chenfeng

最深刻，因為剛剛發生左冇耐……

小弟自小學以來，一直都冇拍過拖 (除左 o係中七時為左要實現自己「18歲前一定要飛一條女」此變態生日願望，所以求其 o係ICQ 識左個女仔拍左兩個星期散拖之外)，之但係暗戀就成日都有……講到最深刻，係剛剛呢一次，個對象係我隔離系 (勉強計算係半個同班同學) o既一個女仔，其實我year 1 時已經識佢，只不過當時同佢唔熟，再加上我見過佢同過我兄弟 o既friend一齊拖住手 o係校內出現，所以一直都冇留意佢

上年十二月左右，我留 o係學校教緊我個兄弟點用一個statistics 軟件以應付考試時，咁橋佢 (即係後來我鍾意 o既女仔) 同佢個friend 都 o係度，而佢地又唔係太識用，所以我就順手教埋佢地點用，由夜晚六點半教到九點半，最後我就陪埋佢搭火車走。佢當晚就send 左個sms 俾我多謝我教佢 o野，之後我都send 番俾佢叫佢考試要加油。當時臨近考試，就咁樣，我地開始左以SMS 互相打氣、互相問候、互相講笑；聖誕節 o個晚，佢有send message 祝我聖誕快樂；我臨上上海杭州去學術交流團時都同佢傾左第一個電話，上到去仲記得買左手信送俾佢……我覺得我同佢開始越來越夾、越來越多話題，我亦好鍾意佢 o既思想成熟、細心、鍾意照顧同幫朋友，有時仲幾玩得下，竟然開始覺得佢靚添……可惜，我以為佢仲有男朋友，所以繼續扮冇事。

番來之後，我同佢繼續sms、電話、ICQ，而每次電話都越傾越長，越來越多講笑位。後來有一晚，我臨訓時send sms 俾佢，佢reply 話心情唔好同手機冇電，所以上左網打機洩忿，我馬上上網ICQ 陪佢，安慰佢令佢笑番，最後佢話「最好你而家親身陪我啦」，我答「我都想」，而家佢竟然問我係唔係鍾意左佢……傻仔天真的我，當然認左，同時亦知道左佢原來一早同佢男朋友美散左…佢reply 時答唔想hurt 我，話想要少少時間考慮一下咁喎。我心諗，你叫我俾時間你，唔代表我唔可以做 o野感動你丫，所以我就發動攻勢 (之前 o係其他post 提過，唔多講)，一心以為自己可以得米時……

佢開始疏遠小弟、SMS 越回越少、電話越傾越快收線、ICQ佢就成日都話唔得閒 (後來仲開始唔reply message)，就連有時見到面時，佢都寧願轉頭同自己d friend 講 o野，而唔同我好似以前咁吹水…我又蠢 o既，竟然走去e-mail 問到底發生乜事，佢就話好怕1 日1 電話/sms/ 見面……仲話自己好鍾意獨立、好想要個人空間，上次同男朋友散都係因為呢個問題……我聽完後，仲竟然傻到繼續發動攻勢，最終，o係雙方關係日漸變淡下，我逼到佢reject 我，我記得當晚佢拒絕我時，我，少有地，竟然喊得好厲害，第二日仲發埋燒，學都番唔到……拒絕我之後，我仲繼續死纏，希望佢會回心轉意，最後，尋晚俾佢鬧我一路都俾左好大壓力佢、仲話我唔識自愛，未識珍惜自己，根本未有資格去珍惜、關心、愛其他人……

我雖然仲鍾意佢，但無奈地，我亦惟有同時疏遠番佢，放棄、做番「一對無所不談的好朋友」

唉，太近期，太深刻啦……

toro

Originally posted by chenfeng at 2005-5-1 04:21 AM:
最深刻，因為剛剛發生左冇耐……

小弟 ...

我唔覺得你太錯，係！你係可能心急左d，但係其實你哋本身性格上係有好唔夾嘅地方，做番朋友未必唔係好事，開心d啦！你終有一日會搵到一個識欣賞你嘅人！你自怨自艾好難有女仔中意你ga，振作呀

good and detail reply +5

chenfeng

多謝toro 指點及鼓勵
小弟定必早日振作