標題:
[愛情心理測驗]
[轉帖]咩星座女最適合嫁入豪門 ?
[打印本頁]
作者:
simon1992003
時間:
2008-4-24 04:38 PM
標題:
[轉帖]咩星座女最適合嫁入豪門 ?
白羊女
各位白羊女出曬名大女人主義，而且響佢本字典入面從來冇話覺得自己一定要靠人，所以一旦嫁入豪門，做每樣事前都要得到老公、奶奶、老爺批準，仲要響人前人後扮曬聽教聽話？no way！唔駛一個禮拜佢就頂唔順走佬咯！
金牛女
金牛女一向出聲名賢良淑德，加上佢份人又傳統到痺，完完全全會努力做好媳婦的本份，嫁入豪門之後佢故然之會孝順老爺奶奶，唔會逆佢意思，而且佢本身亦都係入得廚房出得廳堂型，所以會贏得名門新抱的美譽。
雙子女
老實講，初時嫁入豪門接觸咁多新鮮事，唔同層面的人同事都會令到佢覺得好鬼開心，不過呢，以雙子女的神經質來講，日子一耐成日畀咁多人監視住仲要check住check住佢的言行，佢唔發癲都會患抑鬱症都似。
巨蟹女
繼金牛座之後又一成功例子，巨蟹女入廚房固然一流，連出廳堂都會令人非常滿意，再加上巨蟹座份人好講安全感，基本嫁得入豪門佢都唔係咁捨得離開再過返平凡人生活，就算中間有乜唔滿意，佢都會係含辛茹苦捱下。
獅子女
如果一旦畀獅子女嫁入豪門，唔理響背後其實係幾咁悲涼，佢都會貫徹一向的作風，扮曬幸福，等你班友仔羨慕下；不過好在佢本身份人好鬼介意人地點睇佢，對住老爺奶奶會盡量扮到好識做，可以歸納佢為自欺欺人型。
處女女
係人都知處女女為人夠曬主觀兼難相處，嗯，不過爆過小冷門係處女女為人好鬼執著，佢未嫁入豪門前已經有曬最壞打算，一旦嫁入去就算幾咁慘都係佢預料之內，佢會頂得住，不過又唔係話頂到尾，一過佢底線時唔走就係假。
天秤女
一向怕寂寞又鍾意扮靚的天秤女，講到話嫁入豪門喎，就梗係適合佢啦！成日可以出席上流派對識唔到的人，去派對之前又可以買靚衫扮靚靚，如果老公畀張附屬咭佢鍾意幾時都可以碌咭買靚衫佢仲會更加開心添！
天蠍女
佢點處理，就要睇下佢有幾愛佢老公，如果佢係勁愛的，佢會為大家的幸福而努力，不畏困難堅持到底，就算男家有幾專制，有幾麻煩佢都捱得甘心命抵，不過如果佢唔再愛佢老公，就咪怪佢反轉豬肚就係屎……
人馬女
叫人馬女入豪門過住d魚翅啷口飽魚當點心的生活，佢咁鍾意享受就梗係好啦！不過人馬女份人就最鬼獨立，哇！你話下下管住曬，呢樣又唔得，果樣又話失身份，初時佢都會畀下面，但係久而久之佢就寧願遠走高飛囉！
山羊女
無論老爺有幾挑剔佢，奶奶有幾鍾意為難佢，身為忍耐力最強的山羊女絕對會堅守佢的忍字訣，當然響佢忍耐的背後絕對唔會係咁單純，佢會靜靜雞響背後撈油水，一旦目標在望，豪門對佢再冇利用價值，佢就會一腳踢開你！
水瓶女
對呢d外星女來講，嫁唔嫁入豪門好似完全唔係咁關事，佢隻會當你度鐵門同公屋度鐵閘一樣睇法，隻要段婚姻出現一d佢忍受唔到的問題，佢就自自然然會離開，話之你度門有幾豪！
雙魚女
可能大家會以為雙魚女份人咁糊裏糊塗再加上佢用情專一，就算嫁入豪門之後生活得唔開心佢都會死忍，如果你真係咁諗就大錯特錯！係，佢係會死忍，不過唔係因為用情專一，其實係因為歎慣食慣佢唔能夠放棄呢種生活咋！
歡迎光臨 娛樂滿紛 26FUN (http://26fun.com/bbs7/)
Powered by Discuz! 7.0.0
