碟仙纏身[+左]

kaixinren

好多年青人都玩過碟仙，尤其係當一班人去露營時就總會有人提起要玩。不這碟仙其實係一種表面易玩、實際危險o既通靈活動，好多意外都係因為玩碟仙而引起o既。

     鯊魚、馬仔同阿力三個女仔趁住連續幾日公眾假期，約埋一齊去西貢露營。佢o地三個一早就約o左o係彩虹集合，去到沙灘已經差唔多一點。放低晒所有行李之後，佢o地就即刻去游水。到o左差唔多六、七點，終於都坐定定搭爐燒o野食。不過漫漫長夜就咁齋傾偈實在太悶，所以鯊魚就建議玩碟仙。馬仔第一時間走去隔籬營地問人借o左一隻細紙碟，而鯊魚就去搵o左一張報紙o黎做底紙，馬仔就走去士多買o左幾枝洋燭出o黎點著，話增加氣氛。

「碟仙碟仙，請你出o黎！」馬仔第一個開口請碟仙出o黎。

「碟仙碟仙，請問你係男人定女人？」阿力問。

馬仔一問完，過o左一陣，報紙上面o既紙碟就慢慢打住轉咁去到紙上面o既「男」字。

「碟仙碟仙，你係男人o黎o架？你今年幾多歲呀？」鯊魚問。

「156歲。」碟仙答。

「碟仙碟仙，我想問個問題呀！你知唔知我叫乜名呀？」馬仔問。

紙碟突然好快咁移o左去個「雅」字，停o左兩秒度，再移o左去個「君」字。

「雅君？」馬仔見碟仙答錯佢個名，索性比多次機會佢。「碟仙碟仙我唔係叫雅君呀！你答多次啦！」

「雅君！我好掛住你！」碟仙答。

「雅君係邊個o黎o架？你女朋友呀？」阿力問。

「是。」碟仙答。

「乜佢好似你女朋友咩？」鯊魚指住馬仔問。

「你係我女朋友！雅君！我好掛住你！」碟仙不斷徘徊o係呢幾個字附近，仲越轉越快，令到本來一心諗住貪玩o既三個人越o黎越驚。尤其係比碟仙以為係女朋友o既馬仔更加嚇到成個人震晒，於是拿拿聲請隻鬼返去。

「碟仙碟仙多謝你呀！我o地問完喇！請你返去啦！」阿力不斷講。

最初隻碟係咁o係度轉唔肯歸位，直到馬仔同鯊魚都一齊狂叫「碟仙碟仙多謝你呀！我o地問完喇！請你返去啦！」呢句說話成幾十次，隻碟先肯慢慢返入中間個圓形內。當見到隻碟完全入晒個圈裡面時，三個人都不其然當隻紙碟係舊燒紅o左o既鐵咁即刻縮手，然後你望我眼，冇人敢出聲。

「佢返o左入去就得o架喇呵？」馬仔終於忍唔住問。

「肯返入去即係冇事啦！好多人都咁講o架！放心啦！」阿力安慰馬仔。

「係呀！冇事o架喇！我o地連碟同紙都燒埋仲邊會有事丫！唔好亂諗o野啦！」鯊魚一邊燒o的o野一路講。

「冇事o既！不如一齊去搵隔籬Site o的人玩啦！」講完之後阿力就拉o左鯊魚同馬仔跑過去隔籬o係咁玩到天光。朝早佢o地三個睡到十點零鐘就執o野走人，返到屋企就當乜事都冇發生過。

不過馬仔自從去完Camp之後，就每晚都發住同一個夢，個夢仲持續o左成年。夢中佢見到自己同一個年輕男仔坐o係一部車入面，坐坐o下兩個人就開始鬧交。後o黎個男仔突然推o左個女仔出車，個女仔就比後上o既汽車撞死o左。不過個男仔都冇好結果，因為佢推完個女仔出車之後，佢自己架車都跌o左落山，當然死埋啦！

不斷發呢個夢，令到馬仔好煩，所以佢決定講俾阿媽知。佢阿媽聽到之後覺得事有蹺蹊，於是走去搵o左一個阿姑問o下馬仔係咪撞鬼。

「知唔知你個女係咪玩過碟仙呀？」 馬仔阿媽講完之後，阿姑就問佢。

「我個女唔玩呢o的o野o架！」馬仔阿媽答。

「你個女應該有玩過碟仙，佢仲惹o左隻男鬼埋身呀！」 馬仔阿媽根本唔知馬仔玩過碟仙，於是即刻打電話問馬仔。

「你有冇玩過碟仙呀？」 馬仔阿媽問馬仔。

「無呀！」原來馬仔已經唔記得一年前去露營時曾經玩過碟仙，後o黎諗諗o下先記得呢件事。

「你個女玩碟仙時咁o岩請到佢前世個男朋友上o黎！個男仔見返佢之後話好掛住佢，好想再續前緣呀！」聽完之後嚇到馬仔阿媽死。

「你返去叫你個女寫一封信同個男仔講清楚。信裡面要講俾佢知你個女已經投o左胎，唔再係以前o既雅君，請o個個男仔死心。仲要提醒佢唔好再搵你。」

之後馬仔真係寫信俾佢，跟住就燒埋俾o個個男仔。從此馬仔就再冇發惡夢。但係佢就發誓以後都唔會再玩碟仙。

（完）

玩碟仙自保法：

玩碟仙時，隻碟係由中間開始。切記一定要請碟仙歸回中間原來位置，若果碟仙硬係唔肯歸位，只有一個方法對付，就係每次玩時都要有一個處男或者係學過道術o既人一齊參加。當有事時就叫佢立刻咬破另一隻手o既中指指頭， 以中指帶鮮血按下碟上。據說咁樣做嚴重o既會令「碟仙」魂飛魄散，不過至低限度都可以逼碟仙返去。

「碟仙」真相

＊台灣有傳聞話碟仙係由台灣一位道行高深而立心不良o既老和尚施法召來狐魂野鬼，並將佢o地囚禁o係碟子入面。之後就大事宣揚碟仙可測未來，引誘人不停地去玩，然後由o個o的受制於佢o既孤魂野鬼暗中吸取人o既精、氣、神，供老和尚修練一種奇異歹毒o既獨門法術。

＊另外一種講法附會於日本「稻荷神社」傳說，因為o係日本家喻戶曉o既「稻荷神社」，所供奉o既就係中國o既「狐仙」，而呢o的「碟仙」所召o黎o既正係「狐仙」。o係日本o既一o的家庭中，都有供奉「狐仙」o既習俗，通常係以上好o既梧桐木，搭建一間玩具屋仔，每日奉獻清茶、鮮花o黎祭拜供養。另外o係日本有一種糯米製o既麻糬，亦稱為「稻荷」，據說係「狐仙」最鍾意食o既o野。而聽講有o的家庭每日清晨打掃時，都會發現一o的白色狐狸毛，真是邪門！

[ Last edited by 左輪仔 on 2005-7-9 at 05:50 PM ]

bengrace50

Originally posted by kaixinren at 2005-7-8 16:01:
好多年青人都玩過碟仙，尤其係當一班...

妖言惑眾！ 教人玩邪靈，害人害己！ 仲以為用d咁方法可以無事，不過有打到人地魂飛魄散的心已經是壞人先！  天點會幫你。

地球人一個

唔係講笑，好想ｏ係ｅ度同大家講，
真係千祈，千祈，千祈，唔好玩碟仙，
十個有九個都因為玩碟仙而比鬼纏身,
ｅ樣野真係唔好店

kaixinren

Originally posted by bengrace50 at 2005-7-8 07:11 PM:



妖言惑眾！ 教人玩邪靈，害人害己！ 仲以為用d咁方法可以無事，不過有打到人地魂飛魄散的心已經是壞人先！  天點會幫你。

妖言惑眾？教人玩邪靈，害人害己！
你講我啊？我都系post個故事上來同大傢分享下，用反面教材教下大傢唔好乱玩，要唔要講到甘重啊！我在這個版都見得你多啦，其他人一講什么你覺得唔好，就話人妖言惑眾，上次就系××魔言。有意見就好好講！還彿教徒？！一點平心靜氣都無，我睇系你學佛都系學在嘴上，心里得錑氣還重過普通人！

bengrace50

Originally posted by kaixinren at 2005-7-8 22:54:


妖言惑眾？教人玩邪靈，害人害己...

我話你篇野的內容，我幾時話過你呀，兄弟！  家陣係你火而唔係我呀。  亂罵人你？！

kaixinren

Originally posted by bengrace50 at 2005-7-9 01:42 AM:



我話你篇野的內容，我幾時話過你呀，兄弟！  家陣係你火而唔係我呀。  亂罵人你？！

補鍋？

bengrace50

Originally posted by kaixinren at 2005-7-8 22:54:


妖言惑眾？教人玩邪靈，害人害己...

仲有，上次我見人教人唔好念金剛經，那是損人慧命的說話，身為佛教徒有必要護教。 為的不是自身利益(我已是佛教徒，人地不信我有何損失？)而是為其他眾生利益，佛經中有句：『離經一字，是為魔說』。  亦有云：未法時代魔王會用一切方法誤導眾生令佛法滅亡。  我為護教指責不知就裡的眾生不要為魔利用，與你何干？  罵人就一定不對的嗎？  你一定是年在30以下的年青人，難怪現代的年青人下下都話父母師長是—不好！ 罵他的就不一定是壞人，眾生難教！

michael86

Originally posted by bengrace50 at 2005-7-8 11:42 PM:



我話你篇野的內容，我幾時話過你呀，兄弟！  家陣係你火而唔係我呀。  亂罵人你？！

Originally posted by bengrace50 at 2005-7-8 05:11 PM:
妖言惑眾！ 教人玩邪靈，害人害己！ 仲以為用d咁方法可以無事，不過有打到人地魂飛魄散的心已經是壞人先！  天點會幫你 。

[ Last edited by michael86 on 2005-7-8 at 11:54 PM ]

bengrace50

Originally posted by kaixinren at 2005-7-8 23:45:


補鍋？

你讀過幾多書呀？ 睇試題都要睇清楚呀！  妖言惑眾的說話難道出自你的手筆？  如果你寫得出的話我的確是罵你『 妖言惑眾』！  出得自我口又怕什麼認！  係罵你就罵你的，不是就不要屈我。

bengrace50

玩碟仙自保法：

玩碟仙時，隻碟係由中間開始。切記一定要請碟仙歸回中間原來位置，若果碟仙硬係唔肯歸位，只有一個方法對付，就係每次玩時都要有一個處男或者係學過道術o既人一齊參加。當有事時就叫佢立刻咬破另一隻手o既中指指頭， 以中指帶鮮血按下碟上。據說咁樣做嚴重o既會令「碟仙」魂飛魄散，不過至低限度都可以逼碟仙返去。

「碟仙」真相

＊台灣有傳聞話碟仙係由台灣一位道行高深而立心不良o既老和尚施法召來狐魂野鬼，並將佢o地囚禁o係碟子入面。之後就大事宣揚碟仙可測未來，引誘人不停地去玩，然後由o個o的受制於佢o既孤魂野鬼暗中吸取人o既精、氣、神，供老和尚修練一種奇異歹毒o既獨門法術。

＊另外一種講法附會於日本「稻荷神社」傳說，因為o係日本家喻戶曉o既「稻荷神社」，所供奉o既就係中國o既「狐仙」，而呢o的「碟仙」所召o黎o既正係「狐仙」。o係日本o既一o的家庭中，都有供奉「狐仙」o既習俗，通常係以上好o既梧桐木，搭建一間玩具屋仔，每日奉獻清茶、鮮花o黎祭拜供養。另外o係日本有一種糯米製o既麻糬，亦稱為「稻荷」，據說係「狐仙」最鍾意食o既o野。而聽講有o的家庭每日清晨打掃時，都會發現一o的白色狐狸毛，真是邪門！

呢d野唔底罵？