半山日本鬼街[+左]

半山日本鬼街

   如果你係鍾意聽鬼故o既，一定聽過有關日本鬼軍隊現身嚇人o既傳聞。其中最耳熟能詳o既都算係九龍灣聖若瑟中學山邊鬼軍隊步操同摩星嶺日本鬼軍隊堅守基地o既故事。不過其實上環半山一帶都曾經傳有日本鬼軍隊巡街，而且仲搞到人心惶惶。

   阿玲o岩o岩同屋企人搬o左去上環半山住，附近係堅道同好出名o既「樓梯街」。由於附近仍然有好多舊樓，所以呢度好有五、六十年代舊香港o既感覺。阿玲o係度住o左冇幾耐，就覺得呢度有o的古怪。

   中學會堂傳出步操聲

   大約搬入o黎一個禮拜左右，阿玲同朋友唱完K就返屋企。望一望手錶，時間已經大約係凌晨一點鐘，週圍已經好靜。突然間阿玲聽到附近有一陣陣跑步聲。

「咁夜都仲有人o係學校練跑？」阿玲心裡疑惑。

「阿叔！邊間學校咁夜都仲有人練跑o既？」返到大廈入面，阿玲心血來潮多口問o左個看更一句。

「練跑？唔係呀！你唔好理咁多啦！快o的返去睡覺啦！」看更伯突然間好凝重咁同阿玲講。

「佢o地咁嘈！嘈住睡唔到o架喎！」阿玲講。

「妳咪咁多事啦！o個o的唔係人o黎o架！你當聽唔到算啦！」看更伯講完就即刻趕阿玲入Lift。阿玲以為看更怕麻煩，亂講嚇佢，所以冇擺o係心度。

   阿玲呢晚真係成晚都俾o個o的跑步聲嘈到睡唔到，所以第二日佢的起心肝去學校投訴，希望學校唔好俾o的學生咁夜練習。

「唔好意思呀！你o地可唔可以夜晚唔好再練跑呀！嘈住人睡o架！」阿玲搵到學校其中一個主任投訴。

「我o地學校而家放緊假，冇學生返o黎o架喎！冇理由會嘈到你o架！況且咁夜，就算有咩暑期活動都完o左啦！」主任話。

「但係尋晚佢o地嘈足成晚喎！你仲話冇！」阿玲同主任據理力爭。

「我可以幫你查o下，但係一定唔係我o地o的學生。」老師講。

   阿玲於是再走去問大廈o既看更，問o左佢好多次，佢終於都講事實俾阿玲知。原來呢度曾經俾一班日本軍鬼搞到滿城風雨。最經常o既係好多居民都會好似阿玲咁聽到中學會堂裡面傳出步操聲，有時仲會傳出一陣陣嗚嗚低泣聲，更恐怖o既係有o的夜歸o既居民會見到會堂入面有一排黑影o係度步操。傳聞話呢批原來係大戰時日本宣佈無條件投降後，因為寧死不屈，於是集體o係軍營內自殺o既軍人。

  「另外一次，有個大排檔東主好似平日咁o係凌晨四點返去大排檔，突然見到伙計大叫向住檔口奔跑o黎。檔主當時見到地上有一群黑影向大排檔方向移動，地o下仲隆隆作響。跟住批黑影繼續衝入大排檔地下，然後消失無蹤，嚇到兩人呆o左坐o係地下。」看更講到繪形繪聲。

「仲有一次仲恐怖。幾晚之後，一間士多o係閂門後成班人打麻雀。突然又聽到o個o的步操聲，而且越o黎越近，跟住又聽到o的日語對話聲，o個班人仲拍士多o既鐵閘，拍到拍拍聲。當時裡面o既人全部嚇到死o下死o下，唔敢出去。過o左冇耐，士多老闆膽粗粗望一望店外，點知見到成條街都掛滿日本國旗。呢件事好多人都知！」

   但係據看更講，自從1961年請人返o黎做過法事之後，好耐都冇聽過有人見過呢班日本鬼。可能阿玲同呢班鬼特別有緣，或者係前世死o係佢o地手上，所以先再見到。

   看更講完之後，阿玲就第一時間返屋企，呢晚佢完全唔敢留低，跟住仲係咁叫屋企人搬屋。阿玲搬屋之後，的確再冇聽到夜晚有步操聲，但係以後只要聽到有人跑步，佢都會以為又撞鬼，當然更加唔敢o係夜晚再經過任何學校

[ Last edited by 左輪仔 on 2005-7-24 at 04:58 PM ]

收藏分享讚好

愛情就像離境大堂，可喜可悲，帶你到另一個世界......

回復引用

訂閱 TOP

返回列表回復發帖

＜＜新主題 | 舊主題＞＞

娛樂滿紛 26FUN» 吹水版 » 【空間靈幻異次元】 » 半山日本鬼街[+左]

重要聲明：26fun.com為一個討論區服務網站。本網站是以即時上載留言的方式運作，26fun.com對所有留言的真實性、完整性及立場等，不負任何法律責任。而一切留言之言論只代表留言者個人意見，並非本網站之立場，用戶不應信賴內容，並應自行判斷內容之真實性。於有關情形下，用戶應尋求專業意見(如涉及醫療、法律或投資等問題)。由於本討論區受到「即時上載留言」運作方式所規限，故不能完全監察所有留言，若讀者發現有留言出現問題，請聯絡我們。26fun.com有權刪除任何留言及拒絕任何人士上載留言，同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論，敬請自律。本網站保留一切法律權利。