娛樂滿紛 26FUN - Powered by Discuz! Board

標題: [純粹轉貼~得啖笑]獻10大蠱惑陰招幫阿布搞掂巴塞 [打印本頁]

作者: 奇 時間: 2006-3-2 05:17 PM 標題: [純粹轉貼~得啖笑]獻10大蠱惑陰招幫阿布搞掂巴塞

車路士於歐聯十六強大戰失利，首回合以一比二不敵西班牙勁旅巴塞隆拿，貴為英超第一富豪球會，班主阿布拉莫域有錢、領隊莫連奴有計，出唔到線肯定冇面，下周中次回合作客魯營球場，必定出齊賤格、陰毒、騎呢招，實行霸王硬上弓強搶出線權！至於車仔會出乜招數，我一於幫佢諗埋，總共十招咁多，唔知唔佢使呢？

灑銀彈幕後搞搞震

阿布拉莫域富甲一方，既可用銀彈戰術捧起車仔，亦可用呢招打殘巴塞。以阿布財力，可從三方面搞亂檔，令巴塞無法發揮真正實力，助車仔反勝晉級。

陰招1 落重注爆莊大挪移

阿布要擾亂巴塞，唔使親自出手，只要煲爆莊即可間接逼莊家做，呢招亦叫「爆莊大挪移」，係圈內人公認最惡毒招數。

由於買通對方球員好容易惹來周身蟻，幕後主腦避免惹禍上身，大可重注買外圍要巴塞晉級，數以十億計落注，務求令莊家爆莊，屆時莊家唔想損手爛腳，自然會做。做乜？冇人知，總之做到巴塞輸波出局就掂；就算莊家衰，阿布都會贏大錢當係安慰獎，絕！

陰招2 西甲聯賽借刀殺人

巴塞歐聯比賽前要打場西甲，對手係拉科魯尼亞。拉科等錢使已經唔係秘密，亦曾傳過阿布入主，佢睇準呢點，只要畀多少甜頭拉科，即可借刀殺人出殺傷戰術。拉科唔使贏波，只要打茅波踢傷巴塞主力即掂。巴塞多位球員都可以個人突破，對住茅柴就大鑊。

拉科要贏就難，但係要踢傷細哨、美斯就話咁易，一見佢上腳就晒靴，袋袋平安，卑鄙大晒。

陰招3 車買「塞」話晒事

阿布靠石油起家，然後透過收購、分拆再賣錢使身家倍增，係買賣專家，叻過「殼王」陳國強，以佢功力，大可出價收購成間巴塞。

唔好睇細哨好似對巴塞好忠心，其實佢係世界仔，屆時見到未來老闆阿布，自然唔敢亂，必定自動收檔，車仔必可順利過關，呢招車買「塞」路路暢通，阿布諗得過呀！

莫帥度橋機關算盡

莫連奴當年巴塞做助日子唔短，同球隊職員關係唔差，所謂知己知彼，百戰百勝，只要靠呢人脈，隨時可以出招提高車仔勝算。

陰招4 收買內鬼裝偷聽器

球隊更衣室面收好多秘密。只要作二十四小時全天候偷聽，好可能會發現古利唔妥美斯，或者雲邦美同雲邦賀斯其實係「斷背山」，呢千奇百怪事，全部都鮮為人知。

當車仔蒐集晒證據就可以將敵人逐一擊退，賽前要脅踢爆佢或者散播謠言，到時巴塞想唔軍心大亂都幾難。呢招係就係卑鄙，不過人不為己、天誅地滅呀，仲有五日時間，係做就快！

陰招5 離間細哨美斯感情

細哨同美斯兩條友落到場心有靈犀合拍到震，但佢似乎忘記巴西同阿根廷本來就係誓不兩立。車仔要贏波就要喚起佢民族意識，令巴塞陣中最好波兩條友鬼打鬼。

兩個南美大國向來敵對，呢個時候莫連奴就要做番挑撥佢二人感情，例如搵人問敏感問題，好似比利好波定係馬納當拿勁？或者撩番舊時大戰出傾，總之就要令佢醒覺佢天生係敵人。一旦二人決裂，車仔勝望即時提高。

陰招6 剋星波衫製造驚嚇

今季巴塞勁就勁喇，不過仲有一隊波同一個人可以剋住佢，就係馬體會同埋華倫前鋒韋拿，馬體會聯賽兩循環都擊敗巴塞，而韋拿就剋住巴塞門將域陀華迪斯。既然係咁，莫連奴同全體球員要晒馬體會波衫魯營熱身，阿布咁有錢，不妨送件馬體會波衫畀每一個入場車仔球迷笠住，巴塞班波一見到剋星件波衫分分鐘頭都暈埋，戰鬥力即時銳減。另外，收買華倫個韋拿，到比賽陣叫佢巴塞龍門附近行來行去，一定令到巴塞門將域陀華迪斯提心吊膽，車仔球員點射都入啦！

另類騎呢怪招

阿布同莫帥雖然錢多又橋多，但有騎呢招數可能連佢都未必諗到，就係利用球迷、傳媒、女人、甚至小動物，一樣可以幫車仔化險為夷。雖然以下呢四招用起上難度較高，手段亦更那渣，但都可以畀佢兩位做參考。

陰招7 職業球迷製造事端

上屆AC米蘭對國際米蘭八強賽，因為國米班球迷搞事，最終搞到被判輸○比三。車路士大可以照辦煮碗，買通球迷，令到場波唔使踢，都可以淘汰巴塞。

以車仔老闆阿布財力，使多少錢搞批「臨記」返扮巴塞球迷絕對唔難。入魯營球場之前，叫班臨記收好花、炮仗、武器、酒樽等雜物。車路士作客贏波晉級自然冇事發生，一旦有乜差池，班職業球迷即時「做」。到時球證想唔腰斬都唔得，最終搞到歐洲足協判巴塞輸○比三，車仔晉級八強。

陰招8 大放田鼠掘爛魯營

巴塞隆拿唔擅長踢大爛地，但要派人整爛魯營球場絕對唔易，最低限度要諗計越過班保安員，所以可以當地農村大量收集田鼠，然後晚間派專人球場周圍放田鼠。田鼠有個習性就係見泥土就會掘窿，掘到魯營球場草地爛晒咁就叫成功。

不過，呢招都有多少難度，事關咁大批田鼠要運到魯營球場附近都唔易，最驚係田鼠放出唔識走入去球場，咁咪白費心機？如果放田鼠唔得，不如試放蛇，夠驚嚇嘛！

陰招9 搵球王比利出口術

比利烏鴉口係人都知，九四年世界杯講死哥倫比亞，九八年搞到巴西捧唔到杯，○四年一講朗尼好波，踢唔夠三十分鐘佢就立即傷出，一次又一次開口中，可見絕非偶然。

車仔如果想晉級八強，只要搵幾個記者訪問比利，叫佢分析下呢場歐聯十六強大戰，叫佢讚巴塞細哨係當今球王，美斯係未來新星，總之就捧到巴塞天上有、地下無。只要佢金口一開，相信世界上冇可以避得過佢「祝福」。

到時到候朗拿甸奴同美斯可能會無故受傷，落到場巴塞擺烏龍、中柱又中楣，到時車仔想唔贏都幾難。

陰招10 施美人計色誘對手

好多車路士球迷都知道，車路士中場鐵漢林柏特個老婆愛倫係加泰隆尼亞名模，而加泰隆尼亞就即係巴塞隆拿位處省份。咁林柏特大可施夫威，叫老婆做住鴇婆，叫晒老婆班姊妹出，勾引巴塞隆拿班球星做入幕之賓。

做得模特兒就梗係個個都樣靚身材正。巴塞隆拿班球星個個都血氣方剛，如果班名模賽前一日向班巴塞球員施媚功的話，直頭神仙都企唔穩。到時巴塞班球員落得到球場都腳軟，仲點踢波呀。但要留意係，林柏特一向都係好好先生，究竟佢會唔會叫老婆咁做呢？另外班姊妹團又夠唔夠人數，搞到巴塞球員個個都「食滯」呢？

作者: wer 時間: 2006-3-2 05:28 PM

一隊波戰績下滑,即刻.....

作者: kakeidevil 時間: 2006-3-2 06:02 PM

用殺手暗殺甸佬同messi 咪以後都唔使煩囉..

作者: kuru 時間: 2006-3-2 06:03 PM

第一招最毒, 借刀殺人^^~

歡迎光臨娛樂滿紛 26FUN (http://26fun.com/bbs7/)