的鼓勵下開始嘗試造人計劃，但一直都沒有聲氣，其後採用家庭醫生建議的排卵期方法，結果一個月便中獎！他笑言市面有太多種類的驗孕棒，兩人抱着懷疑心態，用了十多支驗孕棒瘋狂檢查，以確認有喜。雖然Alex年屆54歲，仍然有心有力，更忍不住笑說：「都估唔到我咁勁、咁叻仔！係仔嚟o架，真係光宗耀祖！」
Alex又透露早前因太太懷孕未夠三個月而要守口如瓶，為免穿煲更瞞着太太家人，照原定計劃於2月初舉家飛到韓國旅行。當時Ice已懷孕兩個月，Alex知道老婆「身負重任」而愛護有加，除了做「苦力」拿着四大袋戰利品，還在街上肉緊地攬錫老婆，最後趁着Alex於2月10日54歲生日時向外父、外母宣布有喜，雙喜臨門！兩星期前，他又帶已見肚的太太到馬爾代夫旅行，「一家三口」享受陽光與海灘。談到首次做爸爸，Alex坦言這個年紀最適合，無論在各方面都好健康、很有精力，而且心態又成熟：「可以做一個好榜樣，雖然冇呢方面嘅經驗，最初都懷疑自己係咪一個好爸爸，但係唔使諗咁多啦！」
望四年抱三 生夠半打
至於準媽媽Ice亦有接受訪問，她透露近日開始感覺到胎動：「BB好似條金魚仔咁喺度游吓游吓，Alex都會放隻手喺肚上面，佢都Feel到。（依家佗BB有冇唔舒服？）冇喎！佢好文靜又唔係好曳，有時我會唔記得咗有BB，一切好正常！我依家都肥咗20磅，醫生都叫我唔好食咁多。」Ice又覺得BB應該像兩人一樣眼細細，問到可有打算追多個女兒湊個「好」字？兩人笑言生一個唔夠喉，希望四年抱三，目標更要生夠六個！ |
發表於 2016-5-22 08:49 AM
| 
